1 ⲁⲩⲱϫⲛ ⲛϭⲓ ⲛⲉⲥⲙⲟⲩ ⲛⲇⲁⲩⲉⲓⲇ ⲡϣⲏⲣⲉ ⲛⲓⲉⲥⲥⲁⲓ ⲡⲉⲯⲁⲗⲙⲟⲥ ⲛⲁⲥⲁⲫ ⲟⲩⲁⲅⲁⲑⲟⲥ ⲡⲉ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲛⲛⲉⲧⲥⲟⲩⲧⲱⲛ ϩⲙ ⲡⲉⲩϩⲏⲧ</ab>
2 ⲁⲛⲟⲕ ⲇⲉ ⲡⲁⲣⲁ ⲟⲩⲕⲟⲩⲓ ⲁⲛⲁⲟⲩⲉⲣⲏⲧⲉ ⲕⲓⲙ ⲡⲁⲣⲁ ⲟⲩⲕⲟⲩⲓ ⲁⲛⲁⲧⲁϭⲥⲉ ϫⲱⲱⲣⲉ ⲉⲃⲟⲗ</ab>
3 ϫⲉ ⲁⲓⲕⲱϩ ⲉⲛⲁⲛⲟⲙⲟⲥ ⲉⲓⲛⲁⲩ ⲉϯⲣⲏⲛⲏ ⲛⲛⲣⲉϥⲣⲛⲟⲃⲉ</ab>
4 ϫⲉ ⲙⲛⲙⲧⲟⲛ ϣⲟⲟⲡ ϩⲙ ⲡⲉⲩⲙⲟⲩ ⲁⲩⲱ ⲧⲁϫⲣⲟ ϩⲛ ⲧⲉⲩⲙⲁⲥⲧⲓⲝ</ab>
5 ⲛⲥⲉϩⲛ ϩⲓⲥⲉ ⲛⲣⲱⲙⲉ ⲁⲛ ⲛⲛⲉⲩⲙⲁⲥⲧⲓⲅⲟⲩ ⲙⲙⲟⲟⲩ ⲙⲛ ⲛⲣⲱⲙⲉ</ab>
6 ⲉⲧⲃⲉ ⲡⲁⲓ ⲁⲧⲉⲩⲙⲛⲧϫⲁⲥⲓϩⲏⲧ ϯϭⲟⲙ ⲛⲁⲩ ⲁⲩϭⲟⲟⲗⲟⲩ ⲙⲡⲉⲩϫⲓⲛϭⲟⲛⲥ ⲙⲛ ⲧⲉⲩⲙⲛⲧϣⲁϥⲧⲉ</ab>
7 ⲡⲉⲩϫⲓⲛϭⲟⲛⲥ ⲛⲏⲩ ⲉⲃⲟⲗ ⲛⲑⲉ ⲉⲃⲟⲗ ϩⲙ ⲡⲉⲩⲱⲧ ⲁⲩⲉⲓ ⲉⲃⲟⲗ ⲉⲩϣⲟϫⲛⲉ ϩⲙ ⲡⲉⲩϩⲏⲧ</ab>
8 ⲁⲩⲙⲉⲕⲙⲟⲩⲕⲟⲩ ⲁⲩϣⲁϫⲉ ϩⲛ ⲟⲩⲡⲟⲛⲏⲣⲓⲁ ⲁⲩϫⲱ ⲛⲟⲩϫⲓⲛϭⲟⲛⲥ ⲉⲡϫⲓⲥⲉ</ab>
9 ⲁⲩϫⲓⲥⲉ ⲛⲧⲉⲩⲧⲁⲡⲣⲟ ⲉϩⲣⲁⲓ ⲉⲧⲡⲉ ⲁⲩⲱ ⲁⲡⲉⲩⲗⲁⲥ ⲉⲓ ⲉⲃⲟⲗ ϩⲙ ⲡⲕⲁϩ</ab>
