1 कनानय् लडाइँ याये मनंनिपिं इस्राएलीतय्त जाँचय् यायेत परमप्रभुं छुं जातितय्त त्वःतादिल।
2 इस्राएलीतय् लडाइँ याये मसःपिं लिपाया सन्तानतय्त लडाइँ यायेगु स्यनेत वय्कलं थथे यानादीगु खः।
3 पलिश्तीतय् न्याम्ह शासक, सकल कनानीत, सीदोनीत व हिव्वीत बाल-हेर्मोन पहाडंनिसें कयाः लेबो-हमात तक लेबनान पहाडी देशय् च्वंपिं सकल थुकथं त्वःतूपिं जातित खः।
4 परमप्रभुं मोशापाखें इमि पुर्खातय्त ब्यूगु आज्ञायात मानय् याइ कि मयाइ धकाः जाँचय् यानाः स्वयेत थुपिं जातितय्त तःगु खः।
5 थुकथं इस्राएलीत कनानीत, हित्तीत, एमोरीत, परिज्जीत, हिव्वीत व यबूसीतय् दथुइ च्वन।
6 इमिसं इमि म्ह्याय्पिंलिसें ब्याहा यात व थःम्ह्याय्पिं इमि काय्पिन्त बिल। अले इमि द्यःतय्त पुजायात। यहूदा व बेन्यामीन लागाय् शुरुयापिं न्यायकर्तात|src="Early Judges in Judah and Benjamin.jpg" size="col" ref="३:६"
7 हाकनं इस्राएलीतय्सं परमप्रभुया मिखाय् मभिंगु ज्या यात। इमिसं परमप्रभु थः परमेश्वरयात ल्वमंकाः बाल द्यःत व अशेरा द्यःमय्जुतय्त पुजा यायेगु यात।
8 अले परमप्रभु इस्राएलीत खनाः तंचायादिल, वय्कलं इमित अराम-नाहारैमयाम्ह जुजु कूशन-रिशातैमया ल्हातय् मियादिल। व हे जुजुं इस्राएलीतय्त च्यादँ तक क्वत्यलेगु यात।
9 तर इस्राएलीतय्सं परमप्रभुयात ख्वयाः बिन्ति याःबलय् वय्कलं इमित त्वःतकेत कालेबया किजा कनजया काय् ओत्निएलयात ल्ययादिल, अले वं इमित त्वःतकल।
10 वयाके परमप्रभुयागु आत्मा दुबिल, अले व इस्राएलीतय् न्यायकर्ता जुयाः लडाइँलय् वन। परमप्रभुं अरामया जुजु कूशन-रिशातैमयात ओत्निएलया ल्हातय् बियादिल। वं कूशन-रिशातैमयात बुकल।
11 थुकथं कनजया काय् ओत्निएल म्वातले देशय् पिइदँ तक शान्ति जुयाच्वन।
12 हाकनं इस्राएलीतय्सं परमप्रभुया मिखाय् मभिंगु ज्या यात। इमिसं अथे याःगुलिं परमप्रभुं मोआबयाम्ह जुजु एग्लोनयात इस्राएल स्वयाः बल्लाकादिल।
13 एग्लोन अम्मोनीत व अमालेकीतय्त लडाइँया लागि थःथाय् मुंकाः इस्राएलीतय्त हमला यायेत न्ह्यज्यात। अले ताय्गः सिमातय्गु शहरयात त्याका काल।
14 थथे मोआबया जुजु एग्लोनं इस्राएलीतय्त झिंच्यादँ तक क्वत्यलेगु यात।
15 इस्राएलीतय्सं हाकनं परमप्रभुयात ख्वयाः बिन्ति यात। अले वय्कलं इमित बचय् याइम्ह छम्ह बेन्यामीनी गेराया काय् खवं ल्हाः छ्यलीम्ह एहूद बियादिल। इस्राएलीतय्सं वयात मोआबया जुजु एग्लोनयाथाय् कोसेलि बियाछ्वल।
