1 थ्व फुक्क ज्या यायेधुंकाः नायःत जिथाय् वयाः धाल, “इस्राएलयापिं मनूत, पुजाहारीत व लेवीतय्सं नं थः जःलाखःला कनानी, हित्ती, परिज्जी, यबूसी, अम्मोनी, मोआबी, मिश्री व एमोरीतय्गु घच्चाइपुगु पुजायागु ज्यापाखें थःत अलग तःगु मदुनि।
2 इस्राएलयापिं मिजंतय्सं मेगु जातियापिं मिस्तलिसें ब्याहा यानाच्वंगु दु। थुकथं परमेश्वरया पवित्र जाति स्यनावंगु दु। अले थ्व अपराधय् न्ह्यलुवा जुयाः यंकूगुलिइ मू नायःत व हाकिमत थुपिं हे खः।”
3 थ्व खँ न्यनेवं जिं थःगु लं व गा खुना, छेनय् च्वंगु सँ व दाह्री पुया। अले तसकं वातां जुयाः फ्यतुना।
4 अले ज्वनायंकाः लित छ्वयाहःपिन्सं याःगु अपराधया कारणं इस्राएलया परमेश्वरयागु वचनपाखें ग्याःपिं सकल मनूत जिथाय् मुंवल। सन्ध्याया बां बीगु इलय् तक जि अथे हे वातां जुयाः च्वनाच्वना।
5 सन्ध्याया बां बीगु इलय् जि दना। जिगु लं व गा गूगु दु। अले पुलिं चुयाः परमप्रभु झी परमेश्वरपाखे थःगु ल्हाः ल्ह्वनाः
6 थथे धकाः प्रार्थना याना –
7 जिमि पुर्खातय्गु इलंनिसें थौं तक हे जिमिसं तःधंगु पाप यानागु दु। जिमिगु पापं यानाः जिपिं, जिमि जुजु व पुजाहारीत विदेशी जुजुपिनिगु ल्हातय् लात। जिपिं मध्ये गुलिंसित स्यात, गुलिंसित ज्वनाः विदेशय् यंकल। जिमित लुटपाट यात, तसकं क्वह्यंकल, बेइज्जत यात। थौं तक नं अथे हे जुयाच्वंगु दु।
8 “तर थौं छुं ईया निंतिं, परमप्रभु झी परमेश्वर, छिं जिमित दया यानाः छुं मनूतय्त बचय् यानाः जिमित थःगु पवित्र थासय् छगू बल्लाःगु थाय् बियादीगु दु। थुकथं छि जिमि परमेश्वरं जिमिगु मिखाय् जः अले जिपिं दास जुयाच्वनागु इलय् भतिचा आराम बियादीगु दु।
9 जिपिं दासत जूसां झी परमेश्वरं जिमित व हे अवस्थाय् त्वःतामदी। छिगु कारणं फारसयाम्ह जुजुं जिमित ग्वाहालि याःगु दु। थ्व छिं जिमित न्हूगु जीवन बियादीगु थें खः। छिं जिमित छिगु देगः दय्केबिल अले जिमित यहूदा व यरूशलेमय् आराम बियादिल।
10 “आः हे, जिमि परमेश्वर, थुलि जुइ धुंकाः जिमिसं छु धायेगु? छिं बियादीगु आज्ञा जिमिसं मानय् यानागु मदु।
11 छिं थः दास अगमवक्तातपाखें थथे धयादीगु दु, ‘छिमिसं अधिकार यायेत वनेत्यंगु देश अनयापिं मनूतय्गु अशुद्ध ज्या व घच्चाइपुगु ज्यां यानाः अशुद्ध जूगु दु। इमिसं देशयागु छगू कुन्चांनिसें मेगु कुन्चा तक थःगु अशुद्ध ज्यां जाय्काब्यूगु दु।
12 उकिं छिमिसं थः म्ह्याय्पिन्त इमि काय्पिंलिसें व छिमि काय्पिन्त इमि म्ह्याय्पिंलिसें ब्याहा यानाबी मते। छिमिसं गुबलय् नं इपिं लिसे स्वापु तये मते, छिमिसं थ्व उजं पालन यात धाःसा छिपिं बल्लाइ अले छिमिसं थ्व देशयागु भिंगु भिंगु नसा नइ। अले थ्व देश छिमि सन्तानयागु अधिकारय् न्ह्याबलें दयाच्वनी।’
13 “जिमिगु मभिंगु ज्या व तःधंगु दोषया कारणं जिमिसं दुःख स्यूगु जूसां छि, जिमि परमेश्वरं जिमित दयेमाःगु सजाँय स्वयाः कम सजाँय बियादिल। अले छिं जिमि छुं मनूतय्त छेँ लितहयादिल।
14 छु जिमिसं हाकनं छिगु खँ मन्यंसे थज्याःगु घच्चाइपुगु ज्या याइपिंलिसें ब्याहाया स्वापु तयेगु ला? छु छिं तंचायाः छम्ह हे ल्यंमदय्कः नाश यानामदी ला?
15 परमप्रभु इस्राएलयाम्ह परमेश्वर, छि धर्मीम्ह खः। छिं जिमित म्वाका तयादीगु दु। थन जिपिं थःगु दोषनापं छिगु न्ह्यःने दु, खःला थुकिं यानाः जिपिं मध्ये छम्ह नं छिगु न्ह्यःने दने मफये धुंकूगु खः।”