1 छुं ई लिपा अम्मोनयाम्ह जुजु नहाश सित, अले वया काय् हानून जुजु जुल।
2 दाऊद जुजुं धाल, “जिं हानूनयात हनाबना यायेमाः छाय्धाःसा वया बौ नाहाशं जितः न्ह्याबलें हनाबना याःगु खः।” उकिं वं बिचाः हनाः दूततय्त खबर बियाः छ्वल।
3 अम्मोनी नायःतय्सं थः मालिक हानूनयात धाल, “छिं स्वयादीबलय् दाऊदं छिमि बाःयात इज्जत यानाः बिचाः हनेत थुपिं मनूत छ्वयाहःगु धकाः च्वनादिया ला? अथे खः हे मखु। वं ला झीगु देश त्याकाकायेगु लागिं चिवा कायेत इमित छ्वयाहःगु खः।”
4 उकिं हानूनं दाऊदया मनूतय्त ज्वनाः इमिगु बच्छि बच्छि दाह्री खानाबिल। अले इमिगु वसः दथुइ जँ तक हे चानाबियाः इमित लितछ्वल।
5 इपिं छेँय् लिहां वयेत तसकं मछाल। छुं मनूतय्सं वनाः दाऊदयात व खँ कनाबिल, अले दाऊदं इमित दाह्री ताहा मजुतले यरीहो शहरय् च्वनाच्वँ अले लिहां वा धकाः खबर छ्वल।
6 आः जिपिं दाऊदया निंतिं मिखां स्वये मयःपिं मनूत जुइ धुंकल धकाः अम्मोनीतय्सं सिल। उकिं इमिसं बेथ-रहोब व सोबा शहरं निइद्वः न्यासि वनीपिं अरामी सिपाइँत थःपिन्त ग्वाहालिया निंतिं बालं कयाः हल। इमिसं माकाया जुजुनापं वया सेनात द्वःछि व तोबपाखें झिंनिद्वः मनूत बालं कयाहल।
7 दाऊदं व खँ न्यनाः योआब व थः सिपाइँतय्त इपिं लिसे लडाइँ यायेत छ्वल।
8 अम्मोनीत वयाः शहरया मू ध्वाखाया न्ह्यःने लडाइँ यायेत तयार जुयाच्वन। अले सोबा व रहोबाया अरामी व तोब व माकाया मनूत चक्कंगु ख्यलय् लडाइँया निंतिं थथःगु थाय् काल।
9 योआबं थःगु न्ह्यःने व ल्युने लडाइँया लागि शत्रुया सिपाइँत तयार जुयाच्वंगु खनाः वं इस्राएलयापिं ल्ययातःपिं सिपाइँतय् पुचःयात अरामीतय् चुलिंचू तल।
10 मेपिं सिपाइँतय्त वं थःकिजा अबीशैया अधीनय् तल, अले वं इमित अम्मोनीत लिसे ल्वायेत चुलिंचू झ्वःलाक तल।
11 योआबं अबीशैयात धाल, “अरामीतय्सं जितः बुकाच्वंगु खन धाःसा छ वयाः जितः ग्वाहालि ब्यु, अम्मोनीतय्सं छन्त बुकाच्वंगु खन धाःसा जि वयाः छन्त ग्वाहालि बी।
12 बल्ला व साहसी जु! अले थःगु जाति व झी परमेश्वरया शहरतय्गु निंतिं मग्यासें लडाइँ यायेनु। अले परमप्रभुयात छु याये यः वय्कलं व हे यानादी।”
13 अले योआब व वया सिपाइँतय्सं अरामीतय्त हमला यात। अरामीत योआबया न्ह्यःनं बिस्युं वन।
14 अले अरामीत बिस्युं वनाच्वंगु खनाः अम्मोनीत अबीशैया न्ह्यःनं बिस्युं वनाः शहर दुने दुहां वन। अनंलि योआब अम्मोनीतलिसें लडाइँ यायेगु त्वःताः यरूशलेमय् लिहां वल।
17 व खँ न्यनाः दाऊदं सकल इस्राएली सिपाइँतय्त मुंकल। दाऊदं इमित यर्दन खुसि उखे हेलामपाखे यंकल। वं इस्राएलीतय्त अरामीतय् न्ह्यःने थन। अले इमिसं वनापं लडाइँ यात।
18 तर अरामीत इस्राएलीतपाखें बिस्युं वन। अले दाऊदं इमि न्हय्सःम्ह रथ चलय् याइपिं व पिइद्वःम्ह सिपाइँतय्त स्यानाबिल। अन वं अरामी सेनापति शोबाकयात नं घाःपा यानाबिल अले व अन हे सित।
19 हददेजेरया अधीनय् च्वंपिं फुक्क जुजुपिन्सं जिमित इस्राएलं त्याकल धकाः सियाः इस्राएललिसें सन्धि यात अले वयागु अधीनय् च्वन। अनंलि अरामीतय्सं हाकनं अम्मोनीतय्त ग्वाहालि बीगु इच्छा मयात।