1 Bze nag da' ẕnnia', X̱ana' Dios. Benle da' žḻiža' Le'.
2 Benn latje ḻa'a ḻawo' Le' nich wchi'a ḻažo'o neda',
3 Le' ẕwíakzo' yichj ḻáẕda'wa', na' ẕḻe'elo' neda' žel.
4 Žona' ka nak da' ẕnna x̱tižo'o,
5 Wdape chi'i neda' ḻo nez chawe' chio',
6 Žḻiža' Le', Dios, dan' ženlo' chi'a.
7 Bḻoe'el neda' kan žeyache' ḻáže'ḻe'elo' benách ka'.
8 Bwia neda' ka žon no benne' ẕwíakze' yej ḻawe'.
9 nich bi be gongak chia' benne' wen da' ẕinnj ka',
10 Bi žeyache' ḻáže'gekle' ljéžgake' ka',
11 Gáte'teze gan ẕda' ẕwíagake' neda'.
12 Zej nake' ka to bež yíx̱e'do' žénelba' bi da' gawba'.
13 Da, X̱ana' Dios, bdiḻ-ḻen benne' ka' bi zej nake' chawe', na' bžia yi' ḻégake'.
14 Beslá neda' ḻo na'gak benne' ka' ḻen no'o waḻe, X̱ana' Dios.
15 san neda', ḻe'ela' ḻawo' Le' dan' naka' chawe'.