1 योशियाह च्यादँ दुबलय् जुजु जूगु खः। वं यरूशलेमय् स्विछदँ राज्य यात।
2 वं परमप्रभुया मिखाय् भिंगु ज्या यात। व थुखे उखे मवंसें थः पुर्खा दाऊदया लँपुइ वन।
3 योशियाह जुजु जूगु च्यागूगु दँय्, व ल्याय्म्हबलय् वं थः पुर्खा दाऊदया परमेश्वरयात माल। अले झिंनिगूगु दँय् यहूदा व यरूशलेमय् दुगु पुजा याइगु थाय् व अशेरा द्यःमय्जुया थांत अले कियाः दय्कातःगु व ढलोटया मूर्तित चीकल।
4 जुजुया आज्ञा कथं वया मनूतय्सं बालद्यःया वेदीत थुनाबिल। इमिसं अशेरा द्यःमय्जुया थांत व मेपिं द्यःतय्गु मूर्तित धू यानाः उपिं द्यःतय्त बलि बीपिं मनूतय्गु चिहानय् ह्वलाबिल
5 वं इमि पुजाहारीतय्गु क्वँय् नं इमिगु हे वेदीइ छ्वय्काबिल। थुकथं वं यहूदा व यरूशलेमयात शुद्ध यात।
6 वं मनश्शे, एफ्राइम, शिमियोन व नप्तालीत कयाः शहर शहर व जःखः च्वंगु तहसनहस जूगु गांगामय् च्वंगु वेदीत व अशेरा द्यःमय्जुया थां स्यंकाबिल।
7 अशेरा द्यःमय्जुया थांत व वेदीत वं चुंचुं यानाः धू दय्कल। इस्राएल न्यंक दुगु धुपाँय् च्याकेगु वेदीत वं नाश यात। अनंलि व यरूशलेमय् लिहां वल।
8 योशियाह थः जुजु जूगु झिंच्यागूगु दँय् देश व देगःयात शुद्ध यायेधुंकाः वं असल्याहया काय् शापान व यरूशलेमया वडा-हाकिम मासेयाह व योआहाजया काय् सरकारया ल्याःचाः तइम्ह योआयात परमप्रभु वया परमेश्वरया देगः ल्ह्वनेत छ्वल।
9 इपिं दकलय् तःधंम्ह पुजाहारी हिल्कियाहथाय् वनाः परमप्रभुया देगलय् हःगु धिबा वयात लःल्हाना बिल। थ्व धिबा लुखा पिवाःया ज्या याइपिं लेवीतय्सं मनश्शे, एफ्राइम, यहूदा, व बेन्यामीन कुलयापिन्सं व फुक्क इस्राएलय् ल्यंदुपिं मनूतय्सं व यरूशलेमय् च्वंपिं मनूतपाखें मुंकातःगु खः।
10 वं व ध्यबा परमप्रभुया देगः ल्ह्वनेगु ज्या स्वइपिं मनूतय्गु जिम्माय् बिल। इमिसं व धिबा देगः ल्ह्वनेगु व भिंकेगु ज्या याइपिं ज्याकःमितय्त बिल।
11 इमिसं यहूदाया जुजुपिन्सं वास्ता मयासें त्वःतातःगु छेँत ल्ह्वनेत, चानातःगु ल्वहं, धलिं व निनाः न्यायेत नं सिकःमि व दकःमितय्त नं धिबा बिल।
12 थुपिं मनूतय्सं विश्वास यायेबहः जुयाः ज्या यात। इमिसं मरारी वंशया लेवीत यहत व ओबदिया अले कहातया वंशया जकरिया व मशुल्लामया अधीनय् ज्या यात। थुपिं लेवीत बांलाक बाजं थाये सःपिं खः।
13 ज्यामित नं थुमिगु अधीनय् खः। थुमिसं हे फुक्क कथंया ज्या याइपिनिगु ज्या स्वइगु खः, गुलिं गुलिं लेवीतय्सं धाःसा छ्यान्जे, कसजु व लुखा पिवाःया ज्या याइगु।
14 परमप्रभुया देगलय् हःगु धिबा इमिसं लिकयाच्वंबलय् पुजाहारी हिल्कियाहं परमप्रभुं मोशापाखें बियादीगु परमेश्वरया व्यवस्थाया सफू लुइकल।
15 हिल्कियाहं छ्यान्जे शापानयात धाल, “जिं परमप्रभुया देगलय् व्यवस्थाया सफू लुइकागु दु।” अले हिल्कियाहं व सफू शापानयात बिल।
16 शापानं व सफू जुजुयाथाय् हयाः थथे धाल, “छःपिन्सं बियादीगु फुक्क ज्या छःपिंया हाकिमतय्सं यानाच्वंगु दु।
17 इमिसं परमप्रभुया देगलय् दुगु धिबा कयाः ज्या स्वइपिं व ज्याकःमितय्त ब्यूगु दु।”