16 एहूदं छकु हाकःगु निगू धाः दुगु तरवार दय्काः उकियात थःगु जव खम्पाय् वसः दुने चिनातल।
17 अनंलि व मोआबयाम्ह जुजु एग्लोनयाथाय् कोसेलि ज्वनाः वन। एग्लोन तसक्कं ल्ह्वंम्ह मनू खः।
18 कोसेलि बीधुंकाः एहूद कोसेलि क्वबिया वःपिं मनूतनापं लिहां वल।
19 तर व गिलगालया लिक्क ल्वहंया मूर्तित दुगु थासं जुजुयाथाय् लिहां वल, अले वं जुजुयात धाल, “हे महाराज, जिं छसपोल नापं दुसाखँ ल्हायेमाःगु दु।”
20 जुजु थःगु लाय्कूया कःसिया सिचुसे च्वंगु कोथाय् च्वनाच्वंगु खः। वया न्ह्यःने वनाः एहूदं धाल, “परमेश्वरपाखें जिं छसपोलयात छगू खँ धायेमाःगु दु।”
21 एग्लोन थः च्वनाच्वंगु थासं दन अले एहूदं थःगु खव ल्हातं जव खम्पाय् दुगु तरवार पिकयाः वयागु प्वाथय् सुयाबिल।
22 तरवार चुनापं दुहां वन, अले तरवार वयागु जँन्हुफातं पिहां वल। एहूदं तरवार लिमकाः, उकियात दाःनं त्वपुल। वं तरवार लिमकासे अथें हे त्वःताबिल।
23 अले एहूद पिने दलानय् पिहां वल। एग्लोनयात दुने हे त्वःताः वं लुखाय् तालं ग्वयाबिल।
24 व वने धुंकाः एग्लोनया च्यःत वल, लुखाय् तालं ग्वयातःगु खनाः इमिसं धाल, “महाराज दरबारया सिचुगु क्वथाय् झारा च्वना च्वन जुइ।”
25 ताःई तक पिप्युं इमित मछालापुसे च्वन। अय्नं जुजुं कोथाया लुखा मचाय्कूगु खनाः इमिसं ताःचा कयाः लुखा चाय्कल। इमिसं दुने जुजु सिनाः बँय् ग्वारातुलाच्वंगु खंकल।
26 इपिं पियाच्वंबलय् हे एहूद बिस्युं वन। व उपिं ल्वहंया मूर्तितय् लिक्क जुयाः सीरा धाःगु थासय् बिस्युं वन।
27 अले एफ्राइमया पहाडी देशय् थ्यनेधुंकाः वं तुरही पुल। अले इस्राएलीत पहाडं क्वहां वल। वं इमित न्ह्यः न्ह्यः तल।
28 एहूदं इमित धाल, “जिगु ल्यूल्यू वा छाय्धाःसा परमप्रभुं छिमि शत्रु मोआबीतय्त छिमिगु ल्हातय् बियादीगु दु।” उकिं इपिं वया ल्यूल्यू क्वहां वल अले इमिसं मोआब वनीगु यर्दन छियेगु थाय् त्याकाकाल। इमिसं सुं मोआबीयात खुसिया उखे वने मब्यू।
29 इमिसं उखुन्हु झिद्वः मोआबीतय्त स्यात। उपिं सकलें बःबल्लाःपिं व बहादुर सिपाइँत खः। उपिं छम्ह नं बिस्युं वनेमखं।
30 थुकथं उखुन्हु मोआबयात इस्राएलीतय्सं त्याकाकाल। अले देशय् चयदँ तक शान्ति जुयाच्वन।
31 एहूदया लिपा अनातया काय् शमगर वल। वं खुसः पलिश्तीतय्त सा ख्यायेगु कथिं स्यात। वं नं इस्राएलीतय्त बचय् यात।