10 ⲉⲧⲃⲉ ⲡⲁⲓ ⲡⲁⲗⲁⲟⲥ ⲛⲁⲕⲟⲧϥ ⲉⲡⲉⲓⲙⲁ ⲛⲥⲉϭⲛ ϩⲉⲛϩⲟⲟⲩ ⲛⲁⲩ ⲉⲩϫⲏⲕ ⲉⲃⲟⲗ</ab>
11 ⲡⲉϫⲁⲩ ϫⲉ ⲛⲁϣ ⲛϩⲉ ⲁⲡⲛⲟⲩⲧⲉ ⲉⲓⲙⲉ ⲁⲩⲱ ϫⲉ ⲟⲩⲛⲥⲟⲟⲩⲛ ϩⲙ ⲡⲉⲧϫⲟⲥⲉ</ab>
12 ⲉⲓⲥ ϩⲏⲏⲧⲉ ⲛⲁⲓ ⲛⲉ ⲛⲣⲉϥⲣⲛⲟⲃⲉ ⲉⲧⲣⲟⲟⲩⲧ ⲁⲩⲁⲙⲁϩⲧⲉ ⲛⲧⲉⲩⲙⲛⲧⲣⲙⲙⲁⲟ ϣⲁ ⲉⲛⲉϩ</ab>
13 ⲁⲩⲱ ⲡⲉϫⲁⲓ ϫⲉ ⲛⲧⲁⲓⲧⲙⲁⲉⲓⲉ ⲡⲁϩⲏⲧ ⲛⲧⲟⲟⲩⲛ ⲉⲡϫⲓⲛϫⲏ ⲁⲓⲉⲓⲱ ⲛⲛⲁϭⲓϫ ϩⲛ ⲛⲉⲧⲟⲩⲁⲁⲃ</ab>
14 ⲁⲓϣⲱⲡⲉ ⲉⲩⲙⲁⲥⲧⲓⲅⲟⲩ ⲙⲙⲟⲓ ⲙⲡⲉϩⲟⲟⲩ ⲧⲏⲣϥ ⲁⲩⲱ ⲡⲁϫⲡⲓⲟ ⲙⲡⲛⲁⲩ ⲛϩⲧⲟⲟⲩⲉ</ab>
15 ⲉϣϫⲉ ⲁⲓϫⲟⲟⲥ ϫⲉ ϯⲛⲁϫⲟⲟⲥ ⲛⲧⲉⲓϩⲉ ⲉⲓⲥ ⲧⲅⲉⲛⲉⲁ ⲛⲛⲉⲕϣⲏⲣⲉ ⲛⲧⲁⲓⲥⲙⲓⲛⲉ ⲛⲁⲥ</ab>
16 ⲁⲓⲙⲉⲉⲩⲉ ⲉⲥⲟⲩⲛ ⲡϫⲟⲉⲓⲥ ⲟⲩϩⲓⲥⲉ ⲡⲉ ⲡⲁⲓ ⲙⲡⲁⲙⲧⲟ ⲉⲃⲟⲗ</ab>
17 ϣⲁⲛϯⲃⲱⲕ ⲉϩⲟⲩⲛ ⲉⲙⲡⲉⲧⲟⲩⲁⲁⲃ ⲙⲡⲛⲟⲩⲧⲉ ⲉⲉⲓⲙⲉ ⲉⲛϩⲁⲉⲉⲩ</ab>
18 ⲡⲗⲏⲛ ⲛⲧⲁⲕⲙⲓⲛⲉ ⲛⲁⲩ ⲉⲧⲃⲉ ⲙⲙⲛⲧⲕⲣⲟϥ ⲁⲕⲧⲁⲟⲩⲟⲟⲩ ⲉϩⲣⲁⲓ ϩⲙ ⲡⲧⲣⲉⲩϫⲁⲥⲧⲟⲩ</ab>
19 ⲛⲁϣ ⲛϩⲉ ⲁⲩⲣϫⲁⲓⲉ ϩⲛ ⲟⲩϣⲥⲛⲉ ⲁⲩⲱϫⲛ ⲁⲩⲧⲁⲕⲟ ⲉⲧⲃⲉ ⲛⲉⲩⲁⲛⲟⲙⲓⲁ</ab>
