1 मिजंतय् अण्डकोष तज्याःम्ह वा च्वफायेगु चब्बूम्ह मनू परमप्रभुया मुँज्याय् दुहां वने दइ मखु।
2 व्यभिचारं बूम्ह मनू परमप्रभुया मुँज्याय् दुहां वने दइ मखु। झिगू पुस्ता तक इमि सुं नं सन्तान परमप्रभुया मुँज्याय् दुहां वने दइ मखु।
3 अम्मोनी वा मोआबी परमप्रभुया मुँज्याय् दुहां वने दइ मखु। झिगू पुस्ता तक इमि सुं नं सन्तान परमप्रभुया मुँज्याय् दुहां वने दइ मखु।
4 छिपिं मिश्रं वःबलय् इमिसं मरि व लः ज्वनाः लँय् छिमित नापलाः मवः। अले इमिसं अराम-नाहारैमया पतोरय् च्वनीम्ह बओरया काय् बालामयात छिमित सराः बीत धिबा बियाः सःतल।
5 अथे जूसां परमप्रभु छिमि परमेश्वरं बालामयागु खँ मन्यं। वय्कलं व सराःयात सुवालय् हिलादिल, छाय्धाःसा परमप्रभु छिमि परमेश्वरं छिमित माया यानादी।
6 छिपिं म्वानाच्वंतले अम्मोनीत व मोआबीतलिसे सन्धि याये मते अले इमिगु भिं जुइगु ज्या याये मते।
7 एदोमीतय्त धाःसा क्वह्यंके मते। इपिं छिमि दाजुकिजा खः। सुं मिश्रीयात नं क्वह्यंके मते। छाय्धाःसा छिपिं परदेशी जुयाः इमिगु देशय् न्हापा च्वनाच्वंगु खः।
8 इमि स्वंगूगु पुस्ताया सन्तान परमप्रभुया मुँज्याय् दुहां वने दइ।
9 छिपिं थः शत्रुतलिसें ल्वाः वनीबलय् छाउनीइ फुक्क अशुद्ध खँपाखें तापाक्क च्वँ।
10 सुं मिजं म्हगसय्या खं विधिकथं अशुद्ध जूगु दुसा व छाउनीं पिने पिहां वनेमाः अले न्हिच्छि व अन हे च्वनेमाः।
11 सन्ध्याकाः इलय् तक अन च्वने धुंकाः म्वःल्हुयाः निभाः बिनावने धुंकाः व छाउनी दुने वये फइ।
12 छाउनीया पिने झारा च्वनेगु छगूथाय् दयेमाः, अले अन हे झारा च्वनेत वनेगु यायेमाः।
13 गाः म्हुइगु ज्याभः नं ज्वनाः हुँ, अले खि ल्हाका ब्यु।
14 परमप्रभु छिमि परमेश्वर छिमित बचय् यायेत अले छिमिगु निंतिं छिमि शत्रुतय्त बुकेत छिमिगु छाउनीइ चाःहिलादी। अथे जुयाः छिमिगु छाउनी पवित्र जुइमाः। वय्कलं छिमिगु दथुइ घच्चाइपुगु छुं नं मखनेमा, मखुसा वय्कलं छिमित त्वःतादी।
15 मेगु देशं बिस्युं वंम्ह दास छिमिगु शरणय् वल धाःसा वयात वया मालिकया ल्हातय् लःल्हाये मते।
16 वं यय्कूगु थासय् वयात छिमिगु दथुइ च्वनेब्यु। छिमिसं वयात क्वत्यले मते।
17 सुं इस्राएली मिजं वा मिसां देगःया वेश्याया ज्या मयायेमाः।
18 छुं भाकल पूवंकेत छिमिसं मिजं वेश्या वा मिसा वेश्यां कमय् यानाहःगु धिबा परमेश्वरया न्ह्यःने महयेमाः, छाय्धाःसा परमप्रभु छिमि परमेश्वरयात थुपिं निथिं मनूतय्सं कमय् याःगु धिबा मयः।
19 सुं इस्राएली दाजुकिजातय्त ब्याज वइगु धिबा वा नयेगु नसा वा छुं बस्तु त्याःसा बीबलय् ब्याज काये मते।
20 छिमिसं परदेशीयाके ब्याज काये फु, अय्नं थः इस्राएली दाजुकिजातय्के ब्याज काये मते। अथे याःसा छिपिं अधिकार यायेत वनाच्वंगु देशय् परमप्रभु छिमि परमेश्वरं छिमिसं ल्हाः तःगु न्ह्यागु हे ज्याय् नं सुवाः बियादी।
21 छिमिसं परमप्रभु छिमि परमेश्वरया निंतिं भाकल याये धुंकाः व पूवंकेत लिबाके मते। छाय्धाःसा वय्कःयात व पूवंकूगु स्वये यः, मखुसा छिमित पाप लाइ।
22 छिमिसं भाकल याःगु मदुसा छिमित पाप लाइ मखु।
23 छिमिगु म्हुतुं छु पिहां वइ व छिमिसं पूवंके हे माः, छाय्धाःसा परमप्रभु छिमि परमेश्वरयात छिमिसं थःगु इच्छाकथं थःगु हे म्हुतुं भाकल याःगु खः।
24 छिमि जःलाखःलाया दाखक्यबय् जुयाः वन धाःसा नये यःक्व दाख छिमिसं नयेफु, अय्नं थःगु दालाय् तये मते।
25 छिमि जःलाखःलाया बुँइ जुयाः वन धाःसा अन्नया बाला छिमिसं ल्हातं त्वथुला काये फु, अय्नं सयाच्वंगु अन्नमाय् ईंचां लयाः काये मते।