1 ϩⲱⲛ ⲉⲣⲟⲓ ⲛϩⲉⲑⲛⲟⲥ ⲛⲧⲉⲧⲛⲥⲱⲧⲙ ⲛⲁⲣⲭⲱⲛ ⲙⲁⲣⲉⲡⲕⲁϩ ⲥⲱⲧⲙ ⲙⲛ ⲛⲉⲧⲟⲩⲏϩ ⲛϩⲏⲧϥ ⲧⲟⲓⲕⲟⲩⲙⲉⲛⲏ ⲙⲛ ⲡⲉⲥⲗⲁⲟⲥ</ab>
2 ϫⲉ ⲡϭⲱⲛⲧ ⲙⲡϫⲟⲉⲓⲥ ⲛⲏⲩ ⲉϫⲛ ⲛϩⲉⲑⲛⲟⲥ ⲧⲏⲣⲟⲩ ⲁⲩⲱ ⲟⲩⲟⲣⲅⲏ ⲉϫⲛ ⲧⲉⲩⲁⲡⲉ ⲉⲧⲁⲕⲟⲟⲩ ⲁⲩⲱ ⲉⲧⲁⲁⲩ ⲉⲡⲕⲟⲛⲥⲟⲩ</ab>
3 ⲛⲉⲩϩⲁⲓⲃⲉⲥ ⲇⲉ ⲙⲛ ⲛⲉⲩⲣⲉϥⲙⲟⲟⲩⲧ ⲛⲁϣⲱⲡⲉ ⲉⲩⲛⲏϫ ⲛⲧⲉⲡⲉⲩⲥⲧⲟⲓ ⲉⲓ ⲉϩⲣⲁⲓ ⲛⲧⲉⲛⲧⲟⲟⲩ ϩⲱⲣⲡ ⲙⲡⲉⲩⲥⲛⲟϥ</ab>
4 ⲛⲧⲉⲧⲡⲉ ϭⲱⲗ ⲛⲑⲉ ⲛⲟⲩϫⲱⲱⲙⲉ ⲁⲩⲱ ⲛⲥⲓⲟⲩ ⲧⲏⲣⲟⲩ ⲛⲁϩⲉ ⲛⲑⲉ ⲛϩⲉⲛϭⲱⲃⲉ ⲛⲉⲣⲡⲱ ⲉⲃⲟⲗ ϩⲛ ⲟⲩⲃⲱ ⲛⲉⲗⲟⲟⲗⲉ ⲁⲩⲱ ⲛⲑⲉ ⲉϣⲁⲣⲉϩⲉⲛϭⲱⲃⲉ ϩⲉ ϩⲛ ⲟⲩⲃⲱ ⲛⲕⲛⲧⲉ</ab>
5 ⲁⲧⲁⲥⲏϥⲉ ϯϩⲉ ϩⲛ ⲧⲡⲉ ⲉⲓⲥ ϩⲏⲏⲧⲉ ⲥⲛⲏⲩ ⲉⲡⲉⲥⲏⲧ ⲉϫⲛ ϯⲇⲟⲩⲙⲁⲓⲁ ⲁⲩⲱ ⲉϫⲙ ⲡⲗⲁⲟⲥ ⲙⲡⲧⲁⲕⲟ ϩⲛ ⲟⲩϩⲱⲡ</ab>
6 ⲁⲧⲥⲏϥⲉ ⲙⲡϫⲟⲉⲓⲥ ⲥⲉⲓ ⲛⲥⲛⲟϥ ⲁⲥⲟⲩⲙⲟⲧ ⲉⲃⲟⲗ ϩⲙ ⲡⲱⲧ ⲛⲛⲉϩⲓⲉⲓⲃ ⲙⲛ ⲡⲱⲧ ⲛⲛϭⲓⲉ ⲙⲛ ⲛⲟⲓⲗⲉ ϫⲉ ⲧⲉⲑⲩⲥⲓⲁ ⲙⲡϫⲟⲉⲓⲥ ϩⲛ ⲃⲟⲥⲟⲣ ⲁⲩⲱ ⲟⲩⲛⲟϭ ⲛⲕⲱⲛⲥ ϩⲛ ϯⲇⲟⲩⲙⲁⲓⲁ</ab>
