1 ⲛⲧⲟϣ ⲇⲉ ⲛⲛϣⲏⲣⲉ ⲛⲓⲱⲥⲏϥ ⲁⲩϣⲱⲡⲉ ϫⲓⲛ ⲡⲓⲟⲣⲇⲁⲛⲏⲥ ⲡⲉⲧⲙⲡⲉⲙⲧⲟ ⲉⲃⲟⲗ ⲛϩⲓⲉⲣⲓⲭⲱ ϫⲓⲛ ⲙⲙⲁ ⲛϣⲁ ⲁⲩⲱ ⲥⲉⲛⲁⲉⲓ ⲉϩⲣⲁⲓ ϫⲓⲛ ϩⲓⲉⲣⲓⲭⲱ ⲉⲧⲟⲣⲓⲛⲏ ⲉⲧⲉⲣⲏⲙⲟⲥ ⲡⲕⲁϩ ⲉⲧϫⲟⲥⲉ ⲉϩⲣⲁⲓ ⲉⲃⲁⲓⲑⲓⲏⲗ ⲗⲟⲩⲍⲁ</ab>
2 ⲁⲩⲱ ⲥⲉⲛⲁⲉⲓ ⲉⲃⲟⲗ ⲉⲃⲁⲓⲑⲏⲗ ⲁⲩⲱ ⲥⲉⲛⲁⲛⲟⲩϫⲉ ⲉϫⲛ ⲛⲧⲟϣ ⲛⲁⲕⲕⲁⲣⲱⲛ</ab>
3 ⲁⲩⲱ ⲥⲉⲛⲁϫⲱⲧⲉ ⲉϫⲛ ⲑⲁⲗⲁⲥⲥⲁ ⲉϫⲛ ⲛⲛⲧⲟϣ ⲙⲡⲧⲁⲗⲁⲓⲙ ϣⲁϩⲣⲁⲓ ⲉⲛⲧⲟϣ ⲛⲃⲁⲓⲑⲟⲣⲱⲛ ⲧⲉⲧϩⲙ ⲡϩⲃⲃⲉ ⲁⲩⲱ ⲡⲉⲩⲉⲓ ⲉⲃⲟⲗ ⲉϥⲛⲏⲩ ⲉϫⲛ ⲑⲁⲗⲁⲥⲥⲁ</ab>
4 ⲁⲩⲱ ⲁⲩⲕⲗⲏⲣⲟⲛⲟⲙⲉⲓ ⲛϭⲓ ⲛϣⲏⲣⲉ ⲛⲓⲱⲥⲏⲫ ⲛⲉⲫⲣⲁⲓⲙ ⲙⲛ ⲙⲁⲛⲁⲥⲥⲏ ⲕⲁⲧⲁ ⲛⲉⲩⲇⲏⲙⲟⲥ</ab>
5 ⲁⲩϣⲱⲡⲉ ⲛϭⲓ ⲛⲧⲟϣ ⲛⲧⲉⲩⲕⲗⲏⲣⲟⲛⲟⲙⲓⲁ ⲕⲁⲧⲁ ⲙⲁⲛϣⲁ ⲁⲧⲇⲁⲣⲱⲑ ⲙⲛ ⲟⲣⲟⲭ ϣⲁϩⲣⲁⲓ ⲉⲃⲉⲑⲟⲣⲱⲛ ⲧⲉⲧϩⲓ ⲧⲡⲉ ⲁⲩⲱ ⲅⲁⲍⲁⲣⲁ</ab>
6 ⲁⲩⲱ ⲥⲉⲛⲁϫⲱⲧⲉ ⲛϭⲓ ⲛⲧⲟϣ ⲉϫⲛ ⲑⲁⲗⲁⲥⲥⲁ ⲉϩⲣⲁⲓ ⲉⲓⲕⲁⲑⲙⲱⲛ ϫⲓⲛ ⲙⲡⲉⲙϩⲓⲧ ⲛⲑⲉⲣⲅⲁⲙ ⲥⲉⲛⲁⲟⲩⲱⲧⲃ ⲉⲙⲙⲁ ⲛϣⲁ ⲉϩⲣⲁⲓ ⲉⲑⲏⲛⲁⲥⲁ ⲙⲛ ⲥⲉⲗⲗⲏⲥⲁ ⲁⲩⲱ ⲥⲉⲛⲁϫⲱⲧⲉ ϫⲓⲛ ⲙⲙⲁ ⲛϣⲁ ⲉϩⲣⲁⲓ ⲉⲛⲁⲛⲱⲑⲁ</ab>
