1 परमप्रभुया देगः व थःगु दरबार दय्केत सोलोमनं निइदँ बीकल।
2 हीरामं थःत ब्यूगु शहरत सोलोमनं हाकनं दय्काः इस्राएलीतय्त अन तल।
3 सोलोमनं हमात-सोबाय् हमला यानाः उकियात त्याका काल।
4 वं मरुभूमिइ दुगु तदमोर शहरयात व हमातय् थःम्हं दय्कूगु धुकू तइगु फुक्क शहरयात हाकनं दय्कल।
5 वं च्वय्च्वंगु बेथ-होरोन व क्वय् च्वंगु बेथ-होरोनयात नं पखालं घेरय् यानाः उकी ध्वाखा व खगःत तयाबिल।
6 अले सोलोमनं बालात व वयागु धुकू तइगु फुक्क शहरत अले थः रथ व सल तइगु फुक्क शहर दय्कल।
7 व देशय् इस्राएली मखुपिं छुं मनूत नं च्वनाच्वंगु जुयाच्वन। थुपिं हित्ती, एमोरी, परिज्जी, हिव्वी व यबूसीत खः।
8 थुपिं इस्राएलीतय्सं मस्याःपिं जात जातियापिनि सन्तान खः। थुमित सोलोमनं दासयात थें ज्या याकल। थौं तक नं इपिं अथे हे दु।
9 तर सोलोमनं सुं नं इस्राएलीयात थ्व ज्याया लागि दास मदय्कू। इमिसं सिपाइँ, हाकिम, रथ व रथय् च्वनिपिं सिपाइँतय् कप्तान जुयाः ज्या याइगु।
10 सोलोमन जुजुं इपिं मध्ये निसः व नेय्म्हय्सित मनूतय्गु ज्या स्वइपिं नायः जुइत ल्यल।
11 सोलोमनं मिश्रयाम्ह जुजुया म्ह्याय् थः रानीयात दाऊदया शहरं च्वय् वयागु निंतिं दय्कूगु दरबारय् हल। सोलोमनं धाल, “जिमि कलाः दाऊदया दरबारय् च्वने फइ मखु, छाय्धाःसा बाचाया सनू दुगु थाय् पवित्रथाय् खः।”
12 अले सोलोमनं देगःया न्ह्यःने दय्कूगु वेदीइ परमप्रभुयात होमबलि छाल।
13 मोशाया आज्ञा कथं विश्रामबार पतिकं, अमाइ पतिकं व क्वःछिनातःगु नखःबलय् दँय् स्वक्व अथे धइगु– सोडा मतःगु मरिया नखःबलय्, समाज्याया नखःबलय् व बल्चाबाय्या नखःबलय् वं बलि छायेगु यात।
14 दाऊदं आज्ञा ब्यू थें वं पुजाहारीतय्त सेवाया ज्या यायेत पुचः पुचः यानाः पलिस्था यात। लेवीतय्त नं इमिगु प्रशंसा याय्गु ज्या व न्हियान्हिथं पुजाहारीतय्त ग्वाहालि बीगु ज्या बियातःगु दु। वं ध्वाखा पिवाःतय्गु ज्या याइपिं पुचः पुचःकथं तयातःगु दु। सोलोमनं परमेश्वरया मनू दाऊदं आज्ञा ब्यू थें फुक्क अथे हे यानातःगु दु।
15 धुकू कोथा व मेमेगु खँया बारे दाऊदं पुजाहारी व लेवीतय्त ब्यूगु फुक्क आज्ञा इमिसं मानय् याइगु।
16 थुकथं परमप्रभुया देगःया जग तःबलय्निसें व सिमधःतले सोलोमनया फुक्क ज्या जुया हे च्वन। थुकथं परमप्रभुया देगः दय्कूगु खः।
17 अनंलि सोलोमन एदोम देशया लाल समुद्रया सिथय् लाःगु एस्योन-गेबेर व एलात शहरय् वन।
18 हीराम जुजुं थः हाकिमत व अनुभव दुपिं जहाजीतनापं वयाथाय् जहाजत छ्वयाहल। सोलोमनया हाकिमतनापं इपिं ओपीर देशय् वन अले अनं झिंन्हय्गू टन स्वयाः यक्व लुँ हयाः सोलोमन जुजुयात बिल।