1 अमस्याह निइन्यादँ दुबलय् जुजु जूगु खः, वं यरूशलेमय् निइगुदँ राज्य यात। वया मांया नां यरूशलेमयाम्ह यहोअदीन खः।
2 वं परमप्रभुया मिखाय् भिंगु ज्या यात, दुनुगलंनिसें धाःसा मखु।
3 देशया शासन थःगु ल्हातय् वयेधुंकाः वं थः बौयात मृत्यु दण्ड ब्यूपिं भारदारतय्त स्यानाबिल।
4 तर वं मोशाया व्यवस्थाया सफुलिइ थथे धकाः च्वयातःगु परमप्रभुया आज्ञायात पालन यानाः इमि काय्पिन्त धाःसा मस्याः, “बौपिन्त काय् म्ह्याय्पिनिगु निंतिं अले काय् म्ह्याय्पिन्त बौपिनिगु निंतिं स्याये मते। छम्ह छम्ह मनू थःम्हं याःगु पापया निंतिं जक सिनावनेमाः।”
5 जुजु अमस्याहं यहूदायापिं मनूतय्त मुंकाः इमि परिवार परिवारकथं फुक्क यहूदा व बेन्यामीनया निंतिं द्वःछि द्वःछि व सछि-सछिम्ह सिपाइँया कप्तानतय्गु अधीनय् तयाबिल। अले वं निइदँ व व स्वयाः च्वय्यापिं मनूत मुंकल। इपिं स्वंगू लाखम्ह दु, उपिं सकलें लडाइँ यायेफुपिं, भाला व ढाल चले याये सःपिं खः।
6 वं उत्तरी इस्राएलं ३,४०० किलोग्राम ति वहः पुलाः छगू लाख सिपाइँ काल।
7 तर छम्ह परमेश्वरया मनू वयाः जुजुयात थथे धाल, “हे जिमि जुजु! थुपिं सिपाइँतय्त थःनापं यंकादी मते। थुपिं इस्राएल अर्थात एफ्राइमया मनूतनापं परमेश्वर मदु।
8 छि वनाः साहस पिकयाः ल्वानादिल धाःसां परमेश्वरं छितः शत्रुया न्ह्यःने बुकादी, छाय्धाःसा ग्वाहालि यायेगु व बुकेगु अधिकार परमेश्वरयाके दु।”
9 अमस्याहं परमेश्वरया मनूयात न्यन, “इस्राएली सेनाया निंतिं जिं पुलागु व ३,४०० किलोग्राम वहः छु यायेगु लय्?”
10 उकिं अमस्याहं ज्याला बियाः एफ्राइमं हःपिं सेनाया पुचःयात छेँ लिहां वनेगु आज्ञा बिल। अथे जूबलय् इपिं यहूदायापिं मनूत खनाः तसकं तंचाल। इपिं तंचायाः छेँ लिहां वन।
11 अले अमस्याहं साहस पिकयाः थःगु सेनायात चि ब्यासिइ यंकल, अले अन वं लडाइँ यानाः झिद्वः सेइरया सिपाइँतय्त स्यानाबिल।
12 यहूदाया सिपाइँतय्सं मेपिं झिद्वः सिपाइँतय्त ज्वन। इमित छगः तःग्वःगु भीरया च्वकाय् यंकाः अनं क्वय् क्वफानाबिल। इपिं फुक्क अन ल्वहँतय् न्यानाः सित।
13 थुबलय् हे अमस्याहं लडाइँलय् वने मब्यूपिं इस्राएली सिपाइँतय्सं यहूदां कब्जा यानातःगु सामरिया व बेथ-होरोनया दथुइ लाःगु शहर शहरय् हमला यात, स्वद्वः मनूयात स्यानाबिल। अले यक्व सामान लुतय् यात।
14 एदोमीतय्त त्याकाः अमस्याह लिहां वःबलय् वं थःनापं सेइरया मनूतय् द्यःयागु मूर्तित हयाः थः द्यः दय्कल। वं इमित पुजा यानाः इमिगु निंतिं होमबलि छाल।
15 उकिं यानाः परमप्रभु तंचायादिल, अले वय्कलं छम्ह अगमवक्तायात अमस्याहयाथाय् छ्वयादिल। उम्ह अगमवक्तां न्यन, “छिं छाय् थः हे मनूतय्त छिगु ल्हातं बचय् याये मफुपिं द्यःतय्त माला जुयागु?”
