1 हाकनं जि थस्वयाः थुबलय् जिं कँय्यागु निगू पहाडया दथुं प्यंगः रथ वयाच्वंगु खना।
2 न्हापांगु रथ ह्याउँपिं सलतय्सं, निगूगु रथ हाकुपिं सलतय्सं,
3 स्वंगूगु रथ तुयुपिं सलतय्सं व प्यंगूगु रथ तातेपाते जूपिं सलतय्सं साला च्वंगु दु, उपिं फुक्क बल्लाः।
4 अले जिं जि नाप खँ ल्हाःम्ह स्वर्गदूतयात न्यना, “हे प्रभु, थुपिं छु खः?”
5 स्वर्गदूतं जितः धाल, “थुपिं स्वर्गया प्यंगू आत्मा खः। थुपिं दक्व पृथ्वीयाम्ह परमप्रभुया न्ह्यःने दना च्वनीपिं खः, अय्नं आः पिहां वःगु दु।
6 हाकुपिं सलत दुगु रथ उत्तरयागु देशपाखे वनाच्वंगु दु, तुयुपिं सलत दुगु रथ पच्छिमपाखे, अले तातेपाते जूपिं सलत दुगु रथ दच्छिनपाखे वनाच्वंगु दु।”
7 थुपिं दक्व बल्लाःपिं सलत पिहां वयाः पृथ्वीइ चाःहिलेत हथाय् चायाच्वंगु दु। अले वं धाल, “पृथ्वीया फुक्क थासय् हुँ।” उकिं इपिं पृथ्वीया फुक्क थासय् वन।
8 अले वं जितः तसकं हाला धाल, “स्व, उत्तरयागु देशपाखे वनाच्वंपिन्सं जिगु आत्मायात शान्त यानाब्यूगु दु।”
9 परमप्रभुया थ्व वचन जिथाय् वल,
10 “बेबिलोनं लिहांवःपिं हेल्दै, तोबियाह व यदायाहपिन्के बेबिलोनं ज्वनाः वःगु भेटी नाला कयाः उखुन्हु हे सपन्याहया काय् योशियाहया छेँय् हुँ।
11 इमिसं ब्यूगु लुँ व वहलं छगू श्रीपेच दय्कि अले यहोसादाकया काय् दकले तःधंम्ह पुजाहारी यहोशूया छेनय् श्रीपेच पुइकाब्यु।
12 दक्व शक्ति दुम्ह परमप्रभुं वयात थ्व धयादिल, ‘स्व, कचा धाःम्ह थ्व मनू थःगु थासय् हे च्वन्ह्याया वइ अले वं परमप्रभुयागु देगः दय्की।
13 वं हे परमप्रभुया देगः दय्केगु ज्या सिधय्की अले वयात जुजुयात दइगु मान दइ, वं थः मनूतय्त गद्दीं जुजुं थें शासन याइ। वं गद्दीं पुजाहारी जुयाः सेवा याइ। अले थुपिं नितां मिलय् जुयाः ज्या याइ।’
14 हेल्दै, तोबियाह, यदायाह व सपन्याहया काय् हेनयात लुमन्तिया निंतिं व श्रीपेच परमप्रभुया देगलय् तइ।
15 तापाक तापाक च्वंपिं मनूत वयाः परमप्रभुयागु देगः दय्केगु ज्याय् ग्वाहालि बी। देगः दय्के धुंकाः दक्व शक्ति दुम्ह परमप्रभुं जितः छिमिथाय् छ्वयाहयादीगु खः धकाः छिमिसं थुइ। छिमिसं परमप्रभुं धयादी थें बांलाक मानय् यात धाःसा थ्व जुइ।”