1 तुमरो मन बैचेन नोको होय, तुम्हि परमेस्वर पर भरोसा राखिसो, मोरो पर भी भरोसा राखो।
2 मोरो बाबूजी को घर मा लगत सा रव्हन को जघा सेत, अदी नही होतो ता मि तुम्हिला सांग देतो। काहे की मि तुमरो लाय जघा तैय्यार करन जावासू।
3 अना अदी मि जायके तुमरो लाई जघा तैय्यार करासू, ता मंग आयके तुमला आपरो सँग ले जाहुँ। की जिता मि रव्हुसु, उतच तुम्हि भी रव्हो।
4 अना जिता मि जावनो पर सेव, तुम्हि उता को रास्ता ला जानासेव।
5 थोमा ना कहीस, हे पिरभू हमला मालूम नहाय, का तु किता जावसेस। ता रास्ता कसो जानबोन?
6 यीसु ना ओला कहीस, रास्ता, खराई अना जीवन मिच आव। मोरो बगर कोनी बाबूजी को जवर नही जाय सका।
7 अदी तुमी मोला जानने, ता मोरो बाबूजी ला भी जानने। पर अब तुम्हि ओला जान गयो सेव अना चोवासो।
8 फिलिप्पुस ओला कव्हसे, हे पिरभू! बाबूजी ला हमला चोवा। याच हमरो लाई लगत से।
9 यीसु ना ओला कहीस, हे फिलिप्पुस, मि एतरो दिवस तकन तुमरो जवर रहयो, अना का तु मोला नही जानासे? एको लाई जोन ना मोला चोय लियो ओना बाबूजी ला चोय लेइसेस। तु कायलाय कव्हसेत की बाबूजी ला हमला चोवाय?
10 का तोला भरोसा नहात? का मि बाबूजी मा सेव अना बाबूजी मोरो मा से, यो गोस्टी जोन तुमी लक कव्हसु आपरो आपच लक नही कव्हसू पर बाबूजी जोन मोरो मा से, आपरो काम करासे।
11 मोरोच भरोसा करो की मि बाबूजी मा सेव अना बाबूजी मोरो मा से। नही ता काम लक च मोरो भरोसा करो।
12 यीसु ना उनला खरो साँगीस, जोन मोरो पर भरोसा करासे, जसो काम मि करासू, वसोच काम उ भी करेत, वरन ओको लक भी मोठो काम करेत।
13 मि तुम्हि लोकगीन लक खरोखर कव्हसू-अना जोन काही तुम्हि मोरो नाव लक माँगने ता वा पूरो होहेत। जोनलक मोरो लक बाबूजी की महिमा होहे।
14 अदी कोनी बात ला तुम्हि लोकगीन मोरो नाव लक माँगो ता मि ओला करहुँ।
15 अदी तुमी मोरो लक माया राखने ता मोरी हुकूम ला मानने
16 मि बाबूजी लक बिनती करुहुँ अना उ तुमला एक अखीन सहारा देहे की उ सदा तुमरो सँग रहे
17 मजे खराई को आतमा, जेनला ना तो जगत अपनाव सकासे, ना ओला जानासे, काहे की उ तुमरो संग च रव्हासे अना तुममा च होहे।
18 मि तुमला फिरतहा नहि छोड़ू, मि तुमरो जवर आवासेऊ।
19 जरासो देर मंघा यो जगत मोला नही चोवहे। पर तुमी मोला चोवहो, एको लाई की मि जित्तो सेव, तुमी भी जित्तो रव्हो।
20 उ दिवस तुमी जानने की मि आपरो बाबूजी मा सेव, अना तुम्हि मोरो मा सेव अना मि तुमरो मा सेव।
21 जोनो को जवर मोरो हुकूम सेत अना उ ओला मानासे। वाच मोरो लक माया राखासे, अना मी ओको लक माया राखुँ। अना आपरो आप ला ओको पर परगट करुह।
22 एक यहूदा नाव को चेला जो इस्करियोति नही होतो, ओला कहीस, “हे पिरभू, का भयो का तु आपरो आप ला हमि पर दिखान चाव्हासेस अना जगत पर नही।”
23 यीसु ना जवाब देईस, अदी कोनी मोरो लक माया राखेह, ता उ मोरो सबद ला मानेह। अना मोरो बाबूजी ओको लक माया राखेह, अना हमि ओको जवर आवबिन अना ओको सँग रव्हबिन।
24 जोन मोरो माया नही राखा, उ मोरो गोस्टी ला नही मानासे अना जोन गोस्टी तुमीना आयकीसेव, उ मोरो नही पर बाबूजी को से, जोनना मोला धाड़िसेस।
25 यो गोस्टी मिना तुमरो सँग रहतो बखत कव्हसू।
26 पर जबा उ सहायक मजे पवीतर आतमा आहेत, जोनला बाबूजी मोरो नाव लक धाडे़त, उ तुम लोकगीन ला सबच गोस्टी सिखाहे। अना सब काही हेत कराहे, जोनला मिना कहीसेउ।
27 मि तुमला सान्ती देय के जासू, आपरो सान्ती तुमला देवासु। जसो जगत देसे वसो मि तुमला नही देहुँ, तुमरो मन बेचैन नोको होयेत, अना नोको डराव।
28 तुमी आयकासेव का मिना तुमला कव्हयो होतो, मि जावासू अना तुमरो जवर मंग आहू, अदी तुम्हि माया राखिसेव तो यो गोस्टी लक खुस होवो की मि बाबूजी को जवर जावासू, अना बाबूजी मोरो लक मोठो से।
29 मिना तुमला असो होवनो को पुढा कव्ह देइसेव, की जबा उ भय जाहे, ता तुमी भरोसा करहो।
30 मि अबा तुमरो सँग अखीन गोस्टी नही करू। काहे का यो जगत को अधिकारी आवासे, मोरो पर ओको काही हक नही।
31 पर यो एकोलाय होवासे, की जगत जानेह की मि बाबूजी लक माया राखासू, अना जसो बाबूजी ना मोला हुकूम देइसेस वसोच करूसू, उठो, यहान लक चलो।