1 योआश न्हय्दँ दुबलय् यहूदायाम्ह जुजु जूगु खः। वं यरूशलेमय् पिइदँ तक राज्य यात। वया मांया नां बेर्शेबा शहरयाम्ह सिब्या खः।
2 यहोयादा पुजाहारी म्वातले योआशं परमप्रभुया मिखाय् भिंगु ज्या यात।
3 योआश जुजुया निंतिं यहोयादां निम्ह कलाःपिं ल्यल, इपिंपाखें वया काय्म्ह्याय्पिं बुल।
4 थुकिया छुं ई लिपा योआशं परमप्रभुया देगः ल्ह्वनेगु बिचाः यात।
5 उकिं वं पुजाहारीत व लेवीतय्त मुंकाः थथे धाल, “यहूदाया शहर शहरय् वनाः फुक्क इस्राएलीतपाखें परमप्रभुया देगः ल्ह्वनेत दँय्दसं बीगु धिबा मुँ। थ्व ज्या थत्थें या।” तर लेवीतय्सं थ्व ज्या यायेत लिबाकाच्वन।
6 उकिं जुजुं दकलय् तःधंम्ह पुजाहारी यहोयादायात सःताः थथे धाल, “परमप्रभुया दास मोशा व इस्राएलया खलकं नापलायेगु पालया निंतिं पुलेत क्वःछिनातःगु भेटी यहूदा व यरूशलेमं हयेत छाय् लेवीतय्त कर यानामदियागु?”
7 योआशं थथे यात छाय्धाःसा दुष्ट मिसा अतल्याहया काय्पिन्सं परमेश्वरया देगः दुने जबरजस्ती दुहां वनाः अनयागु पवित्र यानातःगु सकतां बालद्यःया पुजाय् छ्यःगु खः।
8 जुजुं लेवीतय्त छगः सनू दय्काः देगःया मू लुखाय् पिने तयेगु आज्ञा बिल।
9 परमेश्वरया दास मोशां मरुभूमिइ इस्राएलीतय्गु निंतिं क्वःछिनाथकूगु भेटी मनूतय्सं परमप्रभुयाथाय् हयेमाः धकाः यहूदा व यरूशलेम न्यंकं घोषणा यात।
10 अले सकल कुलनायःत व मनूतय्सं खुशी जुयाः थथःगु कर हयाः सनू जाय्काबिल।
11 उगु सनू जाइबलय् लेवीतय्सं जुजुया हाकिमतय्थाय् क्वबिया यंकिगु अले जुजुया छ्यान्जे व दकलय् तःधंम्ह पुजाहारीया छम्ह हाकिम वयाः उकी दुगु धिबा लिकाइगु। अले हाकनं उगु सनूयात न्हापाया थासय् हे तयाबीगु। थुकथं इमिसं न्हियान्हिथं अथे हे यानाः यक्व धिबा मुंकल।
12 जुजु व यहोयादां देगः ल्ह्वनेगु जिम्मा काःपिं मनूतय्त धिबा बीगु, इमिसं धाःसा देगः ल्ह्वनेत ज्याय् तःपिं दकःमित व सिँकःमितय्त अले देगः ल्ह्वनेत न व कँय्या ज्या याइपिं कारीगरतय्त बीगु।
13 ज्या याइपिन्सं बांलाक ज्या यात, इमिसं परमप्रभुया देगः न्हापा गथे खः अथे हे च्वंक दय्कल, अथे हे बल्लाकल।
14 इमिसं व ज्या सिधय्काः ल्यं दुगु लुँ व वहः जुजु व यहोयादायाथाय् यंकल। अले इमिसं ल्यं दुगु लुँ व वहलं देगलय् होमबलिया निंतिं ख्वल्चा व मेमेगु थलबल दय्केबिल।
15 यक्व बुरा जुइधुंकाः सछि व स्विदँ दुबलय् यहोयादा सित।
