1 अबलय् मोशां वनाः सकलें इस्राएलतय्त थ्व खँ धाल,
2 “थौं जि सछि व निइदँ क्यन। आः जि छिमि न्ह्यलुवाः जुइ फइ मखुत। परमप्रभुं जितः धयादीगु दु, ‘छ यर्दनया उखे वनी मखु।’
3 परमप्रभु छिमि परमेश्वर थः हे छिमिगु न्ह्यःने यर्दनया उखे झाइ। वय्कलं छिमिगु न्ह्यःने इपिं जातितय्त नाश यानादी, अले छिमिसं इमिगु देश त्याकाकाइ। परमप्रभुं धयादीकथं यहोशू नं छिमिगु न्ह्यःने न्ह्यःने यर्दन छिनावनी।
4 एमोरीतय् जुजुत सीहोन व ओग अले इमिगु देशयात नाश यानादीगु थें परमप्रभुं इमित नं नाश यानादी।
5 परमप्रभुं इमित छिमिगु ल्हातय् बियादी अले जिं छिमित बियागु आज्ञाकथं छिमिसं इमित या।
6 बल्ला व साहसी जु। इपिंलिसें ग्याये मते वा थरथर खाये मते। छाय्धाःसा परमप्रभु छिमि परमेश्वर हे छिपिंलिसें झाइ। वय्कलं छिमित गुबलें त्वःतादी मखु, अले त्यागय् यानादी मखु।”
7 अले मोशां यहोशूयात सःताः सकलें इस्राएलीतय् न्ह्यःने वयात धाल, “बल्ला व साहसी जु। छाय्धाःसा परमप्रभुं छिमि पुर्खालिसें बी धकाः पाफयादीगु देशय् थुपिं मनूतलिसें छ हे वनी, अले व देशयात छं इमिगु दथुइ इमिगु सर्बयकथं इनाः बीमाः।
8 परमप्रभु थः हे छंगु न्ह्यःने झाइ, अले छनापं दइ। वय्कलं छन्त गुबलें त्वःतादी मखु अले त्यागय् याइ मखु। ग्याये मते, नुगः क्वतुंके मते।”
9 अले मोशां थ्व व्यवस्था च्वयाः परमप्रभुया बाचाया सनू क्वबिपिं लेवी कुलयापिं पुजाहारीत व इस्राएलयापिं सकलें थकालितय्त बिल।
10 अले मोशां इमित थज्याःगु आज्ञा बिल, “न्हय्दँ न्हय्दँया लिपतय् त्यासा त्वःताबीगु दँय् बल्चाबाय्या नखःबलय्
11 वय्कलं ल्ययादीगु थासय् परमप्रभु छिमि परमेश्वरया न्ह्यःने सकल इस्राएलीत मुनीबलय् इपिं फुक्कसिनं ताय्क छिमिसं थ्व व्यवस्था ब्वनेगु या।
12 मिजं व मिसा, मस्त व छिमि शहर दुने च्वनाच्वंपिं परदेशीत फुक्कसित मुंकि, अले इमिसं न्यनाः परमप्रभु छिमि परमेश्वरया भय कायेगु व थ्व व्यवस्थाया फुक्क वचन बांलाक मानय् यायेगु सय्केमाः।
13 यर्दनया उखे छिमिसं अधिकार यायेत वनेत्यंगु देशय् च्वंतले थ्व व्यवस्था मस्यूपिं छिमि काय् म्ह्याय्पिन्सं नं न्यनाः परमप्रभु छिमि परमेश्वरयागु भय कायेगु सय्केमाः।”
14 अले परमप्रभुं मोशायात धयादिल, “स्व, छ अप्वः म्वाइ मखुत। छं यहोशूयात सःति, अले छिपिं निम्हं नापलायेगु पालय् वा, अन जिं वयात ज्या ब्वये।” अथे जुयाः मोशा व यहोशू नापलायेगु पालय् वन।
15 अले परमप्रभु पवित्र पालय् छगू सुपाँय्या थामय् खनेदय्कः झाल। व सुपाँय् पवित्र पालयागु लुखाया च्वय् दित।
16 अले परमप्रभुं मोशायात धयादिल, “छिमि पुर्खा थें छ सिनावने त्यंगु दु। छ सिनावने धुंकाः थुपिं मनूत देशय् दुहां वने धुंकाः व्यभिचारी थें जितः पत्याः मयाइपिं जुइ, इमिसं अन मेपिं द्यःतय्त पुजा याइ। इमिसं जितः त्वःताः जिं इपिंलिसें चिनागु बाचा त्वाथुली।
17 उखुन्हु जि इपिंलिसें तसक्कं तंचाये, जिं इमित त्वःताबी, थःगु ख्वाः इपिंपाखें सुचुके, अले इपिं न्हनावनी। इमिके तसक्कं ग्यानपुस्से च्वंगु विपत्ति वइ। अले उखुन्हु इमिसं धाइ, ‘झी परमेश्वर झीगु दथुइ मदयाः हे झीत थज्याःगु विपत्ति वःगु, मखु ला?’
