1 X̱ana' Dios, ba bwíakzo' neda' na' binlo nónbi'o neda'.
2 Nnézkzelo' kate' ži'a, na' kate' ẕzo ža'a.
3 Ẕwíakzo' da' žona', na' da' žezá' ḻaža'a.
4 Kate' bi na' wchaḻja',
5 Gáte'tezle kwita' neda' zoakzo' Le', X̱ana' Dios,
6 Dan' ẕente nak da' nnezlo' Le' žonen ga žebanla'.
7 ¿Gaẕ gak cha'a zi'to' gan bi zoakze Be' La'y chio'?
8 Cha' kwena' sibe ẕan ya'abá, zoakzo' Le' ga na'.
9 Chela' sáke'la' tia' ḻo be', na' cha'a zi'to' gan ẕḻa' wbíž,
10 ḻezka' sóaḻeno' neda' ga na',
11 Chela' gak gona' ga wkache' da' choḻ neda',
12 da' choḻ na' bi gak wkachen' neda' ḻawo' Le',
13 Le' beno' da' ka' zej yo'on ḻo beḻa' žen chia'.
14 Wká'n ẕenkza' Le' dan' ẕente nak da' žono', na' žebanla' ka naken.
15 Bḻe'ekzlo' neda' kate' wyá'a žit yoa'a,
16 Bḻe'elo' beḻa' žen chia' kate' wyá'n.
17 X̱ana' Dios, ẕente zej nak da' žezá' ḻažo'o gono'.
18 Cha' gak ḻaža'a wlaba' ka zej naken,
19 X̱ana' Dios, da' likze goto' benne' wen da' ẕinnj ka'.
20 Ẕnnégake' chio' Le', Dios.
21 X̱ana' Dios, bi ẕḻe'ela' chawe' benne' ka' ẕzóagake' Le' cheḻa'ale,
22 Dot ḻaža'a bi ẕḻe'ela' chawe' benne' ka'.
23 Bwíakze neda', X̱ana' Dios, na' bwia da' yo'on yichj ḻáẕda'wa'.
24 Bwia cha' zoaḻen to da' ẕinnj neda'.