1 बसन्तया इलय् जुजुपिं लडाइँ यायेत पिहां वनेगु इलय् दाऊदं योआब व थः मेपिं कप्तानत व फुक्क इस्राएली सिपाइँतय्त लडाइँ यायेत छ्वल। इमिसं अम्मोनीतय्त नाश यानाबिल, अले रब्बा शहरयात घेरय् यात। दाऊद धाःसा यरूशलेमय् हे च्वन।
2 छन्हु बहनी दाऊद खातां दना वनाः दरबारया कःसि चाःहिला च्वंबलय् छम्ह तसकं हिसि दुम्ह मिसा म्वःल्हुया च्वंगु खन। व तसकं बांलाःम्ह खः।
3 अथे जुयाः दाऊदं व सु खः धकाः न्यनेकने यायेत छम्ह मनू छ्वल। वं थथे खबर हल, “व एलीआमया म्ह्याय् हित्ती उरियाहया कलाः बतशेबा खः।”
4 अले दाऊदं मनूत छ्वयाः बतशेबायात थःथाय् काय्के छ्वल। व दरबारय् वल अले दाऊद वनापं द्यन। (बतशेबा दाऊदयाथाय् वःबलय् वं नकतिनि थः थीमत्यः जुइ धुंकाः थःत शुद्ध याःगु खः।) अनं लिपा व थःगु हे छेँ लिहां वन।
5 अले वया प्वाथय् दत। बतशेबां, “जि प्वाथय् दत” धकाः दाऊदयाथाय् खबर छ्वल।
6 अथे जुयाः दाऊदं “हित्ती उरियाहयात थःथाय् छ्वया हजि” धकाः योआबयात उजं बिल। अले योआबं वयात दाऊदयाथाय् छ्वयाहल।
7 उरियाह दाऊदयाथाय् थ्यंबलय् दाऊदं वयात न्यन, “योआब व वया पुचःतय्गु अले लडाइँया बारे गथे जुयाच्वंगु दु?”
8 अनंलि दाऊदं उरियाहयात धाल, “छं छेँ वनाः थःगु तुति सिलाछ्व।” व दरबारं पिहां वंबलय् जुजुं वयात कोसेलि बियाछ्त।
9 तर उरियाह थःगु छेँ मवं, व जुजुया ध्वाखा पिवाःत नापं ध्वाखा लिक्क द्यन।
10 उरियाह थःगु छेँ लिहां वंगु मदु धकाः दाऊदं न्यनेवं वयात धाल, “छु छ तापाकं वयाम्ह, मखु ला? छ छाय् थःगु छेँ मवनागु?”
11 उरियाहं लिसः बिल, “इस्राएल, यहूदा व सनू पालय् हे दु अले जिमि सेनापति योआब व छःपिं जिमि प्रभुया मनूत नं चकंगु ख्यलय् पाल ग्वयाच्वंगु दु। जि जक नयेत्वने यायेत व कलाःनापं द्यनेत छेँ वनेगु ला? जिं छःपिनिगु जीवनया नामं पाफयाः धाये, जिं अथे याये फइ मखु।”
12 अले दाऊदं उरियाहयात धाल, “अथे खःसा छ छन्हु नि थन च्वँ अले कन्हय् जिं छन्त वनेबी।” अथे जुयाः उरियाह उखुन्हु व कन्हय् खुन्हु यरूशलेमय् हे च्वन।
13 दाऊदं वयात नयेत्वने यायेत सःतल, अले वयात यक्व त्वंकल। बहनी व पिहां वन जुजुतय् पिवाः च्वनिपिं नापं थःगु लासाय् द्यनाः चा छ्यात। उखुन्हु व थःगु छेँ नं मवं।
14 कन्हय् खुन्हु सुथय् दाऊदं योआबयात छगू पौ च्वयाः उरियाहया ल्हातय् बियाः छ्वल।
15 दाऊदं पौलय् थथे धकाः च्वल, “गन तच्वकं लडाइँ जुयाच्वंगु दु अन उरियाहयात न्ह्यःने छ्वयाः छिपिं लिच्यु अले व घाःपा जुयाः सीमा।”
16 अथे जुयाः योआबं रब्बा शहरयात घेरय् याःबलय् वं उरियाहयात शत्रुतय् छुं बहादुर सिपाइँत दुथाय् सीकाः अन छ्वयाबिल।
17 शहरया मनूत छक्वलं वयाः योआब नापं लडाइँ यात अले दाऊदया छुं सिपाइँतय्त स्यानाबिल नापं हित्ती उरियाहयात नं स्यात।
18 अनंलि योआबं छम्ह मनूयात दाऊदयाथाय् लडाइँया बारे फुक्क खबर बियाः छ्वत।
19 व खबर ज्वनावंम्ह मनूयात योआबं थथे धाल, “छं लडाइँया बारे जूगु फुक्क खँ जुजुयात धाये धुंकाः
20 जुजु तंम्वयाः ‘लडाइँ याःवनाबलय् छिपिं छाय् लिक्क वनागु? पःखालं वाणं कय्काहइ धकाः छिमिसं सीमाःगु खः।
21 यरूबबेसेतया काय् अबीमेलेकयात सुनां स्याःगु खः? इमिसं वयात छम्ह मिसां ल्वहंघः पखालं क्वफानाहयाः स्याःगु मखु ला? अले व तेबेसय् सीगु मखु ला? छिपिं पःखाःया थुलिमछि लिक्क छाय् वनागु?’ थथे धकाः न्यन धाःसा वय्कःयात थथे धा, ‘छसपोलया दास हित्ती उरियाह नं सित।’”
22 व खबर यंकूम्ह मनू वन अले व दाऊदयाथाय् थ्यंबलय् योआबं धयाहःथें वयात फुक्क खबर बिल।
23 वं दाऊदयात धाल, “शत्रुत शहरं पिहां वयाः जिमित क्वत्यलाः जिमिगु विरोधय् चकंगु ख्यलय् मुन। तर जिमिसं इमित शहरया मू ध्वाखा तक हे लिनायंका।
24 अन पखालय् च्वनाः वाणं कय्कीपिन्सं जुजुया छुं दासतय्त वाणं कय्काः स्यात। छपिनि दास हित्ती उरियाहयात नं स्यानाबिल।”
25 दाऊदं खबर हःम्ह मनूयात धाल, “योआबयात थ्व खबर यंकाब्यु, ‘छ दिक्क चाये मते। गथे तरवारं छम्हय्सित स्याइ अथे हे मेम्हय्सित नं स्याइ। शहरयात हमला यायेगु त्वःते मते अले उकियात तहसनहस या।’ योआबयात हपाः दयेमा धकाः थ्व खँ वयात धयाब्यु।”
26 उरियाहया कलातं थः भाःत सित धयागु खबर न्यंबलय् वं वयागु निंतिं दुखं च्वन।
27 दुखं च्वनीगु ई पूवने धुंकाः दाऊदं मनूत छ्वयाः बतशेबायात थःगु छेँय् हल। अनंलि व दाऊदया कलाः जुल, वं छम्ह काय् बुइकल। तर दाऊदं छु याःगु खः व खनाः परमप्रभु लय्मताः।