1 “छं लिव्यातन्यात बल्छीं सालाः लिकाये फु ला?
2 छं वयागु न्हासय् प्वाः खनाः खिपः तये फु ला?
3 वं छन्त दयाया लागि बिन्ति याइ ला?
4 व सदां छिम्ह दास जुयाच्वने धकाः
5 झंगःपन्छियात लहिनातः थें छं वयात लहिनातये फु ला?
6 छु! व्यापारीतय्सं वयागु निंतिं भाः याइ ला?
7 छं वयागु छेंगुलिइ भालां सुइगु ला,
8 छं थःगु ल्हाः वयागु विरोधय् ल्ह्वन धाःसा
9 वयात अधीनय् हयेगु आशा ज्यालगय् मजू।
10 वयात हाय्केगु सुयाकें साहस मदुगुलिं जिगु न्ह्यःने दने फुम्ह सु दइ?
11 सुनां जितः ब्यूगु दु धकाः जिं वयात लित बीत?
12 “न जि वयागु ल्हाःतुतिया बारे सुम्क च्वने,
13 सुनां वयागु पिनेयागु वसः त्वके फु?
14 सुनां वयागु म्हुतुया लुखा चाय्केगु साहस याइ?
15 वयागु जँन्हुफा ढालतय्गु झ्वः थें च्वं।
16 थुपिं ढाल छगूनापं मेगु यक्व लिक्क दु,
17 थुपिं ढाल छगूनापं मेगु बल्लाक स्वानाच्वंगु दु।
18 वं हाच्छिउँ याइबलय् जः प्वालाक्क च्याइ,
19 वयागु म्हुतुं मिप्वाः
20 मिया द्यःने दासि वयाच्वंगु कराही तः थें
21 वयागु सासलं झन ह्यंग्वाःयात च्याकाबी।
22 वयागु गःपतय् वयागु बल दु।
23 वयागु ला कस्सीक स्वानाच्वंगु दु,
24 वयागु छाति ल्वहं थें छाः।
25 व दनीबलय् बहादुर मनूत नं ग्याइ।
26 तरवार वा भाला, चुपि वा नँयागु कथिं वयात सुल धाःसां
27 वं नँयात छ्वालि थें ताय्की।
28 वाणं वयात बिसिके छ्वये फइ मखु।
29 सिँग्वः वयागु निंतिं सु छपु थें जक जुइ।
30 वयागु प्वाथय् च्वामुगु चिज दु थें च्वं।
31 वं तज्जाःगु समुद्रयात कराहीया लः थें दायेकी।
32 वं लखय् थःगु ल्युने ज्वाल्लच्वंगु चिं त्वःती।
33 पृथ्वीइ व थें मग्याःम्ह
34 वं मेपिं फुक्क जिराहातय्त क्वह्यंका स्वइ।