7 ⲁⲩⲱ ⲛϭⲓⲉ ⲛⲁϩⲉ ⲛⲙⲙⲁⲩ ⲙⲛ ⲛⲟⲓⲗⲉ ⲙⲛ ⲙⲙⲁⲥⲉ ⲁⲩⲱ ⲡⲕⲁϩ ⲛⲁϯϩⲉ ϩⲙ ⲡⲉⲩⲥⲛⲟϥ ⲁⲩⲱ ϥⲛⲁⲥⲓ ϩⲙ ⲡⲉⲩⲱⲧ</ab>
8 ⲡⲉϩⲟⲟⲩ ⲅⲁⲣ ⲙⲡϩⲁⲡ ⲙⲡϫⲟⲉⲓⲥ ⲁⲩⲱ ⲧⲉⲣⲟⲙⲡⲉ ⲛⲧⲱⲱⲃⲉ ⲙⲡⲥⲓⲱⲛ ⲁⲥⲟⲩⲉⲓⲛⲉ ⲉϫⲱⲟⲩ</ab>
9 ⲁⲩⲱ ⲛⲉⲥⲉⲓⲁ ⲛⲁⲕⲟⲧⲟⲩ ⲉⲩⲗⲁⲙϫⲁⲧⲡ ⲁⲩⲱ ⲡⲉⲥⲕⲁϩ ⲉⲩⲑⲏⲛ ⲁⲩⲱ ⲡⲉⲥⲕⲁϩ ⲛⲁϣⲱⲡⲉ ⲉϥⲙⲟⲩϩ ⲛⲑⲉ ⲛⲟⲩⲗⲁⲙϫⲁⲧⲡ</ab>
10 ⲛⲧⲉⲩϣⲏ ⲙⲛ ⲡⲉϩⲟⲟⲩ ⲁⲩⲱ ⲛϥⲛⲁⲱϣⲙ ⲁⲛ ϣⲁ ⲉⲛⲉϩ ⲛⲟⲩⲟⲉⲓϣ ⲁⲩⲱ ⲡⲉⲥⲕⲁⲡⲛⲟⲥ ⲛⲁϫⲓⲥⲉ ⲉⲧⲡⲉ ⲥⲛⲁϣⲱϥ ϣⲁ ϩⲉⲛϫⲱⲙ ⲛⲥⲣϫⲁⲓⲉ ⲉⲩⲛⲟϭ ⲛⲟⲩⲟⲉⲓϣ</ab>
11 ⲁⲩⲱ ⲛϩⲁⲗⲁⲧⲉ ⲛⲁⲟⲩⲱϩ ⲛϩⲏⲧⲥ ⲙⲛ ⲛⲉϩⲃⲱ ⲙⲛ ⲛⲉϩⲓⲃⲱⲓ ⲙⲛ ⲛⲁⲃⲟⲟⲕⲉ ⲁⲩⲱ ⲥⲉⲛⲁⲥⲱⲣ ⲉϫⲱⲥ ⲛⲟⲩⲛⲟⲩϩ ⲛϣⲓⲉⲓⲱϩⲉ ⲛϫⲁⲓⲉ ⲁⲩⲱ ⲛϩⲟⲛⲟⲕⲉⲛⲧⲁⲩⲣⲟⲥ ⲛⲁⲟⲩⲱϩ ⲛϩⲏⲧⲥ</ab>
12 ⲛⲉⲥⲁⲣⲭⲱⲛ ⲛⲁϣⲱⲡⲉ ⲁⲛ ⲛⲉⲥⲉⲣⲣⲱⲟⲩ ⲅⲁⲣ ⲙⲛ ⲛⲉⲥⲁⲣⲭⲱⲛ ⲛⲁϣⲱⲡⲉ ⲉⲩⲧⲁⲕⲟ</ab>
