1 مَا ثسّْنذْ مڒْمِي تَّارْونْثْ
2 مَا ثْزمَّارذْ أَذْ ثْحسْبذْ
3 نِيثنْثِي تّقْوِيسنْثْ،
4 محْضنْ إِمژْيَاننْ نْسنْثْ،
5 مَانْ ونْ يَارْخُونْ إِ وغْيُوڒْ ن ڒخْڒَا
6 نشّْ وْشِيغْ أَسْ ثَانزْرُوفْثْ ذ ثَادَّارْثْ،
7 نتَّا إِضحّشْ
8 جّْوَايهْ ن إِذُورَارْ
9 مَا أَذْ إِخْسْ إِغَايْضْ ن ڒخْڒَا
10 مَا ثْزمَّارذْ أَذْ ثْمنْعذْ
11 مَا ثتّْشَاڒذْ خَاسْ،
12 مَا أَذْ خَاسْ ثتّشْڒذْ
13 أَفْرِيونْ ن نّْعَامثْ شَّاثنْ س ڒْخَاضَارْ.
14 مَاغَارْ ثتّجَّا ثِيمدْجَاڒِينْ نّسْ
15 ثتّتُّو أَقَا إِجّْ ن ؤُضَارْ
16 نتَّاثْ ثْقسّحْ ذڭْ إِمژْيَاننْ نّسْ
17 مَاغَارْ أَربِّي إِجَّا إِ-ت أَذْ ثتُّو ثِيغِيثْ،
18 مَاشَا مَاڒَا ثكْسِي ذڭْ ؤُضَارْ نّسْ،
19 مَا ثْزمَّارذْ أَذْ ثوْشذْ جّهْذْ إِ ؤُيِيسْ؟
20 مَا ثْزمَّارذْ أَذْ ث يَارّْ إِنطُّو
21 خبّْشنْ إِيْسَانْ س إِضَارنْ نْسنْ
22 إِضحّشْ خْ مَارَّا مِينْ إِسَّاڭّْوَاذنْ،
23 إِتّْقَارْقُوبْ وقْرَابْ ن فْڒِيثْشَاثْ
24 س دّْرِيزْ ن ثْشضْيِينْ ذ زّْعَامثْ
25 غَارْ ثْمِيجَّا ن ؤُسُوضِي ذڭْ ؤُيِيشّْ ن إِشَارِّي
26 مَا إِطَّاوْ ڒْبَازْ زِي ڒفْهَامثْ نّشْ،
27 مَا إِسّْڭعَّاذْ ؤُڭِيذَارْ إِخفْ نّسْ
28 إِزدّغْ ؤُ إِسّْنُوسَا خْ جَّارْفْ،
29 سّنِّي إِحطَّا زَّارْذثْ،
30 إِمژْيَاننْ نّسْ سكّْفنْ إِذَامّنْ