1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ϫⲱ ⲉⲡϫⲟⲉⲓⲥ ⲛⲟⲩϫⲱ ⲛⲃⲣⲣⲉ ϫⲉ ⲡϫⲟⲉⲓⲥ ⲉⲓⲣⲉ ⲛϩⲉⲛϣⲡⲏⲣⲉ ⲁⲥⲧⲟⲩϫⲟ ⲛⲁϥ ⲛϭⲓ ⲧⲉϥⲟⲩⲛⲁⲙ ⲁⲩⲱ ⲡⲉϥϭⲃⲟⲓ ⲉⲧⲟⲩⲁⲁⲃ</ab>
2 ⲁⲡϫⲟⲉⲓⲥ ⲟⲩⲱⲛϩ ⲉⲃⲟⲗ ⲙⲡⲉϥⲟⲩϫⲁⲓ ⲁϥϭⲱⲗⲡ ⲉⲃⲟⲗ ⲛⲧⲉϥⲇⲓⲕⲁⲓⲟⲥⲩⲛⲏ ⲙⲡⲉⲙⲧⲟ ⲉⲃⲟⲗ ⲛⲛϩⲉⲑⲛⲟⲥ</ab>
3 ⲁϥⲣⲡⲙⲉⲉⲩⲉ ⲙⲡⲉϥⲛⲁ ⲛⲓⲁⲕⲱⲃ ⲁⲩⲱ ⲧⲉϥⲙⲉ ⲙⲡⲏⲓ ⲙⲡⲓ︤ⲏ︦ⲗ︥ ⲁⲛⲉⲕⲣⲱⲟⲩ ⲧⲏⲣⲟⲩ ⲙⲡⲕⲁϩ ⲛⲁⲩ ⲉⲡⲟⲩϫⲁⲓ ⲙⲡⲉⲛⲛⲟⲩⲧⲉ</ab>
4 ⲡⲕⲁϩ ⲧⲏⲣϥ ϯⲗⲟⲩⲗⲁⲓ ⲙⲡⲛⲟⲩⲧⲉ ϫⲱ ⲛⲧⲉⲧⲛⲧⲉⲗⲏⲗ ⲛⲧⲉⲧⲛⲯⲁⲗⲗⲉⲓ ⲉⲣⲟϥ</ab>
5 ⲯⲁⲗⲗⲉⲓ ⲉⲣⲟϥ ϩⲛ ⲟⲩⲕⲓⲑⲁⲣⲁ ϩⲛ ⲟⲩⲕⲓⲑⲁⲣⲁ ⲙⲛ ⲟⲩϩⲣⲟⲟⲩ ⲙⲯⲁⲗⲙⲟⲥ</ab>
6 ϩⲛ ϩⲉⲛⲥⲁⲗⲡⲓⲅⲝ ⲛϫⲁϩϫϩ ⲙⲛ ⲟⲩϩⲣⲟⲟⲩ ⲛⲥⲁⲗⲡⲓⲅⲝ ⲛⲧⲁⲡ ϯⲗⲟⲩⲗⲁⲓ ⲙⲡⲉⲙⲧⲟ ⲉⲃⲟⲗ ⲙⲡⲣⲣⲟ ⲡϫⲟⲉⲓⲥ</ab>
7 ⲙⲁⲣⲉⲑⲁⲗⲁⲥⲥⲁ ⲕⲓⲙ ⲙⲛ ⲡⲉⲥϫⲱⲕ ⲉⲃⲟⲗ ⲧⲟⲓⲕⲟⲩⲙⲉⲛⲏ ⲙⲛ ⲛⲉⲧⲟⲩⲏϩ ⲛϩⲏⲧⲥ</ab>
8 ⲛⲓⲉⲣⲱⲟⲩ ⲛⲁϫⲁⲕ ⲛⲛⲉⲩϭⲓϫ ϩⲓ ⲟⲩⲥⲟⲡ</ab>
9 ⲛⲧⲟⲟⲩ ⲛⲁⲧⲉⲗⲏⲗ ϫⲉ ⲁϥⲉⲓ ⲉⲕⲣⲓⲛⲉ ⲙⲡⲕⲁϩ ϥⲛⲁⲕⲣⲓⲛⲉ ⲛⲧⲟⲓⲕⲟⲩⲙⲉⲛⲏ ϩⲛ ⲟⲩⲇⲓⲕⲁⲓⲟⲥⲩⲛⲏ ⲁⲩⲱ ϩⲉⲛⲗⲁⲟⲥ ϩⲛ ⲟⲩⲥⲟⲟⲩⲧⲛ</ab>