1 Baana bange, mwetegeeryenge kulamba kwa bbaaweenyu̱,
2 hab̯wakubba ndimukubaha magezi̱,
3 Nincaali na bbaabba nka musigazi muto,
4 bbaabba yanzegeseerye yambwera,
5 Tunga magezi̱, obbe na kwetegereza,
6 Otaligagumirisana, galikulinda,
7 Ki̱handu̱, tunga magezi̱,
8 Wendyanga magezi̱ galikufoora wa maani,
9 Galikulwalya kondo gya byakyo,
10 Weegwa mwana wange, ikiriza binkukuweera,
11 Nkwegeseerye bintu bya magezi̱,
12 Tihaloho kilyekiika mu muhanda gwamu
13 Kwatira ki̱mwei̱ bi̱bakwegeseerye, otalibileka,
14 Otagyenda mu muhanda gwa babiibi,
15 Gu̱gwo muhanda, ogwehalenge,
16 Babiibi tibalaala batakoori̱ kibii,
17 Kubba banolerwa bidyo bya b̯ubiibi,
18 Bei̱tu̱ muhanda gwa barungi gwisana kyererezi̱ kya mambya,
19 Muhanda gwa babiibi gwisana nti̱ti̱ gyeitumbi,
20 Mwana wange, taho mwozo gwamu ha bigambu binkukuweera,
21 Otalibyebeera, oicalenge noobi̱i̱zu̱ka,
22 kubba babigumbura bibaha b̯womi,
23 Weegyenderezanga bi̱byo byokuteekereza,
24 Weehalanga lu̱nyu̱mi̱yo lu̱ku̱habi̱sya,
25 Lingiiranga hookugyenda otakumagamaga,
26 Teekerezanga, otakakoori̱ kyokwendya kukora,
27 Weehala bibii, olibatirenge harungi,