1 अर्तासास्त जुजुं राज्य यानाच्वंबलय् बेबिलोनं जिलिसें वःपिं परिवारया नायःत व इपिं लिसे धलखय् दुथ्याःपिं थुपिं हे खः –
2 पीनहासया परिवारं – गेर्शोम।
3 परोशया परिवारं – जकरिया अले वलिसें धलखय् नां दुथ्याःपिं १५० म्ह मिजंत।
4 पहत-मोआबया परिवार – जरयाहया काय् एल्यहोएनै अले वलिसें २०० म्ह मिजंत।
5 जत्तूया परिवारं – यहासेलया काय् शकन्याह व वलिसें ३०० म्ह मिजंत।
6 आदीनया परिवारं – जोनाथनया काय् एबेद व वलिसें ५० म्ह मिजंत।
7 एलामया परिवारं – अतल्याहया काय् यशयाह व वलिसें ७० म्ह मिजंत।
8 शपत्याहया परिवारं – मिखाएलया काय् जबदियाह व वलिसें ८० म्ह मिजंत।
9 योआबया परिवारं – यहीएलया काय् ओबदिया व वलिसें २१८ म्ह मिजंत।
10 बानीया परिवारं – योसिपियाया काय् शलोमीत व वलिसें १६० म्ह मिजंत।
11 बेबैया परिवारं – बेबैया काय् जकरिया व वलिसें २८ म्ह मिजंत।
12 अज्गादया परिवारं – हक्कातानया काय् योहानान व वलिसें ११० म्ह मिजंत।
13 अदोनीकामया परिवारं – लिपा वःपिं एलीपेलेत, यीएल, शमायाह व इपिंलिसें ६० म्ह मिजंत।
14 बिग्वैया परिवारं – उत्तै व जक्कूर, अले इपिंलिसें ७० म्ह मिजंत।
15 जिं थुपिं फुक्कसित अहावापाखे न्ह्याइगु खुसिया सिथय् मुंका, अले जिपिं स्वन्हु तक पाल ग्वयाः अन च्वना। जिं अन पुजाहारीत व फुक्क मनूतय्त ध्यान बियाः स्वयाबलय् छम्ह नं लेवी मखना।
16 अथे जुयाः जिं नायःत एलीएजर, अरीएल, शमायाह, एल्नातान, यारीब, एल्नातान, नातान, जकरिया व मशुल्लाम अले निम्ह बुद्धि दुपिं मनूत योयारीब व एल्नातानयात सःतके छ्वया।
17 जिं इमित कासिपिया धाःगु थाय्या लेवीतय् नायः इद्दोयाथाय् छ्वया। जिं इमित इद्दो व देगलय् सेवा याइपिं, वया थःलाःपिन्त झी परमेश्वरया देगलय् सेवाया ज्या यायेत मनूत छ्वया हजि धकाः धयाछ्वया।
18 झी परमेश्वरयागु दया मायां इमिसं जिमिथाय् इस्राएलया काय् लेवीया सन्तान महली परिवारयाम्ह सःस्यूम्ह छम्ह लेवी शरेबियाह, वया काय्पिं व दाजुकिजापिं नाप फुक्कं यानाः झिंच्याम्ह मिजंतय्त छ्वयाहल।
19 इमिसं मरारीया परिवारपाखें हशब्याह व यशयाहनापं वया दाजुकिजा व काय्चापिं यानाः मुक्क निइम्ह मिजंत नं छ्वयाहल।
20 देगलय् सेवा याइपिं २२० म्ह नं वल। लेवीतय्त ग्वाहालि बीपिं थज्याःपिं मनूत तयेगु चलन जुजु दाऊद व वया हाकिमतय्सं शुरु याःगु खः। थुपिं सकलें धलखय् नां दुथ्याःपिं खः।
21 जिपिं झी परमेश्वरया न्ह्यःने क्वमिलु जुइत व याउँक यात्राया निंतिं अले लँय् थः मस्त व थःगु सामानयागु रक्षाया निंतिं बिन्ति यायेत जिं अन अहावा खुसिया सिथय् अपसं च्वनेगु घोषणा याना।
