1 इस्राएलया न्हापां बूम्ह काय् रूबेन खः। अय्नं वं थः बाःया छम्ह मथ्याःम्ह कलाःलिसे द्यनाः थः बाःयात हेपय् याःगुलिं न्हापां बूम्ह काय्या अधिकार वया किजा योसेफया काय्पिन्त बिल। उकिं वंशावलीइ रूबेनया नां तःधिकःम्ह काय् कथं च्वयातःगु मदु।
2 यहूदा थः दाजुकिजापिं मध्ये बल्लाःम्ह खःसां अले वया सन्तानपाखें हे शासक वःसां तःधिकःम्ह काय्या अधिकार योसेफयागु हे जुल।
3 इस्राएलया तःधिकःम्ह काय् रूबेनया काय्पिं – हानोक, पल्लु, हेस्रोन व कर्मी खः।
4 योएलया सन्तानतय्गु नां थथे दु – शमायाह योएलया काय् खः। गोग शमायाहया काय् खः। शिमी गोगया काय् खः।
5 मीका शिमीया काय् खः। रायाह मीकाया काय् खः। बाल रायाहया काय् खः।
6 बालया काय् बीरहयात अश्शूरयाम्ह जुजु तिग्लत-पिलेसेरं ज्वना यंकल। बीरह छम्ह रूबेनीतय् नायः खः।
7 वंशावलीइ रूबेन कुलया वंश वंशयापिं नायःत थुपिं खः धकाः च्वयातःगु दु –
8 व बेला। बेला अजाजया काय् खः। अजाज शेमाया काय् खः। शेमा योएलया काय् खः। इपिं अरोएरय् व अनं उत्तरय् नेबो व बाल-मोन तक च्वनीगु खः।
9 गिलादय् इमि सा द्वहंतय्गु ल्याः अप्वया वंगुलिं इमिसं व देशया पुर्बपाखे मरुभूमि तकया छगू इलाका कब्जा यात। मरुभूमि यूफ्रेटिस खुसि तक न्यनावंगु दु।
10 शाऊल जुजु जुयाच्वंबलय् इमिसं लडाइँ यानाः हग्रीतय्त बुकल। अले इमिसं गिलादया पुर्बयागु हग्रीत च्वनीगु देशय् च्वंवन।
11 गादीत रूबेनीतय् लिक्कसं च्वन। गादीत सलका शहर तक हे बाशानय् इमिगु लिक्कसं च्वन।
12 बाशानय् योएल न्हापांम्ह नायः खः, वया लिपायाम्ह नायः शापाम खः। अले यानै व शाफात नायः जुल।
13 परिवारकथं इमि न्हय्म्ह थःथितिपिं थुपिं हे खः – मिखाएल, मशुल्लाम, शेबा, योरै, यकान जीआ व एबेर।
14 इपिं अबीहेलया सन्तान खः। अबीहेल हूरीया काय् खः। हूरी यारोहया काय् खः। यारोह गिलादया काय् खः। गिलाद मिखाएलया काय् खः। मिखाएल यशीशैया काय् खः। यशीशै यहदोया काय् खः। यहदो बूजया काय् खः।
15 गुनीया काय् अब्दीएल खः। अब्दीएलया काय् अही खः। अही इमि परिवारयाम्ह मू मनू खः।
16 इपिं गिलाद व बाशान इलाकाया शहर शहरय् व शारोनयागु फुक्क पशु ज्वयेगु थासय् च्वन।
17 थुपिं सकसिगुं वंशावली यहूदायाम्ह जुजु योताम व
18 रूबेन, गाद व बच्छि मनश्शे कुलय् ढाल, तरवार व धनुष वाण चले यायेगु तालिम काये धुंकूपिं ४४,७६० म्ह सिपाइँत दु।
19 इमिसं हग्रीत, यतूर, नापीश व नोदाबनापं लडाइँ यात।
20 इमिसं ग्वाहालिया लागि परमेश्वरयात प्रार्थना यात। इमिसं परमेश्वरयाके भलसा तःगुलिं वय्कलं इमित ग्वाहालि बियादिल। परमेश्वरं हग्रीत व इपिंनापं मिलय् जूपिं सकसितं इमिगु ल्हातय् लाकादिल।
21 इमिसं इमि नेय्द्वःम्ह ऊँट, निगू लाख व नेय्द्वःम्ह फै व निद्वःम्ह गधा कब्जा यात। अले छगू लाखम्ह मनूतय्त ज्वन।
22 इमिसं यक्व शत्रुतय्त स्यात, छाय्धाःसा थ्व लडाइँलय् परमेश्वर हे इमिगु विरोधय् ल्वानादीगु खः।
23 हानं मनश्शेया बच्छि कुलयापिं मनूत उगु हे देशय् बाशानंनिसें कयाः बाल-हेर्मोन, अथे धइगु सेनीर (हेर्मोन डाँडा) तक च्वन, अले इमिगु ल्याः यक्व दु।
24 इमि परिवारयापिं मू मनूत एपेर, यिशी, एलीएल, अज्रीएल, यर्मिया, होदबिया व यहदीएल खः। थुपिं फुक्क तसकं बल्लाःपिं, नांजाःपिं व इमि परिवारया नायःत खः।
25 तर इमिसं थः पुर्खातय् परमेश्वरया विरोधय् विश्वासघात यात। इमिसं परमेश्वरं नाश यानादीपिं अन च्वंपिं मनूतय् द्यःतय्त पुजा याना हल।
26 उकिं परमेश्वरं अश्शूरयाम्ह जुजु पूलयात (थ्वयात तिग्लत-पिलेसेर धकाः नं धाः) ग्वाकादिल। वं रूबेन, गाद व मनश्शेया बच्छि कुलयापिं मनूतय्त ज्वना यंकल। वं इमित हलह, हाबोर, हारा व गोजान खुसिया सिथय् यंकल, अन इपिं थौं तक नं च्वनाच्वंगु दनि।