1 अले परमप्रभुं यहोशूयात धयादिल, “ग्याये मते, नुगः क्वतुंके मते! फुक्क सेना ज्वनाः ऐ शहरय् हमला या हुँ। ऐयाम्ह जुजु, वया प्रजा, वयागु शहर व वयागु देशयात जिं छंगु ल्हातय् बियागु दु।
2 छं यरीहो व वया जुजुयात छु छु यानागु खः, ऐ व वया जुजुयात नं अथे हे या। अनयागु धनमाल व अनयापिं पशुत धाःसा छिमिसं थःगु निंतिं काये फइ। शहरया ल्युने हमला यायेत सुला च्वँ।”
3 उकिं यहोशू फुक्क सेनालिसें ऐनापं ल्वाः वन। वं बांलाक ल्वायेफुपिं स्विद्वः सिपाइँत ल्ययाः इमित चान्हय् हे छ्वल।
4 वं इमित थथे धकाः उजं बिल, “स्व, छिपिं व शहरया ल्युने हमला यायेत सुला च्वँ। शहरं यक्व तापाक्क वने मते। छिपिं सकल होश यानाच्वँ।
5 जिनापं दुपिं मनूतलिसें जि शहरपाखे न्ह्यज्याये। न्हापा थें इपिं जिपिंलिसें ल्वायेत वइबलय् जिपिं न्हापा थें इमिगु न्ह्यःनेनं बिस्युं वने।
6 इमिसं झीत ल्यू वइ व झीसं इमित शहरं यक्व तापाक्क पित हये, छाय्धाःसा इमिसं धाइ, ‘न्हापा थें इस्राएलीत झीगु न्ह्यःनेनं बिस्युं वनाच्वंगु दु।’ उकिं जिपिं इमिगु न्ह्यःनेनं बिस्युं वनेबलय्
7 छिमिसं सुलाच्वंगु थासं वनाः शहरयात त्याका का, छाय्धाःसा परमप्रभु छिमि परमेश्वरं छिमिगु ल्हातय् व बियादी।
8 शहर त्याकाकाइबलय् छिमिसं उकियात मिं छ्वय्काब्यु। परमप्रभुं धयादी थें छिमिसं या। जिगु उजं छिमिके दु।”
9 अले यहोशूं इमित छ्वल। इपिं वनाः ऐयागु पच्छिमपाखे बेथेल व ऐयागु दथुइ सुलाच्वन। यहोशू धाःसा उखुन्हु चान्हय् मनूतनापं च्वन।
10 यहोशू सुथ न्हापां दन, सिपाइँतय्त मुंकाः इस्राएलीतय् नायःतनापं इमिगु न्ह्यः न्ह्यः ऐपाखे वन।
11 इपिंनापं दुपिं सकलें सिपाइँत शहरया न्ह्यःने वल। इपिं ऐयागु उत्तरपाखे बाय् च्वन। इमिगु व ऐ शहरयागु दथुइ ब्यासि दु।
12 यहोशूं न्याद्वः ति सिपाइँतय्त शहरयागु पच्छिमपाखे बेथेल व ऐयागु दथुइ हमला यायेत सुचुका तल।
13 इमिसं मू सेनायात उत्तरपाखे व सुलाच्वंपिन्त धाःसा पच्छिमपाखे तल। उखुन्हु चान्हय् यहोशू धाःसा ब्यासिइ हे च्वन।
14 ऐयाम्ह जुजुं थ्व खंबलय् व अले उगु शहरयापिं सकले मिजंत सुथ न्हापां दनाः हथाय् चाचां इस्राएलीतलिसे ल्वायेत वन, अले अराबा खनेदइगु क्वछिनातःगु थासय् थ्यंकः वन। शहरया ल्युने थःपिंनापं ल्वायेत मनूत सुलाच्वंगु दु धइगु खँ वं मसिल।
15 यहोशू व सकल इस्राएलीत इमिगु न्ह्यःने बिस्युं वंपिं थें यानाः मरुभूमिपाखे ब्वाँय् वन।
16 ऐ शहरयापिं मनूतय्त लिनाछ्वयेत सकल इस्राएली मिजंतय्त सःतल। अले यहोशूयात ल्यूल्यूं इपिं शहरं यक्व तापाक थ्यन।
17 ऐ व बेथेलयापिं फुक्क मिजंतय्सं इस्राएलीतय्त ल्यू वन। इमिसं शहरयात ह्वातां त्वःताः इस्राएलीतय्त ल्यू वन।
18 अले परमप्रभुं यहोशूयात धयादिल, “छंगु ल्हातय् दुगु भाला ऐपाखे न्ह्यज्याकि, छाय्धाःसा जिं व शहरयात छंगु ल्हातय् तयाबी।” अथे जुयाः यहोशूं थःगु भाला ऐपाखे न्ह्यज्याकल।
