1 झाइले इसहाकइ याकूब हुइसि आशिक पिंसि बिइ, “ओ च्हेज्यों, क्हिइ कनानी च्हमिरिमैं खाबै या ब्ह्या आलद्।
2 पद्दन-आराम बिबै ह्युलर ङए कें क्हिए बाज्यु बतूएलए धिंर ह्यासि क्हिए मामा लाबानए च्हमि घ्रि ब्ह्या लद्।
3 तोन्दोंरि सै लल् खाँबै परमेश्वरजी क्हिए फिर आशिक पिंरिगे, धै क्हिइ प्हसेमैं ल्हें योंसि क्हिए सन्तान बेल्ले ल्हें तरिगे। धै क्हि ल्हें ह्रेंमैंए खे तरिगे।
4 क्हि तोगो चुर आगुए ह्युलर टिरिइमुँ, दिलेया परमेश्वरजी चु ह्युल अब्राहामलाइ पिंब् ग। क्हि चु ह्युलर्बै क्ल्हे तरिगे बिसि परमेश्वरजी अब्राहामए फिर पिंबै आशिक क्हि नेरो क्हिए प्हसेंमैंलाज्यै या पिंरिगे।”
5 छबिसि इसहाकइ याकूब कुलइ। धै पद्दन-आराम बिबै ह्युलर एसाव नेरो याकूबए आमा रिबेकाए आघें अरामथें बतूएलए च्ह लाबान ङाँर ह्याइ।
6 इसहाकइ याकूबए फिर आशिक पिंसि प्ह्रेंस्यो पखबर पद्दन-आरामर कुलब नेरो “क्हिइ कनानी च्हमिरिमैं खाबै या ब्ह्या लसि आपखो,” बिबै ताँ एसावइ सेइ।
7 धै आबा-आमाए ताँ ङिंसि याकूब पद्दन-आराम ह्युलइ ह्यान बिबै ताँ या एसावइ सेइ।
8 झाइले “ङए आबाइ कनानी च्हमिरिमैं आखोमन बिबै या एसावइ क्होइ।”
9 छतसि एसाव इश्माएल ङाँर ह्यासि चए च्हमि महलत ब्ह्या लसि पखइ। महलत नबायोतए अङाँ मुँल।
10 याकूब बेर्शेबा नाँस वाथेंसि हारान बिबै ह्युलउँइँ ह्याइ।
11 क्ल्ह्यो घ्रिर फेबै लिउँइँ म्हुँइँस तयाबइले च चर्न टिइ। धै च क्ल्ह्योर्बै युँमा घ्रि किंसि ह्रोंसए क्रेगुँ लसि रोइ।
12 छले रोरिमा चइ छाबै म्होंड म्रोंइ: सउँइँले मु समा ह्याबै लि घ्रि मुँन, चए च्हो मुर्न फेनेब् मुँन। धै परमेश्वरए दूतमैं चर क्रेब माइ तब लमन।याकूबए म्होंडर सने मु स्वर्ग तुँब लिस्नुर स्वर्गदूतमैं ताइने माइ तब|src="co00683c.png" size="col" loc="tr" ref="२८:१२"
13 याहवेह चए रेर रासि याकूबने बिइ, “ङ याहवेह, क्हिए बाज्यु अब्राहामए परमेश्वर नेरो क्हिए आबा इसहाकए परमेश्वर ग। क्हि तोगो रोरिबै क्ल्ह्यो क्हि नेरो क्हिए सन्तानमैं ङइ पिंब्मुँ।
14 क्हिए सन्तानमैं ह्युलर्बै स त्हुल् धोंलेन् ल्हें तब्मुँ। क्हिए सन्तान स्यार (पूर्व) छ्यो-न्हुँ (पश्चिम) च्योंबो (उत्तर) नेरो छ्यो ल्हुइ (दक्षिणाइ) खन्तोंदोंन् ल्हें तदै ह्याब्मुँ। क्हि नेरो क्हिए सन्तानउँइँले ह्युलर्बै ताँन् म्हिमैंइ आशिक योंब्मुँ।
15 ङ क्हिने बालु तब्मुँ। क्हि खनिर ह्यालेया ङइ जोगेमिंब्मुँ। धै क्हिलाइ चु ह्युलर एपखब्मुँ। ङइ क्हिने बिबै बाछा पूरा आलन् समा ङइ क्हि पिरिब् आरे।”
16 झाइले याकूब न्हरुउँइँले छोरसि बिइ, “क्ह्रोंसेंन चु क्ल्ह्योर परमेश्वर मुँन छाबै ताँ ङइ आसेल।”
17 च बेल्ले ङ्हिंसि “चु बेल्ले पबित्र क्ल्ह्यो मुँन! चु परेमेश्वरए धिं मुँन! चु क्ल्ह्यो स्वर्गए म्रा ग मुँन,” बिइ।
18 याकूब न्हाँकर्न रेसि चइ क्रेगुँ लबै युँमा किंसि त्हो धोंले क्योइ, धै चए च्होर छ्युगु युमिंइ।
19 छलसि चइ च क्ल्ह्योए मिं बेथेल थेंइ। ओंसों च क्ल्ह्योए मिं लूज मुँल।
20 च लिउँइँ याकूबइ परमेश्वरने छले भकल लइ, “ओ परमेश्वर ङने बालु क्हि तइ बिस्याँ, प्रबै घ्याँर ङ जोगेमिंइ बिस्याँ, धै ङ चबै क्हें नेरो खिबै क्वें पिंइ बिस्याँ,
21 ङ छेनाले आबाए धिंर एखल् योंइ बिस्याँ, ङए परमेश्वर क्हि तब्मुँ।
22 झाइले ङइ त्हो धोंले क्योथेंबै चु युँमा परमेश्वरए धिं तब्मुँ। धै क्हिजी ङलाइ पिंबै तोन्दोंरि सैमैंउँइँले च्युबाँर्बै तिबाँ ङइ खैलेबिलेन् क्हिए मिंर पिंब्मुँ।”