16 वं थथे धयाच्वंबलय् हे अमस्याहं वयात धाल, “गुबलय्निसें जिमिसं छन्त जुजुयात सल्लाह बीम्ह दय्कागु? सुम्क च्वँ, मखुसा जिमिसं छन्त स्याके बी।”
17 यहूदायाम्ह जुजु अमस्याहं थः भारदारतनापं सल्लाह यात अले इस्राएलया जुजु येहूया छय्, यहोआहाजया काय् येहोआशयाथाय् थथे धाय्के छ्वल, “वा, जिनापं ल्वाःवा।”
18 अले इस्राएलयाम्ह जुजु यहोआशं यहूदायाम्ह जुजु अमस्याहयात थथे लिसः बिल, “छकः लेबनान डाँडाया छमा कंमां छमा देवदारुया सिमायात थ्व खबर छ्वल, ‘छिमि म्ह्याय्यात जिमि काय्लिसें ब्याहा यानाब्यु।’ छम्ह गुँपशुं व कंमायात तुतिं न्हुल।
19 “आः अमस्याह, छ जिं एदोमीतय्त बुका धकाः तःधंछुयाः जुइगु, तर स्व, जिं छन्त छेँय् हे च्वँ धकाः सल्लाह बी। थःत व यहूदाया मनूतय्त छाय् आपतय् लाकेगु?”
20 तर अमस्याहं वयागु खँ मन्यं। अमस्याह व वया मनूत बुइमा धइगु परमेश्वरया हे इच्छा खः। छाय्धाःसा इमिसं एदोमी द्यःया मूर्तितय्त मालाजुल।
21 उकिं इस्राएलयाम्ह जुजु येहोआश यहूदायाम्ह जुजु अमस्याहनापं ल्वाः वन। इपिं यहूदाया बेथ-शेमेशय् ल्वात।
22 यहूदायापिं मनूत इस्राएलीतपाखें बुत अले इपिं सकलें थथःगु छेँपाखें बिस्युं वन।
23 तर इस्राएलयाम्ह जुजु येहोआशं अहज्याहया छय् योआशया काय् यहूदायाम्ह जुजु अमस्याहयात बेथ-शेमेशय् ज्वनाः यरूशलेमय् हल। वं एफ्राइम ध्वाखांनिसें ध्याकुन्चा ध्वाखा तक सछि व चयगू (१८०) मिटर ति ताहाःकगु शहरया पखाः थुनाबिल।
24 व ओबेद-एदोमया जिम्माय् दुगु परमेश्वरया देगःया फुक्क लुँ वहः, देगःया थलबल, दरबारया धुकुतिइ च्वंगु ध्यबा व कैदीतय्त ज्वनाः सामरियाय् लिहां वल।
25 यहूदायाम्ह जुजु योआशया काय् अमस्याह इस्राएलयाम्ह जुजु येहोआश स्वयाः झिंन्यादँ अप्वः म्वात।
26 अमस्याह जुजु जुयाच्वंबलय् जूगु फुक्क खँ, शुरुंनिसें लिपा तक यहूदा व इस्राएलया जुजुपिनिगु इतिहासया सफुलिइ च्वयातःगु दु।
27 अमस्याह परमप्रभुपाखें फस्वयावंगु इलंनिसें वयागु विरोधय् यरूशलेमय् जाः ग्वःगु खः। अले व लाकीशय् बिस्युं वन अय्नं इमिसं अन नं मनूत छ्वल अले वयात अन हेस्यात।
28 अनंलि सलया म्हय् तयाः वयागु सीम्ह यरूशलेमय् हल, वयात यहूदाया शहरया जुजुपिं थुनीगु चिहानय् थुन।