18 मेपिं द्यःतपाखे वनाः इमिसं याःगु फुक्क मभिं ज्यां यानाः उखुन्हु धात्थें हे जिं थःगु ख्वाः सुचुके।
19 “आ छं थ्व म्ये च्वयाः इस्राएलीतय्त स्यं अले इमित हाय्कि। इमिगु विरोधय् थ्व म्ये जिगु निंतिं छगू साक्षी जुइमा।
20 इमि पुर्खातलिसें बी धकाः पाफयाः बचं बियागु दुरु व कस्ति न्ह्याइगु देशय् जिं इमित हये। अले अन इपिं प्वाः जाय्क नयाः ल्ह्वनीबलय् इमिसं मेपिं द्यःतय् ल्यू वनाः इमित पुजा याइ, अले जितः त्वःताः जिगु बाचा त्वाथुली।
21 अले यक्व ग्यानपुस्से च्वंगु विपत्तित इमिके वये धुंकाः थ्व म्ये इमिगु निंतिं साक्षी थें जुइ। छाय्धाःसा व इमि सन्तानतय्सं गुबलें ल्वःमंकी मखु। इमित बी धकाः पाफयाः बचं बियागु देशय् हये न्ह्यः हे जिं इमिगु बिचाः थुइके धुन।”
22 अले मोशां उखुन्हु हे थ्व म्ये च्वयाः इस्राएलीतय्त स्यन।
23 परमप्रभुं नूनया काय् यहोशूयात थ्व आज्ञा बियादिल, “बल्ला व साहसी जु छाय्धाःसा जिं बी धकाः पाफयाः बचं बियागु देशय् छं हे इस्राएलीतय्त थ्यंकी। अले जि छनापं हे दइ।”
24 मोशां थ्व व्यवस्थाया वचन शुरुंनिसें लिपा थ्यंक च्वयेधुंकाः
25 परमप्रभुयागु बाचाया सनू क्वबिपिं लेवीया सन्तानतय्त थ्व आज्ञा बिल।
26 “व्यवस्थाया थ्व सफू परमप्रभु छिमि परमेश्वरयागु बाचाया सनूया लिक्क ति। अले व छिमिगु विरोधय् साक्षीकथं अन दयेमाः।
27 छाय्धाःसा जिं छिपिं गुलि विद्रोही व जिराहा धकाः स्यू। जि छिपिंनापं दुबलय् हे छिपिं परमप्रभुया विरोधय् दंगु दु धाःसा जि सी धुंकाः नं छाय् मदनी धकाः?
28 “छिमि कुल कुलयापिं सकलें थकालित व छिमि हाकिमतय्त मुंकि, अले जिं इमित थुपिं वचन धाये। इमिगु विरोधय् जिं स्वर्ग व पृथ्वी साक्षी तये।
29 छाय्धाःसा जि सी धुंकाः छिपिं तसकं स्यनाः जिं हुँ धकाः धयागु लँपु त्वःती धकाः जिं स्यू। छिमिसं परमप्रभुया मिखाय् मभिंगु ज्या याःगुलिं व थःगु ल्हातं दय्कूगु द्यःतय्त पुजा यानाः वय्कःयात तंचाय्कूगुलिं लिपाया इलय् छिमिके विपत्ति वइ।”
30 अले मोशां थ्व म्येया वचन शुरुंनिसें अन्त्य तक इस्राएलया फुक्क खलःयात न्यंकल।