1 यारोबाम उत्तरी इस्राएलयाम्ह जुजु जूगु झिंच्यागू दँ दुबलय् अबिया यहूदायाम्ह जुजु जुल।
2 वं यरूशलेमय् स्वदँ तक राज्य यात। वया मां गिबायाम्ह उरीएलया म्ह्याय् माका खः।
3 अबियां लडाइँया निंतिं प्यंगू लाखम्ह वीर सिपाइँ मुंकल। यारोबामं धाःसा अबियानापं ल्वायेत च्यागू लाखम्ह वीर सिपाइँतय् सेना झ्वलाक तयार यात।
4 अबियां एफ्राइमया पहाडी इलाकाय् लाःगु समारैम डाँडाय् दनाः थथे धाल, “अय् यारोबाम व इस्राएलयापिं फुक्क मनूत, जिगु खँ न्यँ!
5 परमप्रभु, इस्राएलयाम्ह परमेश्वरं दाऊदनापं चि दुगु छगू बाचा चिनाः वयात व वया सन्तानतय्त इस्राएलया राज्य न्ह्याबलेंया लागि बियादीगु दु धकाः छिमिसं मस्यू ला?
6 अथे जूसां दाऊदया काय् सोलोमनया छम्ह भारदार नबातया काय् यारोबामं थः मालिकया विरोधय् विद्रोह यात।
7 अले ज्यालगे मजूपिं छुं लुच्चात वनापं मिलय् जुल। यारोबाम व उपिं लुच्चातय्सं रहबामया विरोधय् थःत बल्लाकल। अबलय् रहबाम नकतिनियाम्ह व थःम्हं छुं क्वःछीमफुम्ह जूगुलिं वं इमित पने मफुत।
8 “आः छिमिसं परमप्रभुं दाऊदया सन्तानया ल्हातय् बियादीगु राज्यलिसें ल्वायेगु बिचाः यानाच्वंगु दु। छिमिके छगू तःधंगु सेना व यारोबामं छिमिगु निंतिं द्यः धकाः दय्काब्यूगु लुँयापिं द्वहंचात दु।
9 छिमिसं हारूनया सन्तान परमप्रभुया पुजाहारीतय्त व लेवीतय्त बिसिकेछ्वल। इमिगु थासय् मे मेगु जातिं थें छिमिसं थः पुजाहारीत ल्यल। थःत देछायेत छम्ह द्वहंचा व न्हय्म्ह भ्याःचा ज्वनावःम्ह न्ह्याम्ह मनूयात नं छिमिसं उपिं मखुपिं द्यःतय् पुजाहारी दय्कीगु।
10 “जिमिगु निंतिं धाःसा परमप्रभु हे जिमि परमेश्वर खः। जिमिसं वय्कःयात त्वःतागु मदुनि। परमप्रभुया सेवा याइपिं पुजाहारीत हारूनया सन्तान खः अले लेवीतय्सं थःगु ज्या याना हे च्वंगु दु।
11 न्हियान्हिथं सुथय् व बहनि इमिसं परमप्रभुया निंतिं होमबलि छाइ, गुँगू थनी, शुद्धगु तेबिलय् देछाःगु मरि तइ, अले सन्ध्या ई पतिकं लुँया त्वादेवातय् दुगु मत च्याकी। थुकथं परमप्रभु झी परमेश्वरं आज्ञा बियादीगु खँ जिमिसं पालन याना। छिमिसं धाःसा वय्कःयात त्वःतूगु दु।
12 परमेश्वर हे जिमि नायः खः। वय्कः जिपिंनापं दी। वय्कःया पुजाहारीत तुरही पुयाः छिमिगु विरोधय् लडाइँ घोषणा यायेत तयार दु। अय् इस्राएलीत, परमप्रभु थः पुर्खातय् परमेश्वरलिसें ल्वाये मते। छाय्धाःसा छिपिं ताःलाइ मखु।”
13 अबिया न्वंवाना च्वंबलय् यारोबामं छुं सिपाइँतय्त सुलाः ल्यूनेपाखें हमला यायेत छ्वल। वया मू सेना धाःसा यहूदाया न्ह्यःने दु अले हमला यायेत सुलाच्वंपिं सेना इमिगु ल्युने दु।
14 यहूदायापिं सिपाइँ फस्वःबलय् इमिसं थःगु न्ह्यःने व ल्युने छकलं निखेंपाखें हमला जुयाच्वंगु खंकल। ग्वाहालिया लागि इमिसं परमप्रभुया नां काल। पुजाहारीतय्सं तुरही पुल।
15 इपिं अथे हाःबलय् परमेश्वरं अबिया व यहूदाया न्ह्यःने यारोबाम व फुक्कं इस्राएलीतय्त बुकादिल।
16 इस्राएलीत यहूदायापिं सिपाइँय् न्ह्यःनेनं बिस्युं वन, अले परमेश्वरं इस्राएलीतय्त इमिगु ल्हातय् बियादिल।
17 थुकथं अबिया व वया सिपाइँतय्सं इमित बांमलाक बुकल, इमिसं इस्राएलयापिं न्यागू लाख वीर सिपाइँतय्त स्यानाबिल।
18 यहूदायापिं सिपाइँतय्सं इस्राएलीतय्त बुकल। छाय्धाःसा इमिसं परमप्रभु इमि पुर्खातय् परमेश्वरयागु भरोसा काःगु खः।
19 अबियां यारोबामया सेनायात लिनायंकल, अले वयागु बेथेल, येशना व एप्रोन शहर व उमिगु गांत त्याकाकाल।
20 अबियाया पालय् यारोबामं थःत बल्लाके मफुत! लिपातय् परमप्रभुं यारोबामयात स्यानादिल।
21 अबिया धाःसा झन बल्लात। वया झिंप्यम्ह कलाः दु, व निइनिम्ह काय् व झिंखुम्ह म्ह्याय्पिनि अबु खः।
22 अबिया जुजु जुयाच्वंबलय् जूगु फुक्क खँ, वं याःगु फुक्क ज्या व वं धाःगु खँ इद्दो अगमवक्ताया सफुलिइ च्वयातःगु दु।