1 ও আছমান, কান পাতিয়া হুনো আমি যেতা গাই,
2 আমার তালিম লামউক মেঘর ফুটার লাখান,
3 আমি তো এলান করমু আমার মাবুদর নাম,
4 তাইনউ তো আশ্রয় টিল্লা, নিখুত তান কাম,
5 তা-ও তান খবিছ বন্দায় করছে বেইমানি,
6 হায়রে আম্মক নাদান, হায়রে বেআখল,
7 ইয়াদ করো তুমরা হউ আগর আমলর মাত,
8 আল্লাতালায় দিলা যেবলা জমিন বাটিয়া,
9 মাবুদর খাছ সম্পত্তি তো তান নিজর প্রজা,
10 তারারে তাইন তুকাই পাইলা মরুভুমির দেশো,
11 চিলে যেলা নিজর বাদার বাইচ্চারে নাচায়,
12 মাবুদে একলা অউলা করি তারারে নিলা,
13 পাহাড়ে পাহাড়ে উড়াই উড়াই নিলা তারারে,
14 খাবাইলা তারারে তাইন গরুর দুধর দই,
15 বাদে তারা লাথ মারিলা পেটলা বনিয়া,
16 দেব-দেবীর পুজা করিয়া জালাইলো আগুইন,
17 ভুতর নামে বলি দিলো তানরে ছাড়িয়া,
18 জনম দাতা বাফর লাখান যেইন আশ্রয় টিল্লা,
19 আওলাদর অউ হালত দেখিয়া মুখ ফিরাইল্লা মাবুদে,
20 গুছা করি মাবুদে কইলা মুখ ফিরাইলাম আমি,
21 যেটা আল্লা নাই ইলা দেবতার পুজা করিয়া,
22 আমার গুছার আগুইন অখন দাউ দাউ করি জলের,
23 লাখো লাখো বিপদ দিমু হকলতার উপর,
24 উপাসি নিদানে তারা হুকাই হুকাই মরবা,
25 বারে গেলে মরবা তারা তলোয়ারর তলে,
26 কইছলাম আমি উড়াই মারমু বনি ইছরাইলরে,
27 অইলে আমার জানা আছে দুশমনর ভাব-সাব,
28 বিচার-বিবেক খুয়াইয়া অখন নামে ইছরাইল জাতি,
29 আখল থাকলে বুজতো তারার নিজর দুর্দশা,
30 এক দুশমনে আইয়া কিলা আজার জন খেদায়,
31 দুশমনর আশ্রয় টিল্লা অতো মজবুত নায়,
32 মাবুদে বাতাইরা অখন তারার খেতর কথা,
33 আংগুরর শরবত যেলা নাগ-নাগিনির বিষ,
34 আমার গেছে ইতা গজব তুমরার লাগি খাড়া,
35 নাফরমানির সাজা দেওয়া আমারউ কাম,
36 মাবুদে দেখবা যেবলা বল-শক্তি নাই,
37 কইবা তাইন হউ সময় কুয়াই গেলা হিতা,
38 কই গেলা হউ দেব-দেবী যেতায় খাইছলা চর্বি,
39 চিন্তা-ভাবনা করিয়া দেখো হউ তাইনউ আমি,
40 আরশর বায় আত তুলিয়া কছম খাইয়া কই,
41 দার যেবলা দিমু আমার চকচকা তলোয়ার,
42 তীর-ধনুকে লউ খাইয়া করবো মাতলামি,
43 মায়ার প্রজার লগে অইয়া আছমান খুশি অও,
44 মুছা নবী আর তান খাদিম নূনর পুয়া ইউছা গিয়া হকল মানষর গেছে অউ গজলর সব কথা জানাইলা।
45 মুছায় হকল বনি ইছরাইলর গেছে গিয়া ইতা হকলতা কইয়া হারি,
46 কইলা, “আমি অউ যত হুশিয়ারির কথা তুমরারে জানাইছি, ইতা তুমরার দিলো গাথিয়া রাখিও, ইতা তো তুমরার বিরুদ্ধে সাক্ষি বনিয়া রইবো। আর তুমরার আওলাদ অকলরে হুকুম দিও, অউ শরিয়তর হকল হুকুম-আহকাম খিয়ালি অইয়া আমল করতা।
47 ইতা তো আজে-বাজে কুনু মাত-কথা নায়, ইতা অইলো তুমরার জিন্দেগি! জর্দান গাং পার অইয়া হারি তুমরা যে দেশর দখলদারি পাইরায়, অতা আমল করলে হনো তুমরা লাম্বা হায়াতি পাইবায়।”
48 হউ দিনউ মাবুদে মুছা নবীরে কইলা,
49 “তুমি গিয়া অউ আবারীম পাহাড়ো উঠো, ইটা তো মোয়াব দেশর যিরিহো টাউনর ছামনে আছে। হনো উঠিয়া নবো নামর হউ উচা টিল্লার উপরে যাও, আর বনি ইছরাইলরে আমি যে দেশর মালিকানা দিরাম, অউ কেনান দেশ একবার দেখিলাও।
50 তুমার ভাই হারুন যেলা হুর পাহাড়র উপরে উঠিয়া হারলে উফাত অইছিল, বাদে তার বাফ-দাদার কাতারো গিয়া আজিছিল, অউ নবো পাহাড়ো উঠার বাদে অউলা তুমারও উফাত অইবো, আর তুমার বাফ-দাদার গেছে গিয়া অউলাখান তুমিও আজিবায়।
51 মনো আছে নি, হকল বনি ইছরাইলর ছামনে তুমরা দুইও ভাইয়ে আমারে পাক-পবিত্র কইয়া মাইন্য করছো না, হউ জীন মরুভুমির কাদেশ এলাকার মেরীবা নামর জাগাত পানির গেছে তুমরা আমার নামে জালিয়াতি করছলায়।
52 হনো উঠিয়া হারলে তুমার চখুর ছামনে হউ দেশ দেখবায়, যে দেশখান আমি বনি ইছরাইলরে দান কররাম, তুমি খালি চউখদি দেখবায়, অইলে হি দেশো হামাইবার সুযোগ তুমার অইতো নায়।”