1 إِسمْ أَصبْحَانْ إِحْڒَا
2 بُو-وَاڭْڒَا ذ ؤُمزْڒُوضْ تّمْسَاڭَارنْ،
3 بْنَاذمْ إِفتّْننْ إِتّْوَاڒَا ڒْغَارْ
4 ڒْمُونثْ إِ ؤُوَاضعْ ذ ثِيڭّْوُوذِي ن سِيذِي،
5 إِسنَّاننْ ذ ڒفْخُوخْ أَقَا أَثنْ
6 ذَارّبْ أَحُوذْرِي
7 بُو-وَاڭْڒَا إِتّْصدْجَاضْ خْ إِمزْڒَاضْ،
8 ونِّي إِزَارّْعنْ ڒْغشّْ، أَذْ إِمْجَارْ ڒغْبنْ،
9 ونِّي غَارْ إِدْجَا ڒْخزْرَاثْ صبْحنْثْ،
10 أَژّڒْ خْ ؤُمسْثهْزِييْ، أَذْ إِفّغْ ڒْهمّْ،
11 ونِّي إِتّخْسنْ ڒصْفَايثْ ن وُوڒْ،
12 ثِيطَّاوِينْ ن سِيذِي حطَّانْثْ خْ ثُوسّْنَا،
13 أَمعْڭُوزْ إِقَّارْ:
14 أَقمُّومْ ن ثمْغَارِينْ ثِيبَارَّانِييِّينْ
15 ثُوبُّوهڒْيَا ثتّْغِيمَا ثْڒسّقْ
16 ونِّي إِحصَّارنْ أَمَارْخُو،
17 أوْشْ أَمزُّوغْ نّشْ،
18 مَاغَارْ أَقَا مْلِيحْ
19 مَاحنْذْ أَذْ يِيڒِي ؤُثشْڒِي نّشْ خْ سِيذِي،
20 مَا زعْمَا وَارْ ذ أَشْ ؤُرِيغْ
21 حِيمَا أَذْ أَشْ سّشْنغْ ڒمْثنْ
22 وَارْ تّْكشَّاضْ أَمَارْخُو
23 مَاغَارْ سِيذِي أَذْ أَسنْ يَاغْ ثَاسْغَارْثْ نْسنْ،
24 وَارْ تّمْدُّوكُّوڒْ
25 مَاحنْذْ شكْ وَارْ ثتّْنِيمِيذْ شَا
26 وَارْ تَّاذفْ جَارْ إِنِّي إِتِّيشنْ أَوَاڒْ
27 مَاڒَا وَارْ غَاركْ مِينْ زِي غَا ثْخدْجْصذْ،
28 وَارْ سْمُوطُّويْ أَيْمِيرْ ن وشْحَاڒْ ؤُيَا،
29 مَا ثژْرِيذْ إِجّْ ن ورْيَازْ إِمحْضنْ