1 Mìla yɔn fɔlɔ kɔn na yɛnmbigile ke kan,
2 Na ki yɛn yɛɛn, tasaga kikiin Yɛnŋɛlɛ lì tɛgɛ na kan wa yɛnŋɛlɛ na?
3 Naga yɛn ma, jɔgɔwɔ pi woro ma gbɛgɛlɛ ma tɛgɛ lepee wi kan wi le?
4 Naga yɛn ma, Yɛnŋɛlɛ li woro nala tangalɔmɔ pi yaan wi le?
5 Naga yɛn ma, mì tanga yagbogolo na wi le?
6 Ki yɛn ma yala Yɛnŋɛlɛ lìlan taanla wa li culo ŋa wì yala wi na!
7 Na kaa pye mì kɛ ma wɔ wa kozinnɛ li ni,
8 kona yariluguro nda mì lugu, lere wa yɛgɛ mbe ki yarilire ti kɔlɔgi wiri li,
9 Na kaa pye jɛlɛ wa na nɛgɛ, a mì yɛgɛ yirige wi na,
10 kona Yɛnŋɛlɛ li ti na jɔ wi saa muwɛ tire naŋa wa yɛgɛ kan,
11 Katugu ki jɛn na pye kapegbɔgɔ,
12 Kasɔn kayi ŋga ki jɛn na jɔgɔwɔ pye mbe tigi fɔ wa kuulo tara,
13 Na kaa pye kiti kɔnkala la ye mi naa na tunmbyee naŋa nakoma tunmbyee jɛlɛ wa sɔgɔwɔ, a mùu tanga ki tifaga,
14 kona na Yɛnŋɛlɛ li ka ka yiri ki sɛnrɛ ti ni, yiŋgi mi yaa pye?
15 Yɛnŋɛlɛ na lìlan gbegele wa na nɔ wi lara, lo ma lilan tunmbyee wi gbegele fun wi le?
16 Naga yɛn ma, fyɔnwɔ fɛnnɛ panla yɛnri yaraga ni, a mì je le?
17 Naga yɛn ma, mila yaakara ti ka na yɛ wi le?
18 Katugu maga lɛ wa na lefɔnrɔ sanga wi ni, mì pijiriwe wi gbegele ma pye paa wi to yɛn;
19 Naga yɛn ma, lere ŋa wi yɛn tege ni, mi wa yan yaripɔrɔ fu,
20 na mi silan simbaala pe sire nda pè ti yaripɔrɔ ta kan ki fɔ wi yeri wuu yɛɛ tɔn were ti na,
21 Na kaa pye mi pijiriwe wa figiri kiti kɔnsaga na,
22 kona na kɛyɛn yi kɔɔnlɔ yi laga wa na pajoro ti na,
23 Katugu mìla pye na fyɛ Yɛnŋɛlɛ li jɔlɔgɔ wa na na,
24 Naga yɛn ma, mila na jigi wi taga tɛ na wi le?
25 Na kaa pye mi yɛn na yɔgɔri na penjagbɔrɔ tawa pi wogo na,
26 na kaa pye mi yɔnlɔ ki yan kila yinrigi ŋgbanga,
27 na kaa pye na jatere wìlan fanla mala puŋgo larawa,
28 ki pyewe pi na ma, ki jɛn na pye kapege na na, ŋga kiti daga mbe kɔn ki na,
29 Naga yɛn ma, mila pye na yɔgɔri na jugu wi jɔlɔgɔ ki wogo na wi le?
30 Mi sila yɛnlɛ yɛrɛ na yɔn ki para ki wa ki la,
31 Leele mbele pàa pye wa na go ki ni, pàa pye na yuun fɔ:
32 Nambanŋa na wɔnlɔ na yeri laga funwa na;
33 Naga yɛn ma, mila kapere ti lara paa sɛnwee piile sanmbala pe yɛn wi le?
34 Mi sila pye na fyɛ janwa wi sɛnyoro ti yɛgɛ,
35 Ɛnhɛn, mi yaa ambɔ fɔ ta wi logo na yeri?
36 mi yaa wi lɛ wa na pajoro ti na,
37 Mi yaa na yɔngɔlɔ yɔn ki ni fuun ki yɛgɛ yo Yɛnŋɛlɛ li kan;
38 Na kaa pye na kɛɛrɛ ti yɛn na gbele na baga na na ma yo mìri yu,
39 na kaa pye mì kɛɛrɛ ti yarilire ti li mi siri sara,
40 kona wuuro mbe fi wa kɛɛrɛ ti ni bile wi yɔnlɔ,