1 छिमिगु दथुइ सुं अगमवक्ता वा म्हगसय् म्हनीम्ह मनू वयाः छिमित छुं चिं वा अजू चाइपुगु ज्या जुइगु खँ कन धाःसा
2 अले वं धाःगु चिं व अजू चायापुगु ज्या जुइ धुंकाः “छिमिसं म्हमस्यूपिं द्यःतय्गु ल्यू वनाः इमित पुजा याये नु” धकाः वं धाल धाःसा
3 छिमिसं व अगमवक्ता वा म्हगसय् म्हनीम्ह मनूयागु खँ न्यने मते। व ला परमप्रभु छिमि परमेश्वरं छिमिसं थःगु प्राणं वय्कःयात माया या कि मया धकाः मन स्वयादीगु खः।
4 छिपिं परमप्रभु छिमि परमेश्वरयागु जक ल्यूल्यू वनेमाः। वय्कःया भय कायेमाः। वय्कःया खँ न्यँ, वय्कःया आज्ञा मानय् या, वय्कःयात सेवा या, अले वय्कःयात त्वःते मते।
5 व अगमवक्ता वा म्हगसय्या खँ कनीम्ह मनूयात स्याना हे छ्वयेमाः। छाय्धाःसा वं छिमित दासत्वया देश मिश्रं पित हयादीम्ह परमप्रभु छिमि परमेश्वरं आज्ञा बियादीगु लँपुपाखें हीकाः वय्कःया विरोध यायेगु स्यनेत कुतः यात। छिमिसं थज्याःगु मभिंगु ज्या छिमिगु दथुं चीकाः छ्वयेमाः।
6 छिमि थः हे दाजुकिजा, काय्म्ह्याय्, कलाः वा मिलय् जूम्ह पासां “छिमिसं व छिमि पुर्खातय्सं म्हमस्यूपिं द्यःतय्त पुजा याये नु” धकाः छिमित हेय्कल धाःसा
7 इपिं छिमिगु जःखः च्वनिपिं मनूतय् द्यःत जुइमा वा तापापिं जुइमा अले देशया छगू कुन्चाय्निसें मेगु कुन्चा तकयापिं जुइमा
8 व हेय्कूम्हय्सिगु खँ न्यने मते! छिमिसं वयात दया याये मते, छिमिसं वयात त्वःते मते वा वयात रक्षा याये मते!
9 व मनूयात स्याना हे छ्व! वयात स्यायेत वयागु खँ न्यंम्ह मनुखं दकलय् न्हापा ल्वहँतं कय्केमाः। अले लिपा सकलें मनूतय्सं ल्वहँतं कय्केमाः।
10 वयात ल्वहँतं कय्काः स्यायेमाः, छाय्धाःसा वं छिमित दासत्वया देश मिश्रं पित हयादीम्ह परमप्रभु छिमि परमेश्वरपाखें हीकाः मेखेपाखे यंकेगु कुतः यात।
11 थथे जूगुलिं सकल इस्राएलीत थ्व खँ न्यनाः ग्याइ, अले थज्याःगु मभिंगु ज्या छिमिगु दथुइ गुबलें याइ मखु।
12 परमप्रभु छिमि परमेश्वरं छिमित च्वनेत बियादीगु गुगुं शहरय्
13 छिमिगु दथुं मभिंपिं पिहां वयाः थःगु शहरयापिं मनूतय्त “इमिसं न्हापा म्हमस्यूपिं द्यःतय्त पुजा याये नु” धकाः हेय्कूगु दु धइगु खँ छिमिसं न्यनेदत धाःसा
14 छिमिसं बांलाक न्यनेकने या, उकियात दुवालाः स्व। अले अज्याःगु घच्चाइपुस्से च्वंगु ज्या धात्थें जूगु खःसा अले दसि लुल धाःसा
15 छिमिसं व शहरय् च्वंपिं मनूतय्त तरवारं स्यानाछ्व, अले व शहरयात नाश यानाब्यु। अन दुपिं सा द्वहं नापं फुक्कसित तरवारं स्यानाछ्व।
16 अनयागु फुक्क मालसामान शहरया लाछिइ मुंकाः व शहर व मालसामानयात छ्वय्काब्यु। परमप्रभु छिमि परमेश्वरयागु निंतिं व होमबलि थें जुइ। व शहर न्ह्याबलेंया लागि भस्म जुया हे च्वनेमाः। उकियात हानं दय्के मते।
17 थथे देछाय् मज्यूगु छुं नं यंके मते। थथे याःसा परमप्रभुया तं क्वलानाः वय्कलं छिमित दया माया यानाः छिमि पुर्खालिसें पाःफयादीगु थें छिमिगु ल्याः अप्वः दय्काबी।
18 परमेश्वरयागु वचन न्यनाः थौं जिं धयाकथं वय्कःया फुक्क आज्ञा मानय् यात वा परमप्रभु छिमि परमेश्वरयात यःगु ज्याखँयात धाःसा थ्व जुइ।