1 बोअज शहरया ध्वाखाय् वनाः च्वनाच्वन। छुं ई लिपा वं धाःम्ह एलीमेलेकया सतिक थःलाःम्ह मनू थ्यंकः वल। अले बोअजं वयात धाल, “पासा, थन वयाः फ्यतु।” व बोअजया न्ह्यःने वनाः फ्यतुल।
2 बोअजं शहरयापिं झिम्ह थकालितय्त नं सःताः धाल, “थन फ्यतुनादिसँ,” अले इपिं फ्यतुल।
3 वं व सतिक थःलाम्ह मनूयात धाल, “मोआबं लिहां वःम्ह नाओमीं झी दाजु एलीमेलेकया बुँ छकू मीत स्वयाच्वंगु दु।
4 थुपिं थकालितय्गु न्ह्यःने व बुँ छिं कयादिसँ धकाः छिलिसें खँ ल्हायेगु बिचाः याना। व बुँ छिं न्यायेगु खःसा थुपिं मनूतय्गु न्ह्यःने न्याये धकाः धयादिसँ। छिं व बुँ न्याये मखुसा जितः धयादिसँ, छाय्धाःसा व बुँ न्यायेत छिगु ल्यू हक दुम्ह मनू जि हे खः।”
5 अले बोअजं धाल, “नाओमी व मोआबी रुथपाखें बुँ न्याःगु न्हिइ छिं व सी धुंकूम्हय्सिगु नां व सम्पत्ति ल्यंकातयेत सी धुंकूम्हय्सिया कलाः नं कायेमाः।”
6 थ्व खँ न्यनाः व मनुखं धाल, “अथे खःसा जिं न्याये मखु छाय्धाःसा जिगु थःगु सम्पत्ति नं नाश जुइफु। छिं न्यानादिसँ, जिं न्याये मखु।”
7 उबलय् जमिन व सम्पत्ति न्यायेमिइ वा हिलाबुला याइबलय् मिइम्हय्सिनं थःगु लाकां त्वयाः न्याइम्हय्सित बीगु चलन दुगु जुयाच्वन। इस्राएलय् खँ क्वःछीगु विधि थथे हे खः।
8 उकिं व मनुखं, “व बुँ छिं थःम्हं हे न्यानादिसँ” धकाः धयाः बोअजयात थःगु लाकां त्वयाः बिल।
9 अले बोअजं अन दुपिं थकालित व मेपिं मनूतय्त धाल, “थौं जिं किल्योन, महलोन व एलीमेलेकयागु फुक्क सम्पत्ति नाओमीया ल्हातं न्यायेधुन धइगु खँया साक्षी छिकपिं दु।
10 जिं महलोनया कलाः मोआबी रुथयात नं सी धुंकूम्ह मनूया सम्पत्तिनापं वयागु नां तया तयेत वयागु नां वया थःथितितय्गु दथुइ वा शहरया धलखय् दयाच्वनेमा धकाः जिं कलाःकथं कयागु दु।”
11 अले थकालित व अन दुपिन्सं धाल, “जिपिं साक्षी जुल। छिगु छेँय् वइम्ह थ्व मिसायात परमप्रभुं इस्राएलया घराना दय्कूपिं राहेल व लेआ थें यानादीमा। एप्राताय् छितः हनाबना दयेमा अले बेथलेहेमय् छिगु नां जायेमा।
12 परमप्रभुं छितः थ्व ल्याय्म्हम्ह मिसापाखें बियादीम्ह सन्तानया परिवार यहूदापाखें तामारं बुइकूम्ह पेरेसया परिवार थें जुइमा।”
13 थुकथं बोअजं रुथयात ब्याहा यानाः छेँय् हल। परमेश्वरं वयात सुवाः बियादिल। अले वया प्वाथय् दयाः काय् दत।
14 अले मिस्तय्सं नाओमीयात धाल, “परमप्रभु धन्यम्ह खः। छाय्धाःसा थौं वय्कलं छितः छम्ह सतीम्ह थः मदय्क त्वःतामदी। इस्राएलय् वयागु नां जायेमा।
15 थ्व मचा छितः न्हूगु जीवन बीम्ह व छि बुरा जुइबलय् छितः स्वइम्ह जुइ। छाय्धाःसा न्हय्म्ह काय्पिं स्वयाः भिंम्ह, छितः माया याइम्ह भौनं थ्व मचा बुइकूगु खः।”
16 नाओमीं व मचायात ज्वनाः थःगु मुलय् तल अले वं वयात बिचाः यात।
17 वया जःलाखःलातय्सं धाल, “नाओमीया छम्ह काय् दत। झीसं वयागु नां ओबेद धकाः तयेनु।” व हे यिशैया बौ व दाऊदया बाज्या खः।
18 पेरेसया वंश धलः थथे दु –
19 हेस्रोनया काय् आराम खः।
20 अम्मीनादाबया काय् नहशोन खः।
21 सल्मोनया काय् बोअज खः।
22 ओबेदया काय् यिशै खः।