1 पेन्तुस वोना पिरान्त मा जायके तीन दिवस बाद कैसरिया लक येरुसलेम नगर गयो।
2 वहान यहूदी अना मोठो याजक अना यहुदी को नेतागीन पौलुस पर नालिस लगावन वोको जवर आइन।
3 अना फेस्तुस लक यो बिनती करीन, का उ पौलुस ला येरुसलेम नगर बुलावन की किरपा करे। काहेकी पौलुस ला रास्ता मा च मार डाकन को पिलान करी होतीन।
4 पर फेस्तुस न यो जवाब देईस “पौलुस कैसरिया मा बंन्दी से, मी खुदच गदने वहान जावन वारा सेऊ।”
5 “तुमी मा लक जोन मुख मानूस मोरो संग कैसरिया जा सका सेत। अना उना कोनी खोटो काम करीसेस ता वहान ओको पर दोस लगा सकासेत।”
6 फेस्तुस अखिन आठ, दहा दिवस उनको संग रव्ह के कैसरिया ला चलीगयो। दुसरो दिवस ओना अदालत मा बसके हुकूम देइस। की पौलुस ला आनयो जाय।
7 जबा पौलुस वहान पहुचयो। तबा वय यहुदी जोन येरुसलेम लक आयो होतीन। वय वोको चारो कन उभो होय गईन। अना ओको पर असो गंभीर आरोप लगावन लगीन, जिनको उनको कठा कोनी सबुत नही होतो।
8 पर पौलुस ना आपरो बचाव मा कहीस, “मिना ना ता यहूदी गीन की कानुन, न मंदिर अना ना च रोमन राजपाल को विरोध कोनी खोटो काम करीसेऊ।”
9 पर फेस्तुस ना यहूदी गीन ला खुस करनो चाव्हत होतो। एकोलाय उ पौलुस ला साँगीस, “का तु येरुसलेम जावनो चाव्हसेस। जोनलक वहान तोरो न्याय करुँ?”
10 पौलुस ना कहीस, मि यो बेरा मी रोमन को राजपाल को नियाव आसन को पुढ़ा उभो सेऊ। मोरो न्याय यँहाच करयो जाय। तुमी साजरो लक जानासेव का मिना यहूदी गीन को काही भी गलती नही करीसेव।
11 अदी मीना इनको नियम को बिरोध मा या मार डाखन लाय कोनी खोटो काम करिसेऊ। ता मी मरन लाय तैयार सेऊ। पर लोकगिन जोन आरोप मोरो पर लगावसो उनमा कोनी गोस्टी खरो नाहती ता कोनी भी मोला इनको सुपरुत कर नही सका। “यो मोरी रोमन राजपाल लक बिनती से।”
12 तबा फेस्तुस ना आपरी बैठक लक सलाह लेवन को मघा साँगीस, “तु ना रोमन राज पाल लक बिनती करीसेस, ता तु रोमन राजपाल कठा उभो होवजोस।”
13 जबा लगत दिवस बित गईन ता राजा अग्रिप्पा ना आपरी बहिन बिरनीके को संग कैसरिया आयके फेस्तुस ला भेंट करीस।
14 उनको लगत दिवस वहान रव्हन को मघा, फेस्तुस ना पौलुस को मुकदमा को बारेमा राजा ला सब गोस्टी समझायो “यो एक असो मानूस से जेनला फेलिक्स बँदी को रुपमा छोड़ गयो सेत। राखी
15 जबा मि येरुसलेम मा होतो, ता मुखिया याजक अना यहूदी को बुजरुक गिनना ओको विरोध मा दोस लगायो, अना बिनती करिया की ओला सजा देव।
16 तबा मिना उन ला साँगियो की रोमी की यो नियम नाहती। कोनी मानूस जबा तकन की दोस लगावन वालो को पुढ़ा होयके, आपरो बचाव मा जवाब देवन को मौका नही मिलहेत। तब तकन, ओला सजा को लाई कोनी सुपरुत नही कर सकत।
17 असो रिति लक जबा वय यहान एकठ्ठो भईन। ता मिना बिना उसीर करया दुसरो रोज अदालत मा बसके ओना मानूस ला आनन की हुकूम दियो।
18 जबा वोको नालीस करन वारा उभो भइन, ता उनना असो कोनी खोटो गोस्टी को दोस नही लगायो, जसो मी समझत होतो।
19 बलकी वय सब आपरो धरम को काही गोस्टी पर, यीसु नाव को एक मानूस, जोन मर गयो से। पौलुस ओला जित्तो को साँगत होतो। वोको परच मतभेत को चरचा होतो।
20 मी उलझन मा होतो का एना गोस्टी को पता कसो लगाऊ? एको लाई मीना वोको लक पुसयो, का तू यरुसलेम जावनो चाव्हासेस? जोनलक एना गोस्टी को बारेमा निवाव होहे।
21 पर पौलुस ना जबा बिनती करयो का वोको सुनवाई राजा को जवर कियो जाय। ता मीना हुकूम दियो का जबा तकन मी वोला कैसर को जवर न धाड देहू, उ यहाच जेल मा रव्हे।”
22 तबा अग्रिप्पा न फेस्तुस लक कहीस “मी खुदच भी एना मानूस की सुनवाई करनो चाव्हसेऊ।” वोना कहीस “तु काल आयक लेव जोस।”
23 अना दुसरो दिवस जबा अग्रिप्पा अना बिरनीके मोठो धुम-धाम लक आय के अखीन सेनानायक गीन अना नगर को माननिय मानूस गीन को संग उनना सभाघर मा धसीन। तबा फेस्तुस की हुकूम लक पौलुस ला आनयो गयो।
24 फेस्तुस न कहीस, राजा अग्रिप्पा, अना हमरो संग हजीर सज्जन गीन, एना मानूस ला चोवो सो। जेनको बिसय मा सप्पा यहूदी लोक न येरुसलेम नगर मा अना यहान भी चिल्लाय चिल्लायके मोरो लक सिकायत करत होतिन का “अबा एको जित्तो होवनो बेस नहीं से।”
25 पर मोला पता लगयो का एना असो कोनी काम नही करयो सेस। का एला मिरतु की साजा दियो जाय। अखीन एना खुदच राजाको राजा दुबारा बिचार लाय बिनती करीसेस। एकोलाय मीना एला धाड देवन को फैसला करीयो सेऊ।
26 मंग मोरो जवर एको बिसय मा अपरो मालीक ला लिखन को लाई कोनी पक्की गोस्टी नाहती। एको लाई मी वोला तुमी सब को पुड़ा, खास लक राजा अग्रिप्पा तोरो पुड़ा, आनीसेऊ। जेकि जाँच पूरो होवनो पर मोला काही लिखन ला मिल जाय।
27 काहेकी मोला यो बेअरथ मालुम होवासे। का कोनी बन्दी ला वोको आरोप की चिठ्ठी तैय्यार करयो बिना धाड देहू।