7 ⲁⲩⲱ ⲉϩⲣⲁⲓ ⲉⲙⲁⲣⲁⲭⲱ ⲁⲩⲱ ⲉⲧⲁⲣⲱⲑ ⲙⲛ ⲛⲉⲩⲕⲉⲧⲙⲉ ⲁⲩⲱ ⲥⲉⲛⲁⲉⲓ ⲉⲃⲟⲗ ϫⲓⲛ ϩⲓⲉⲣⲓⲭⲱ ⲁⲩⲱ ⲥⲉⲛⲁⲛⲟⲩϫⲉ ⲉⲃⲟⲗ ϫⲓⲛ ⲡⲓⲟⲣⲇⲁⲛⲏⲥ</ab>
8 ⲁⲩⲱ ϫⲓⲛ ⲧⲁⲫⲟⲩ ⲥⲉⲛⲁⲱⲥⲕ ⲛϭⲓ ⲛⲧⲟϣ ⲉϫⲛ ⲑⲁⲗⲁⲥⲥⲁ ⲁⲩⲱ ⲉϫⲛ ⲭⲉⲗⲕⲁⲛⲁ ⲁⲩⲱ ⲡⲉⲩⲉⲓ ⲉⲃⲟⲗ ⲉϫⲛ ⲑⲁⲗⲁⲥⲥⲁ ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛⲧⲉⲫⲩⲗⲏ ⲛⲉⲫⲣⲁⲓⲙ ⲕⲁⲧⲁ ⲛⲉⲩⲇⲏⲙⲟⲥ</ab>
9 ⲁⲩⲱ ⲙⲡⲟⲗⲓⲥ ⲉⲛⲧⲁⲩⲡⲟⲣϫⲟⲩ ⲉⲃⲟⲗ ⲛⲛϣⲏⲣⲉ ⲛⲉⲫⲣⲁⲓⲙ ϩⲛ ⲧⲙⲏⲧⲉ ⲛⲧⲉⲕⲗⲏⲣⲟⲛⲟⲙⲓⲁ ⲛⲛϣⲏⲣⲉ ⲙⲙⲁⲛⲁⲥⲥⲏ ⲙⲡⲟⲗⲓⲥ ⲧⲏⲣⲟⲩ ⲙⲛ ⲛⲉⲩⲕⲉⲧⲙⲉ</ab>
10 ⲁⲩⲱ ⲙⲡⲉⲉⲫⲣⲁⲓⲙ ⲧⲁⲕⲟ ⲙⲡⲉⲭⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛ ⲅⲁⲍⲉⲣ ⲁϥⲟⲩⲟϩ ⲙⲛⲉⲫⲣⲁⲓⲙ ϣⲁϩⲣⲁⲓ ⲉⲡⲟⲟⲩ ⲛϩⲟⲟⲩ ϣⲁⲛⲧϥⲉⲓ ⲉϩⲣⲁⲓ ⲛϭⲓ ⲫⲁⲣⲁⲱ ⲡⲣⲣⲟ ⲛⲕⲏⲙⲉ ⲛϥϫⲓⲧⲥ ⲛϥⲣⲟⲕϩⲥ ϩⲛ ⲟⲩⲥⲁⲧⲉ ⲁⲩⲱ ⲛⲉⲭⲁⲛⲁⲛⲁⲓⲟⲥ ⲙⲛ ⲛⲉⲫⲉⲣⲉⲍⲁⲓⲟⲥ ⲛⲉⲧⲟⲩⲏϩ ϩⲛ ⲅⲁⲍⲉⲣ ⲁϥⲧⲁⲕⲟⲟⲩ ⲁⲩⲱ ⲁϥⲧⲁⲁⲥ ⲛϭⲓ ⲫⲁⲣⲁⲱ ⲛϭⲣⲏϭⲉ ⲛⲧⲉϥϣⲉⲉⲣⲉ</ab>