19 वं थथे यायेवं उपिं सुलाच्वंपिं सिपाइँत थःगु थासं दनाः न्ह्यज्यात। इमिसं शहर दुने दुहां वनाः उकियात त्याका काल। अले हथासं शहरयात मिं छ्वय्काबिल।
20 ऐयापिं मिजंतय्सं ल्युने फस्वःबलय् शहरया कुँ आकाशपाखे वनाच्वंगु खंकल। इपिं थुखे उखे गन नं बिस्युं वने मफुत। छाय्धाःसा मरुभूमिपाखे बिस्युं वंपिं इस्राएलीत लिहां वयाः न्हापां थःपिन्त ल्यूवःपिं ऐयापिन्त हमला यात।
21 यहोशू व सकल इस्राएलीतय्सं उपिं सुलाच्वंपिन्सं शहरयात त्याकाकाःगु व शहरं कुँ पिहां वयाच्वंगु खंबलय् इमिसं लिहां वयाः ऐयापिं मिजंतय्त स्यात।
22 लँय् हमला यायेत सुलाच्वंपिं सिपाइँत नं शहरं पिहां वल। थथे गुलिं इमिगु थुखे व गुलिं उखेपाखे जुयाः इपिं इस्राएलीतय्गु दथुइ लात। व इस्राएलीतय्सं छम्हय्सित नं मत्वःतुसें सकसितं स्यानाबिल।
23 ऐयाम्ह जुजुयात धाःसा इमिसं ज्वनाः यहोशूयाथाय् हल।
24 इस्राएलीतय्सं ऐयापिं सकल मिजंतय्त थःपिन्त ल्यूगु मरुभूमिया ख्यलय् स्याये धुंकाः सकल इस्राएलीत ऐ शहरय् लिहां वल, व अन दुपिं सकसितं हे स्यात।
25 उखुन्हु ऐयापिं फुक्क मनूतय्त, झिंनिद्वः मिसा-मिजंतय्त स्यानाबिल।
26 ऐ शहरय् च्वनिपिं फुक्क नाश मजुतले यहोशूं भाला ऐपाखें स्वय्कातल।
27 परमप्रभुं यहोशूयात धयादी थें इस्राएलीतय्सं व शहरयापिं सा द्वहं व लाकाकाःगु माल थःगु हे निंतिं क्वबिया यंकल।
28 थथे यहोशूं ऐ शहरयात मि छ्वय्काः भस्म यानाबिल। व थौं तक नं झिजांमिजां जुयाच्वंगु दु।
29 वं ऐयाम्ह जुजुयात छगू थामं सुयाबिल अले वयात सन्ध्याकाः ई तक हे अन तया तल। सूर्य बिनावंगु इलय् वं वयागु म्हयात थामं क्वकयाः शहरयागु ध्वाखाया क्वय् वांछ्वयाबिल। इमिसं सीम्ह च्वय् ल्वहंयागु द्वं मुंकाबिल। व थौं तक द हे दनि।
30 अले यहोशूं परमप्रभु इस्राएलया परमेश्वरया लागिं एबाल डाँडाय् छगू वेदी दय्कल,
31 परमप्रभुया दास मोशां इस्राएलीतय्त ब्यूगु उजंकथं नयागु ज्याभलं मथ्यूगु ल्वहंतय्गु छगू वेदी दय्कल। उकी इमिसं परमप्रभुयागु निंतिं होमबलि व मेलबलि छाल।
32 यहोशूं इस्राएलीतय्गु न्ह्यःने मोशां च्वःगु व्यवस्थाया नक्कल ल्वहँतय् च्वल।
33 इस्राएलीतय्त सुवाः बीमा धकाः परमप्रभुया दास मोशां न्हापा हे उजं ब्यू थें परदेशी, स्वदेशी, सकल इस्राएली, इमि नायःत, हाकिमत व न्याय याइपिंनापं परमप्रभुयागु बाचा चिनादीगु सनू क्वबिपिं लेवी पुजाहारीतय्गु न्ह्यःने सनूया निखेपाखे बच्छि एबाल डाँडाया लिक्क व मेपिं बच्छि गीरीज्जीम डाँडाया लिक्क दन।
34 अनंलि यहोशूं व्यवस्थाया फुक्क खँग्वः, सुवाः व सराः, व्यवस्थाया सफुलिइ गथे च्वयातःगु खः छतिं मपाक ब्वन।
35 मोशां उजं ब्यूगु फुक्क खँ छगू नं मत्वतुसें मिस्त, काय्म्ह्याय्पिं, इपिंलिसें च्वनिपिं परदेशीत व इस्राएलयापिं फुक्क खलःयात यहोशूं ब्वना न्यंकल।