1 च लिउँइँ परमेश्वरजी याकूबने बिइ, “रेसि बेथेलर ह्यादु धै चर्न टिद्। क्हिए आघें एसावउँइँले क्हि भौदिरिबै त्हेर क्हि ङाँर म्रोंयुबै परमेश्वरए मिंर ख्रो पिंबै ल्हागिर ख्रो पिंबै क्ल्ह्यो घ्रि चर बनेद्।”
2 छबिमा याकूबइ ह्रोंसए परवा नेरो ह्रोंसने मुँबै ताँन् म्हिमैंने बिइ, “क्हेमैंने मुँबै आगुए देवतामैं ताँन् भ्योंवान् धै क्हेमैं चोखो तसि क्वें फेर्दिद्।
3 झाइले ङ्यो बेथेलर ह्याले। ङए फिर दुःख तबै त्हेर ङए ताँ थेमिंब नेरो ङ खनिर ह्यालेया ङने बालु तमिंबै परमेश्वरए ल्हागिर चर ङइ ख्रो पिंबै क्ल्ह्यो घ्रि बनेब्मुँ।”
4 याकूबए ताँ थेसि चमैंइ ह्रों-ह्रोंसने बालु मुँबै आगुए ह्युलर्बै देवतामैं नेरो ह्रोंसए न्हर खिबै कुण्डलमैं याकूबलाइ पिंइ धै चइ शकेम ङाँर्बै फलाँटए सिंधुँ न्होंर च सैमैं पाइ।
5 छाइले चमैं ह्यामा च खागुबै ह्युलर्बै म्हिमैंइ “चुमैं परमेश्वरए म्हिमैं ग,” बिब् सेसि ङ्हिंइ, छतमा खाबज्यै चमैंलाइ आल्ह।
6 याकूब ह्रोंसए ताँन् म्हिमैंने कनान ह्युलर्बै लूज सहर, अथवा बेथेलर, फेखइ।
7 झाइले चइ चर ख्रो पिंबै क्ल्ह्यो घ्रि बनेसि च क्ल्ह्योए मिं एल-बेथेल थेंइ, तलेबिस्याँ च ह्रोंसए आघें एसावउँइँले भौदिह्याबै त्हेर परमेश्वरजी च क्ल्ह्योर्न खी म्रोंल् पिंइ।
8 चर रिबेकाए केब्स्यो दबोरा सिइ, धै च बेथेल ङाँर्बै फलाँटए सिधुँ न्होंर चमैंइ पाइ। छतसि च क्ल्ह्योए मिं अल्लोन-बकुत थेंइ।
9 याकूब पद्दन-आरामउँइँले एखबै लिउँइँ परमेश्वर धबै च ङाँर म्रोंयुसि चलाइ आशिक पिंइ।
10 परमेश्वरजी चने बिइ, “क्हिए मिं याकूब ग। दिलेया तारे क्हिलाइ याकूब बिरिब् आरे, क्हिए मिं इस्राएल तब्मुँ।” छले चए मिं इस्राएल तइ।
11 परमेश्वरजी चने धबै बिइ, “ङ तोन्दोंरि सै लल् खाँबै परमेश्वर ग। क्हिए सन्तानमैं ल्हें तब्मुँ। क्हिउँइँलेन् ल्हें ह्रेंमैं तखब्मुँ। धै क्हि म्रुँमैंए खे तब्मुँ।
12 अब्राहाम नेरो इसहाकलाइ पिंबै ह्युल ङइ क्हिलाइ पिंब्मुँ। धै क्हिए लिउँइँ खबै सन्तानलाइ ङइ च ह्युल पिंब्मुँ।”
13 झाइले चने ताँ सेबै क्ल्ह्योउँइँले परमेश्वर कैंडो क्रेयाइ।
14 चने बालु परमेश्वर ताँ सेबै क्ल्ह्योर याकूबइ युँमा घ्रि क्योइ। च लिउँइँ चइ चए फिर अँगुरए खुगु नेरो छ्युगु युमिंइ।
15 परमेश्वरजी चने ताँ सेबै क्ल्ह्योए मिं याकूबइ बेथेल थेंइ।
16 चमैं धबै बेथेलउँइँले ह्यामा एप्रात फेखबि छेमा राहेल सुत्केरि बेथा ल्हैदिसि बेल्ले नइ।
17 च सैदिलै आखाँन्ले नमा सुसार लबै च्हमिरिइ चने बिइ, “आङ्हिंन्! क्हिल धबै च्ह घ्रि फिब्मुँ।”
18 दिलेया राहेलइ सो पिबै त्हेर चइ च प्हसेए मिं बेन-ओनि थेंइ। दिलेया याकूबइ बिस्याँ च कोलोए मिं बेन्यामीन थेंइ।
19 छले राहेल सिइ, धै एप्रात अथवा बेथलेहेम ह्याबै घ्याँर चमैंइ पाइ।
20 याकूबइ चए छगोंए फिर त्हो घ्रि क्योइ। चु राहेलए छगोंर्बै त्हो ग। चु तोगो समा मुँ।
21 झाइले याकूब ह्यासि मिग्दल-एदेरए क्योंजा ह्रोंसए तम्बु टौंदिइ।
22 याकूब (इस्राएल) च ह्युलर टिमा चए च्ह थेब रूबेन चए आबाए केब्स्यो बिल्हाने बालु रोइ। चु ताँ याकूबइ थेसि मि धोंलेन् लुँबै ह्रिस खइ।
23 लेआउँइँले च्ह थेब रूबेन, च न्होंर्बै शिमियोन, लेबी, यहूदा, इस्साखार नेरो जबूलून मुँल।
24 राहेलए च्हमैं योसेफ नेरो बेन्यामीन मुँल।
25 राहेलए केब्स्यो बिल्हाउँइँले च्हमैं दान नेरो नप्ताली मुँल।
26 लेआए केब्स्यो जिल्पाउँइँले च्हमैं: गाद नेरो आशेर मुँल। चु ताँन् पद्दन-आरामर फिबै याकूबए च्हमैं ग।
27 याकूब चए आबा इसहाक ङाँर मम्रे बिबै क्ल्ह्योर खइ। (चु क्ल्ह्यो किर्यत-अर्बा नेरो हेब्रोन बिब् ग।) चर अब्राहाम नेरो इसहाक ओंसों टिल।
28 इसहाकए छ्ह प्रसे प्रेच्यु बर्ष तल।
29 छले इसहाकए छ्ह ल्हें तसि सिइ। धै ह्रोंसए खेमैं-मामैंने त्होनेइ। धै चए च्हमैं एसाव नेरो याकूबइ चलाइ पाइ।