1 কয়দিন বাদে বিবি নয়মীয়ে রুতরে কইলা, “আমি মনো কররাম তুমি হিরবার সুখি-সংসারি অও।
2 তুমি যার কামলা বেটিন্তর লগে রইয়া লুরিরায়, অউ বোয়াজ তো এমনেউ আমরার কুটুম। আইজ রাইত তাইন খলাত আইয়া বার্লি মাড়া দিবা।
3 তে তুমি এক কাম করো, তুমি নাইয়া-ধইয়া, তেল-তুল মাখিয়া, হাজি-পাড়ি তান খলাত যাওগি। অইলে তাইন তুমারে দেখইন না যানু।
4 রাইতকুর খাওয়া-দাওয়া বাদে এইন যেবলা হুতিবা, অউ সময় তুমি এন বিছনা চিনিয়া রাখিও। বাদে হনো গিয়া তান পাওর উপরর খেতা হরাইয়া হনো হুতিরইও। হুতিয়া হারলে কিতা অইবো, তাইন এমনেউ কইয়া দিবা।”
5 রুতে কইলা, “জি আইচ্ছা, আপনে যেলা কইরা অলাউ করমুনে।”
6 বাদে সময় মত তাইন খলাত গেলা, আর হড়িয়ে যেলা কইছলা অলাউ করলা।
7 খাওয়া-দাওয়া বাদে বোয়াজ যেবলা খুশ মিজাজে তান খলার উড়ার তলে গিয়া হুতিলা, রুতও লায় লায় হনো গিয়া বোয়াজর পাওর উপর থনে খেতা হরাইয়া পাওর কান্দাত হুতিরইলা।
10 বোয়াজে জুয়াপ দিলা, “বইনরে, আল্লায় তুমারে রহম করউক্কা, তুমি পয়লা থাকিউ যেলা হরির বিশ্বাসি আছলায়, তাইর ভালাইর লাগি আইজ আরো বেশি বিশ্বাসি জাইর করলায়, তুমি তো ধনি-গরিব কুনু জুয়ান বেটার লগে যাওয়ার লাগি চিন্তা করছো না।
11 আস্তা গাউর হকল মানষেউ তুমারে ভালা পায়। তুমি চিন্তা করিও না, তুমি যেলা চাইরায়, আমি অলাউ করমু।
12 অইলে আমা থনে আরো করিব তুমাতানর একজন আছইন,
13 কাইল বিয়ানকু বালা আমি তান লগে মাতিমু, তাইন যুদি তুমারে শাদি করতে রাজি অইন তে তো ভালা, তাইনউ শাদি করিল্লা। আর না অইলে আমি আল্লার কছম খাইয়া কইয়ার, আমি তুমারে সমজিয়া লইমু। অখন তুমি অনোউ রাইত কাটাইলাও, রাইতকাল আর যাইও না।”
14 ফজরর আগ পর্যন্ত রুত বোয়াজর পাওর কান্দাত হুতিরইলা। বোয়াজে রুতরে কইলা, “তুমি যেন ইনো আইছো, ইখান যানু কেউ না জানে।” তেউ আন্দাইর রইতেউ রুত বাড়িত যাইতাগি করি জুইত অইলা।
15 আর বোয়াজে তানরে কইলা, “হড়ির ছামনে খালি আতে কিলা যাইতায়? দেখি, তুমার চাদ্দরখান মেলাও।” রুতে চাদ্দর মেলিয়া কুনাত ধরলা আর বোয়াজে ছয় পেটু বার্লি আনিয়া চাদ্দরদি বান্দিয়া তান কান্দো তুলিয়া দিলা। রুতে অউ গাইট লইয়া বাড়িত গেলাগি।
16 গিয়া হারলে তান হড়িয়ে জিকাইলা, “কিতা গো মাই, খবর কিতা?” তেউ বোয়াজে যেতা যেতা কইছইন অতা তান হড়ির গেছে খুলিয়া কইলা,
17 লগে এওখানও কইলা, “বোয়াজে কইছইন তুমি হড়ির গেছে খালি আতে কিলা যাইতায়, কইয়া তাইন আমারে ছয় পেটু বার্লিও বান্দিয়া দিছইন।”
18 ইতা হুনিয়া হড়িয়ে কইলা, “তে হেশ পর্যন্ত কিতা অয় দেখো, ই মানষে আইজকুর মাজেউ এর এক গালা না লাগাইয়া দম লইতা নায়।”