1 जिं स्वया, करूबतय्गु छ्यंया च्वय्यागु गुम्बजय् नीलमया सिंहासन थें छुं खनेदत।
2 परमप्रभुं सुतिया वसः फिनातःम्ह मनूयात धयादिल, “करूबतय्गु क्वय् दुगु घःचाःया दथुइ हुँ। उपिं करूबतय्गु दथुइ दुगु च्यानाच्वंगु हेंग्वाः छम्हु ल्हातय् कयाः शहरय् ह्वलाब्यु!” अले जिं स्वयाच्वनाबलय् हे व दुहां वन।
3 व मनू दुहां वंबलय् करूबत धाःसा देगःया दच्छिनय् दनाच्वंगु खः। सुपाँचं दुनेयागु चुक जाल।
4 परमप्रभुया महिमा करूबतय्गु च्वय्नं देगःया लुखाखलुइ वन। देगः सुपाँचं जाल अले चुक धाःसा परमप्रभुया महिमाया ज्वाल्लच्वंगु जलं जाल।
5 करूबतय्गु पपूया सः पिनेया चुकय् तक ताये दु। व सः दक्व शक्ति दुम्ह परमेश्वर नवानादीबलय् ताये दइगु सः थें च्वं।
6 परमप्रभुं व सुतिया वसः पुनातःम्ह उम्ह मनूयात थथे आज्ञा बियादिल, “उपिं करूबतय्गु दथुइ वनाः घःचाःया दथुं भचा च्यानाच्वंगु हेंग्वाः का!” अले व दुहां वनाः घःचाःया लिकसं दन।
7 अले छम्ह करूबं थःगु ल्हाः मेपिं करूबतय्गु दथुइ दुगु मिइ न्ह्यःज्याकल, अले अनं भचा हेंग्वाः कयाः सुतिया वसः पुनातःम्ह मनूया ल्हातय् व तयाबिल। व मनू हेंग्वाः ज्वनाः पिहां वल।
8 (उपिं करूबतय् पपूया क्वय् मनूया ल्हाः थें छुं खने दु।)
9 अले जिं स्वया, जिं करूबतय्गु लिक्क प्यचा घःचाः दुगु खना, छम्ह छम्ह करूबया लिक्क छचा छचा घःचाः दु। उपिं घःचाःत प्वालप्वाल थीगु पुखराज थें खने दु।
10 स्वय्बलय् उपिं प्यचा हे घःचाः उत्थें उत्थें च्वं, छचा घःचाःया दुने मेगु घःचाः दुगु थें च्वं।
11 इपिं वनीबलय् करूबत स्वःगु प्यंगू दिशा मध्ये छगू दिशापाखे इपिं वनीगु। उपिं वनीबलय् लिफः स्वइ मखु। उपिं करूबत वनीबलय् इमिगु छ्यं गुखेपाखे स्वःगु खः, उपिं नं उखेपाखे हे लिफः मस्वसें वनीगु।
12 इमिगु म्ह छम्हं, इमिगु जँ, ल्हाः, पपू व उपिं प्यचां घःचाः नं फुक्क मिखाया मिखां जाःगु दु।
13 उपिं घःचाःयात “हुरुरुरु चाःहिलिगु घःचाः” धाःगु जिं ताल।
14 छम्ह छम्ह करूबया पेपा पेपा ख्वाः दु। न्हापांगु ख्वाः करूबयागु, निगूगु ख्वाः मनूयागु, स्वंगूगु ख्वाः सिंहयागु व प्यंगूगु ख्वाः इमायागु थें च्वं।
15 अले उपिं करूबत च्वय् च्वय् थाहां वन। थुपिं जिं कबार खुसि सिथय् खनापिं म्वाःपिं प्राणीत हे खः।
16 उपिं करूबत थुखे उखे वनीबलय् उमिगु लिक्कया घःचाःत नं इपिंलिसें वनीगु। करूबतय्सं जमिनं च्वय् थाहां वनेत थःगु पपू चक्कंकीबलय् उपिं घःचाःत करूबतय्गु लिक्कं चिलावनी मखु।
17 उपिं करूबत दीबलय् उपिं घःचाःत नं दी, उपिं च्वय् थाहां वनीबलय् घःचाःत नं च्वय् थाहां वनी, छाय्धाःसा उपिं प्राणीतय्गु आत्मा उमिके दु।
18 परमप्रभुया महिमा देगःया लुखाखलुं पिहां वनाः करूबतय्गु च्वय् दित।
19 अले जिं बांलाक स्वयाबलय् उपिं करूबत थथःगु पपू चक्कंकाः जमिनं च्वय् च्वय् थाहां वन। इपिं वंबलय् उपिं घःचाःत नं इपिं नापनापं च्वय् थाहां वन। अले इपिं परमप्रभुया देगःया पुर्बपाखेया मू ध्वाखाय् दित। इस्राएलया परमेश्वरया महिमा इमिगु च्वय् दु।
20 कबार खुसि सिथय् इस्राएलया परमेश्वरया क्वय् जिं खनापिं उपिं म्वाःपिं प्राणीत थुपिं हे खः। इपिं करूबत खः धकाः जिं सिल।
21 इपिं फुक्कसिके प्यपा प्यपा ख्वाः व प्यपा प्यपा पपू दु, उपिं पपूया क्वय् मनूयागु थें ल्हाः दु।
22 इमिगु ख्वाः जिं कबार खुसि सिथय् खनागु ख्वाः थें हे च्वं। इपिं फुक्कं तप्यंक वनीगु।