20 ⲛⲑⲉ ⲛⲧⲣⲁⲥⲟⲩ ⲛⲛⲉⲧⲧⲱⲟⲩⲛ ⲡϫⲟⲉⲓⲥ ⲕⲛⲁⲥⲉϣϥ ⲧⲉⲩϩⲉⲓⲕⲱⲛ ϩⲛ ⲧⲉⲕⲡⲟⲗⲓⲥ</ab>
21 ϫⲉ ⲁⲡⲁϩⲏⲧ ⲉⲩⲫⲣⲁⲛⲉ ⲁⲩⲱ ⲁⲛⲁϭⲗⲟⲧⲉ ϣⲓⲃⲉ</ab>
22 ⲁⲛⲟⲕ ⲇⲉ ϯⲥⲟϣϥ ⲙⲡⲓⲉⲓⲙⲉ ⲁⲓⲣⲑⲉ ⲛⲛⲓⲧⲃⲛⲏ ⲛⲛⲁϩⲣⲁⲕ</ab>
23 ⲁⲛⲟⲕ ⲇⲉ ϯ ⲛⲙⲙⲁⲕ ⲛⲟⲩⲟⲉⲓϣ ⲛⲓⲙ ⲁⲕⲁⲙⲁϩⲧⲉ ⲛⲧⲁϭⲓϫ ⲛⲟⲩⲛⲁⲙ</ab>
24 ⲁⲕϫⲓⲙⲟⲉⲓⲧ ϩⲏⲧⲧ ϩⲙ ⲡⲉⲕϣⲟϫⲛⲉ ⲁⲕϣⲟⲡⲧ ⲉⲣⲟⲕ ϩⲛ ⲟⲩⲉⲟⲟⲩ</ab>
25 ⲟⲩ ⲅⲁⲣ ⲡⲉⲧⲉⲟⲩⲛⲧⲁⲉⲓϥ ϩⲛ ⲧⲡⲉ ⲁⲩⲱ ⲛⲧⲁⲓⲟⲩⲉϣ ⲟⲩ ⲛⲧⲟⲟⲧⲕ ϩⲙ ⲡⲕⲁϩ</ab>
26 ⲁⲡⲁϩⲏⲧ ⲙⲛ ⲧⲁⲥⲁⲣⲝ ⲱϫⲛ ⲡⲛⲟⲩⲧⲉ ⲙⲡⲁϩⲏⲧ ⲁⲩⲱ ⲧⲁⲙⲉⲣⲓⲥ ϣⲁ ⲉⲛⲉϩ ⲡⲉ ⲡⲛⲟⲩⲧⲉ</ab>
27 ϫⲉ ⲉⲓⲥ ϩⲏⲏⲧⲉ ⲛⲉⲧⲟⲩⲉ ⲛⲥⲁⲃⲟⲗ ⲙⲙⲟⲕ ⲛⲁⲧⲁⲕⲟ ⲁⲕϥⲱⲧⲉ ⲉⲃⲟⲗ ⲛⲟⲩⲟⲛ ⲛⲓⲙ ⲉⲧⲟ ⲙⲡⲟⲛⲏⲣⲟⲥ ⲛⲛⲁϩⲣⲁⲕ</ab>
28 ⲁⲛⲟⲕ ⲇⲉ ⲟⲩⲁⲅⲁⲑⲟⲛ ⲛⲁⲓ ⲡⲉ ⲉⲧⲟϭⲧ ⲉⲡⲛⲟⲩⲧⲉ ⲉⲧⲣⲁⲕⲱ ⲛⲧⲁϩⲉⲗⲡⲓⲥ ϩⲙ ⲡϫⲟⲉⲓⲥ ⲉϫⲱ ⲛⲛⲉⲕⲉⲣⲏⲧ ⲧⲏⲣⲟⲩ ϩⲛ ⲙⲡⲩⲗⲏ ⲛⲧϣⲉⲉⲣⲉ ⲛⲥⲓⲱⲛ</ab>