16 वं इस्राएलय् परमेश्वर व वय्कःया देगःया निंतिं भिंगु ज्या याःगुलिं वयात दाऊदया शहरय् जुजुपिनिगु चिहानय् थुन।
17 तर यहोयादा सीधुंकाः यहूदायापिं हाकिमत वयाः जुजुयात भागि यात। अले जुजुं इमिगु खँ न्यन।
18 इमिसं परमप्रभु थः पुर्खातय् परमेश्वरया देगःयात त्वःताः अशेरा द्यःमय्जुया थांत व मेमेगु मूर्तिया पुजा यात। इमिगु अपराधया कारणं यहूदा व यरूशलेमय् परमेश्वरया तं लात।
19 तर इमित थःथाय् हे लित हयेत परमप्रभुं अगमवक्तात छ्वयादिल। उपिं अगमवक्तातय्सं इमिगु दोष क्यनाबिल अय्नं इमिसं अगमवक्तातय्गु खँ मन्यं।
20 अले परमप्रभुया आत्मा पुजाहारी यहोयादाया काय् जकरियायाके कुहां झाल। वं मनूतय् न्ह्यःने दनाः थथे धाल, “परमेश्वरं थथे धयादी, ‘छिमिसं छाय् परमप्रभुया आज्ञात पालन मयानागु? छिपिं ताःलाइ मखु। छिमिसं परमप्रभुयात त्वःतूगुलिं वय्कलं नं छिमित त्वःतादीगु दु।’”
21 तर इमिसं जकरियाया विरोधय् ग्वसाः ग्वल, अले जुजुया आज्ञा कथं इमिसं परमप्रभुया देगःया चुकय् ल्वहँतं कय्काः वयात स्यात।
22 जुजु योआशं जकरियाया बाः यहोयादां थःत याःगु दया ल्वःमंकाः वया काय् जकरियायात स्याकेबिल। सीगु इलय् वं थथे धाल, “छिमिसं छु यानाच्वंगु खः, व परमप्रभुं खनेमा अले छन्त सजाँय बियादी।”
23 व हे दँया लिपाया इलय् अरामी सेना योआशलिसें ल्वाः वल। इमिसं यहूदा व यरूशलेमय् हमला यानाः मनूतय् फुक्क नायःतय्त स्यानाबिल। इमिसं अन लुतय् याःगु फुक्क सामान दमस्कसय् इमि जुजुयाथाय् छ्वयाबिल।
24 अरामी सेनां कम मनूत ज्वनावःगु जूसां परमप्रभुं यहूदाया छगू तःधंगु सेनायात इमिगु ल्हातय् लःल्हानादिल। छाय्धाःसा यहूदायापिं मनूतय्सं परमप्रभु थः पुर्खातय् परमेश्वरयात त्वःतूगु खः। थुकथं योआशयात इमिसं सजाँय बिल।
25 व तसकं बांमलाक घाःपा जुल। शत्रुत लिहां वनेधुंकाः थः हे निम्ह भारदारतय्सं वयागु विरोधय् ग्वःसा ग्वल अले द्यनाच्वंगु थासय् हे वयात स्यात। इमिसं पुजाहारी यहोयादाया काय् स्याःगुया बदला कायेत वयात स्याःगु खः। वयात दाऊदया शहरय् थुनाबिल, तर जुजुपिनिगु चिहानय् धाःसा मखु।
26 वयागु विरोधय् ग्वसाः ग्वःपिं अम्मोनी मिसा शिम्मतया काय् जाबाद व मोआबी मिसा शिम्रितया काय् यहोजाबाद खः।
27 योआशया काय्पिनिगु ईश्वरवाणीया खँ, वयागु विरोधय् याःगु यक्व ईश्वरवाणी, अले परमेश्वरया देगः वं हाकनं दय्कूगु खँ जुजुपिनिगु इतिहासया सफुलिइ च्वयातःगु दु। वया लिपा वया काय् अमस्याह जुजु जुल।