13 ⲁⲩⲱ ⲛϣⲁⲩ ⲛϣⲟⲛⲧⲉ ⲛⲁⲣⲱⲧ ϩⲣⲁⲓ ϩⲛ ⲛⲉⲥⲡⲟⲗⲓⲥ ⲙⲛ ⲛⲉⲥⲙⲁ ⲉⲧϫⲟⲥⲉ ⲛⲥϣⲱⲡⲉ ⲛⲉⲣⲥⲱ ⲛⲛⲥⲓⲣⲏⲛⲟⲥ ⲁⲩⲱ ⲛⲟϩⲉ ⲛⲛⲉⲥⲧⲣⲟⲩⲑⲟⲥ</ab>
14 ⲁⲩⲱ ⲛⲇⲁⲓⲙⲟⲛⲓⲟⲛ ⲛⲁⲧⲱⲙⲛⲧ ⲉⲛϩⲟⲛⲟⲕⲉⲛⲧⲁⲩⲣⲟⲥ ⲛⲥⲉϫⲓϣⲕⲁⲕ ⲉⲃⲟⲗ ⲟⲩⲁ ⲛⲁϩⲣⲉⲛ ⲟⲩⲁ ⲉⲣⲉⲛϩⲟⲛⲟⲕⲉⲛⲧⲁⲩⲣⲟⲥ ⲛⲁⲙⲧⲟⲛ ⲙⲙⲟⲟⲩ ⲙⲙⲁⲩ ⲁⲩϩⲉ ⲅⲁⲣ ⲉⲩⲙⲟⲧⲛⲉⲥ ⲛⲁⲩ</ab>
15 ⲛⲧⲁⲧⲉϩⲃⲱ ⲥⲁⲁⲛϣ ⲙⲙⲁⲩ ⲛⲛⲉⲥϣⲏⲣⲉ ⲁⲩⲱ ⲁⲡⲕⲁϩ ⲧⲟⲩϫⲟ ⲛⲛⲉⲥϣⲏⲣⲉ ϩⲛ ⲟⲩⲱⲣϫ ⲛⲧⲁⲛⲓⲟⲩⲗ ⲧⲱⲙⲛⲧ ⲙⲙⲁⲩ ⲁⲩⲛⲁⲩ ⲉⲡϩⲟ ⲛⲛⲉⲩⲉⲣⲏⲩ</ab>
16 ⲁⲩⲉⲓ ⲉⲃⲟⲗ ϩⲛ ⲟⲩⲏⲡⲉ ⲙⲡⲉⲟⲩⲁ ⲙⲙⲟⲟⲩ ⲥⲱⲣⲙ ⲙⲡⲉⲟⲩⲁ ϣⲓⲛⲉ ⲛⲥⲁ ⲟⲩⲁ ϫⲉ ⲡϫⲟⲉⲓⲥ ⲡⲉⲛⲧⲁϥϩⲱⲛ ⲉⲧoⲟⲧⲟⲩ ⲁⲩⲱ ⲡⲉϥⲡⲛⲉⲩⲙⲁ ⲡⲉⲛⲧⲁϥϩⲟⲟⲩϩⲟⲩ</ab>
17 ⲁⲩⲱ ⲛⲧⲟϥ ⲡⲉⲛⲧⲁϥⲛⲟⲩϫⲉ ⲛⲁⲩ ⲛϩⲉⲛⲕⲗⲏⲣⲟⲥ ⲁⲩⲱ ⲧⲉϥϭⲓϫ ⲧⲉⲛⲧⲁⲥⲡⲱϣ ⲛⲁⲩ ⲉⲙⲟⲟⲛⲉ ϣⲁ ⲉⲛⲉϩ ⲛⲟⲩⲟⲉⲓϣ ⲛⲧⲉⲧⲛⲕⲗⲏⲣⲟⲛⲟⲙⲉⲓ ⲛϩⲉⲛϫⲱⲙ ⲛϫⲱⲙ ⲁⲩⲱ ⲥⲉⲛⲁⲙⲧⲟⲛ ⲙⲙⲟⲟⲩ ⲉϫⲱⲥ</ab>