1 ⲉⲡϫⲱⲕ ⲉⲃⲟⲗ ⲛⲛⲉⲧⲛⲁϣⲓⲃⲉ ⲛⲕⲉⲥⲟⲡ ⲉⲧⲉⲥⲧⲏⲗⲟⲅⲣⲁⲫⲓⲁ ⲛⲇⲁⲩⲉⲓⲇ ⲉⲧⲇⲓⲁⲇⲟⲭⲏ</ab>
2 ⲛⲧⲉⲣⲉϥⲣⲱⲕϩ ⲛⲧⲉⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲙⲛ ⲧⲥⲩⲣⲓⲁ ⲛⲥⲱⲩⲃⲁⲗ ⲁⲩⲱ ⲁϥⲕⲧⲟϥ ⲛϭⲓ ⲓⲱⲁⲃ ⲁϥⲡⲁⲧⲁⲥⲥⲉ ⲛϯⲇⲟⲩⲙⲁⲓⲁ ϩⲙ ⲡⲉⲓⲁ ⲛⲛⲉϩⲙⲟⲩ ⲙⲛⲧⲥⲛⲟⲟⲩⲥ ⲛϣⲟ</ab>
3 ⲡⲛⲟⲩⲧⲉ ⲁⲕⲕⲁⲁⲛ ⲛⲥⲱⲕ ⲁⲕϣⲣϣⲱⲣⲛ ⲁⲕⲛⲟⲩϭⲥ ⲁⲩⲱ ⲟⲛ ⲁⲕϣⲛϩⲧⲏⲕ ⲉϫⲱⲛ</ab>
4 ⲁⲕⲛⲟⲉⲓⲛ ⲙⲡⲕⲁϩ ⲁⲕϣⲧⲣⲧⲱⲣϥ ⲙⲁⲧⲁⲗϭⲉ ⲛⲉϥⲟⲩⲱϣϥ ⲧⲏⲣⲟⲩ ϫⲉ ⲁϥⲕⲓⲙ</ab>
5 ⲁⲕⲧⲥⲁⲃⲉ ⲡⲉⲕⲗⲁⲟⲥ ⲉϩⲉⲛϩⲃⲏⲩⲉ ⲉⲩⲛⲁϣⲧ ⲁⲕⲧⲥⲟⲛ ⲛⲟⲩⲏⲣⲡ ⲛⲙⲕⲁϩ ⲛϩⲏⲧ</ab>
6 ⲁⲕϯ ⲛⲟⲩⲙⲁⲉⲓⲛ ⲛⲛⲉⲧⲣϩⲟⲧⲉ ϩⲏⲧⲕ ⲉⲧⲣⲉⲩⲡⲱⲧ ϩⲁ ⲑⲏ ⲛⲟⲩⲥⲟⲧⲉ</ab>
7 ϫⲉⲕⲁⲥ ⲉⲣⲉⲛⲉⲕⲙⲉⲣⲓⲧ ⲛⲟⲩϩⲙ ⲙⲁⲧⲟⲩϫⲟⲓ ϩⲛ ⲧⲉⲕⲟⲩⲛⲁⲙ ⲛⲅⲥⲱⲧⲙ ⲉⲣⲟⲓ ⲇⲓⲁⲯⲁⲗⲙⲁ</ab>
8 ⲁⲡⲛⲟⲩⲧⲉ ϣⲁϫⲉ ϩⲙ ⲡⲉϥⲡⲉⲧⲟⲩⲁⲁⲃ ϫⲉ ϯⲛⲁⲧⲉⲗⲏⲗ ⲧⲁⲡⲉϣⲥⲓⲕⲓⲙⲁ ⲧⲁⲉⲡⲡⲉⲓⲁ ⲛⲛⲉⲥⲕⲏⲛⲏ</ab>
9 ⲡⲱⲓ ⲡⲉ ⲅⲁⲗⲁⲁⲇ ⲡⲱⲓ ⲡⲉ ⲙⲁⲛⲁⲥⲥⲏ ⲉⲫⲣⲁⲓⲙ ⲡⲉ ⲡⲧⲁϫⲣⲟ ⲛⲧⲁⲁⲡⲉ ⲓⲟⲩⲇⲁⲥ ⲡⲉ ⲡⲁⲣⲣⲟ</ab>
10 ⲙⲱⲁⲃ ⲡⲉ ⲡⲗⲉⲃⲏⲥ ⲛⲧⲁϩⲉⲗⲡⲓⲥ ϯⲛⲁⲥⲟⲟⲩⲧⲛ ⲙⲡⲁⲧⲟⲟⲩⲉ ⲉϫⲛ ϯⲇⲟⲩⲙⲁⲓⲁ ⲛⲧⲁⲛⲁⲗⲗⲟⲫⲩⲗⲟⲥ ϩⲩⲡⲟⲧⲁⲥⲥⲉ ⲛⲁⲓ</ab>
11 ⲛⲓⲙ ⲡⲉⲧⲛⲁϫⲓⲧⲧ ⲉⲧⲡⲟⲗⲓⲥ ⲉⲧⲕⲧⲏⲩ ⲛⲓⲙ ⲡⲉⲧⲛⲁϫⲓⲙⲟⲉⲓⲧ ϩⲏⲧ ϣⲁ ϯⲇⲟⲩⲙⲁⲓⲁ</ab>
12 ⲙⲏ ⲛⲧⲟⲕ ⲁⲛ ⲡⲉ ⲡⲛⲟⲩⲧⲉ ⲛⲧⲁⲕⲕⲁⲁⲛ ⲛⲥⲱⲕ ⲉⲛⲅⲛⲏⲩ ⲁⲛ ⲉⲃⲟⲗ ⲡⲛⲟⲩⲧⲉ ϩⲛ ⲛⲉⲛⲙⲏⲏϣⲉ</ab>
13 ⲡϫⲟⲉⲓⲥ ⲙⲁ ⲛⲁⲛ ⲛⲟⲩⲃⲟⲏⲑⲓⲁ ϩⲛ ⲛⲉⲛⲑⲗⲓⲯⲓⲥ ⲁⲩⲱ ⲡⲟⲩϫⲁⲓ ⲙⲡⲣⲱⲙⲉ ϣⲟⲩⲉⲓⲧ</ab>
14 ϩⲙ ⲡⲉⲛⲛⲟⲩⲧⲉ ⲧⲛⲛⲁⲣⲟⲩϭⲟⲙ ⲁⲩⲱ ⲛⲧⲟϥ ⲡⲉⲧⲛⲁⲥⲱϣϥ ⲛⲛⲉⲧⲑⲗⲓⲃⲉ ⲙⲙⲟⲛ</ab>