18 पुजाहारी हिल्कियाहं वयात छगू सफू ब्यूगु खँ नं छ्यान्जे शापानं जुजुयात कनाबिल। वं जुजुया न्ह्यःने व सफू ब्वनाः न्यंकल।
19 व्यवस्थाया सफुलिइ च्वयातःगु खँ न्यनाः जुजुं नुगः मछिंकाः थःगु वसः खुत।
20 वं हिल्कियाह, शापानया काय् अहीकाम, मीकाया काय् अब्दोन, छ्यान्जे शापान व जुजुयात सल्लाह बीम्ह असायाहयात थथे धाल,
21 “अन वनाः परमप्रभुयाके बिन्ति यायां जुजु, इस्राएल व यहूदाय् च्वनाच्वंपिनिगु निंतिं उगु सफुलिइ छु छु च्वयातःगु दु न्यनादिसँ। छाय्धाःसा झी पुर्खातय्सं परमप्रभुया खँ मन्यंगुलिं व थ्व सफुलिइ च्वयातःगु फुक्क खँ मानय् मयाःगुलिं झीसं परमप्रभुया तःधंगु तं फयेमाःगु दु।”
22 हिल्कियाह व जुजुं आज्ञा ब्यूपिं मनूत देगःया वसः स्वइम्ह हसराया छय् तोखतया काय् शल्लूमया कलाः अगमवादिनी हुल्दायाथाय् वन। इमिसं वनापं उकियागु बारे खँ ल्हात। व यरूशलेमया न्हूगु त्वालय् च्वनीम्ह खः।
23 वं इमित धाल, “परमप्रभु इस्राएलया परमेश्वरं थथे धयादी, छिमित जिथाय् छ्वयाहःम्ह मनूयात धा,
24 परमप्रभुं थथे धयादी, ‘यहूदायाम्ह जुजुया न्ह्यःने ब्वंगु सफुलिइ च्वयातःगु फुक्क सरापं जिं थ्व थाय् व थनयापिं सकलें मनूतय्त सजाँय बी।
25 इमिसं जितः त्वःतूगु दु, मेपिं द्यःतय्गु निंतिं धुपाँय् च्याकल, इमिसं थःगु हे ल्हातं दय्कूगु मूर्तितपाखें जितः तंचाय्कूगु दु। उकिं जिं थ्व थासय् जिगु तं प्वंके। व क्वलाइ मखु।’”
26 परमप्रभुयाके न्यनेत छिमित छ्वयाहःम्ह यहूदायाम्ह जुजुयात थ्व हे खँ धयाब्यु, “छिं न्यनादीगु खँया बारे परमप्रभु इस्राएलयाम्ह परमेश्वरं थथे धयादी,
27 छं जिगु खँ न्यनाः पश्चाताप यात अले थ्व थाय् व थनयापिं मनूतय्गु बारे जिं धयागु खँ न्यनाः परमेश्वरया न्ह्यःने छ क्वमिलु जुल, छं थःगु वसः खुत अले जिगु न्ह्यःने ख्वल। उकिं जिं छंगु प्रार्थना न्यनागु दु, परमप्रभुं धयादी,
28 उकिं जिं छन्त छिमि पुर्खातनापं हे मुंके, छन्त थःगु चिहानय् याउँक थुनी।”
29 अनंलि जुजुं यहूदा व यरूशलेमयापिं फुक्क थकालितय्त सःतके छ्वल।
30 व यहूदायापिं मनूत, यरूशलेमयापिं मनूत, पुजाहारीत व लेवीत अले चिधंपिं व तःधंपिं फुक्क मनूतनापं परमप्रभुया देगलय् थाहां वन। परमप्रभुया देगलय् लुइकूगु बाचाया सफूया फुक्क वचन इमिसं ताय्कः वं ब्वन।
31 जुजु थःगु थांया लिक्क दन। अले वं परमप्रभुया न्ह्यःने परमप्रभुया ल्यू वनेगु अले वय्कःया बिधि, आज्ञा व नियम तनमन बियाः पालन यायेगु, अले उगु सफुलिइ च्वयातःगु फुक्क बाचा पालन यायेगु बाचायात न्हूकथं चित।
32 अनंलि वं यरूशलेम व बेन्यामीनय् दुपिं सकसितं व बाचा पूवंकेत पाःफय्कल। अले यरूशलेमयापिं मनूतय्सं परमेश्वर, इमि पुर्खातय् परमेश्वरया बाचाकथं थ्वयात।
33 अले योशियाहं इस्राएलीतय् फुक्क इलाकां फुक्क घच्चाइपुगु खँ चीकाछ्वल, अले इस्राएलय् च्वंपिं सकसितं परमप्रभु इमि परमेश्वरया सेवा याकेबिल। व म्वातले इपिं गुबलें नं परमप्रभु इमि पुर्खातय् परमेश्वरया ल्यू वनेगु त्वःमतू।