22 जिं जुजुयात, “जिमि परमेश्वरं वय्कःयाके भलसा तइपिं सकसितं सुवाः बियादी अले वय्कःयात त्वःतूपिं मनूतय्के वय्कःया तं दयाच्वनी” धकाः धाये धुंकूगु जुयाः आः जिमित लँय् शत्रुतपाखें रक्षा यायेत जुजुयाके सलगइपिं सिपाइँत फ्वनेत जि मछाल।
23 थ्व हे खँयात कयाः जिपिं अपसं च्वनाः थः परमेश्वरयात बिन्ति याना, अले वय्कलं जिमिगु बिन्ति न्यनादिल।
24 अले जिं मू पुजाहारीतपाखें झिंनिम्हय्सित अर्थात शरेबियाह, हशब्याह व इमि झिम्ह दाजुकिजापिन्त ल्यया।
25 अले जुजु, वया सल्लाहबीपिं व वया भारदारत अले बेबिलोनय् च्वनिपिं सकल इस्राएलीतय्सं झी परमेश्वरया देगःया निंतिं ब्यूगु लुँ, वहः व थलबल लनाः जिं इमित बिया।
26 थुकथं जिं इमित
27 लुँयागु निइगः ख्वल्चात- ९ किलोग्राम ति,
28 जिं इमित धया, “छिपिं परमप्रभु झी पुर्खाया परमेश्वरया निंतिं पवित्रपिं खः। अथे हे वय्कःयात थःगु इच्छां देछाःगु लुँ व वहःयागु थलबल नं पवित्र खः।
29 उकिं छिमिसं थुपिं ज्वलं यरूशलेमय् परमप्रभुया देगःया कोथाय् मू पुजाहारीत, लेवीत व इस्राएलीतय् नायःतय् न्ह्यःने लनाः इमित मब्युतले छिमिसं थुपिं फुक्क ज्वलंया रक्षा या।”
30 थुकथं लनातःगु लुँ, वहः व थलबल पुजाहारीत व लेवीतय्सं यरूशलेमया झी परमेश्वरया देगलय् यंकेत थःगु जिम्माय् काल।
31 न्हापांगु लाया झिंनिन्हु खुन्हु यरूशलेमय् वनेत जिपिं अहावा खुसिं न्ह्यावना। जिमि परमेश्वर जिपिंलिसें दी अले वय्कलं यात्राय् शत्रुत व दाखुँतपाखें बचय् यानादिल।
32 यरूशलेमय् थ्यने धुंकाः स्वन्हु तक जिमिसं आराम कया।
33 अले प्यन्हु खुन्हु वहः व लुँ अले उपिं थलबल झी परमेश्वरया देगलय् लनाः उरियाहया काय् मरेमोत पुजाहारीया जिम्माय् बिया। वलिसें पीनहासया काय् एलाजार व निम्ह लेवीत येशूअया काय् योजाबाद व बिन्नूईया काय् नोअदिया दु।
34 फुक्क मालसामान ल्याः खात, अले फुक्क तौल अबलय् हे च्वल।
35 अनंलि ज्वनायंकाः लित छ्वयाहःपिन्सं इस्राएलया परमेश्वरया निंतिं होमबलि छाल। फुक्क इस्राएलया निंतिं झिंनिम्ह (१२) द्वहं, गुइखुम्ह (९६) भ्याःचा व न्हयेन्हय्म्ह (७७) चिधिकःपिं भ्याःचा अले पापबलिकथं झिंनिम्ह दुगुचा छाल। थ्व फुक्क परमप्रभुया निंतिं होमबलि खः।
36 अले इमिसं जुजुयागु आज्ञा-पौ जुजुया हाकिमत अले यूफ्रेटिसया पच्छिमयापिं राज्यपालतय्त बिल। अनंलि इमिसं मनूतय्त व परमेश्वरया देगःया ज्याय् ग्वाहालि बिल।