1 फुक्क जातिं खुसि छीधुंकाः परमप्रभुं यहोशूयात धयादिल,
2 “छगू छगू कुलं छम्ह छम्ह यानाः झिंनिम्ह मिजंत ल्य।
3 अले इमित यर्दन खुसिया दथुइ पुजाहारीत दनाच्वंगु थासं झिंनिगः ल्वहं कयाहयेत उजं ब्यु। उपिं ल्वहंत क्वबियायंकाः छनापं थौं चान्हय् बाय् च्वनेगु थासय् तयाबीत इमित धा।”
4 उकिं यहोशूं छगू छगू कुलं छम्ह छम्ह यानाः थःम्हं ल्यःपिं झिंनिम्ह मिजंतय्त सःतल।
5 वं इमित धाल, “परमप्रभु छिमि परमेश्वरयागु सनूया न्ह्यःने यर्दनया दथुइ हुँ। अनं छिपिं छम्ह छम्हं इस्राएलया झिंनिगू कुलकथं छग्वः छग्वः ल्वहँ ल्ह्वनाः थथःगु ब्वहलय् पाछायाहजि।
6 छिमिगु दथुइ थुपिं ल्वहंत छगू चिं जुइमा। लिपा छिमि मचाखाचातय्सं, ‘थुपिं ल्वहंतय्गु अर्थ छु खः?’ धकाः न्यन धाःसा
7 इमित थथे धा, ‘परमप्रभुया बाचा चिनादीगु सनू खुसि छ्यूबलय् उकिया न्ह्यःने यर्दनय् लः दीगु खः। थुपिं ल्वहंतय्सं इस्राएली मनूतय्त थन छु जूगु खः धयागु खँ न्ह्याबलेंया लागिं लुमंकाबी।’”
8 यहोशूं ब्यूगु थ्व उजंकथं इस्राएलीतय्सं यात। परमप्रभुं यहोशूयात धयादीगु थें हे इमिसं झिंनिगू कुलकथं यर्दनया दथुं झिंनिगः ल्वहं हयाः इपिं च्वनाच्वंगु थासय् तल।
9 यर्दनया दथुइ बाचा चिनादीगु सनू क्वबियाच्वंपिं पुजाहारीत दनाच्वंगु थासय् यहोशूं नं झिंनिगः ल्वहं थन, उपिं आः तक नं अन हे दनी।
10 परमप्रभुं यहोशूयात मनूतय्त या धकाः धायेत उजं बियादीगु फुक्क पूमवंतलय् सनू क्वबिपिं पुजाहारीत यर्दन खुसिया दथुइ दनाच्वन। इमिसं मोशां यहोशूयात उजं ब्यूगु फुक्क यात। मनूत हथाय् चाचां खुसि छिनावनाच्वन।
11 अले मनूत खुसिया उखे थ्यनेवं मनूतय्सं खंक हे पुजाहारीत नं परमप्रभुया सनूनापं खुसि छिनावन।
12 मोशां इमित धाःथें रूबेनया कुल गादया कुल व मनश्शेया बच्छि कुलया मिजंतय्सं ल्वाभः ज्वनाः इस्राएलीतय् न्ह्यःने हे खुसि छिनावन।
13 इमि ल्वाभः ज्वनातःपिं पिइद्वः (४०,०००) ति मिजंत लडाइँ यायेत परमप्रभुया न्ह्यःने खुसि छिनाः यरीहोया मैदानपाखे वन।
14 उखुन्हु हे इस्राएलीतय्गु न्ह्यःने परमप्रभुं यहोशूयात तःधंकल। इमिसं वयात मोशायात थें हे वयागु जिवंकाछि हनाबना यात।
15 अले परमप्रभुं यहोशूयात धयादिल,
16 “साक्षीया सनू क्वबिपिं पुजाहारीतय्त यर्दनं पिहां वा धकाः उजं ब्यु।”
17 उकिं यहोशूं पुजाहारीतय्त, “यर्दनं पिहां वा” धकाः उजं बिल।
18 परमप्रभुया बाचा चिनादीगु सनू क्वबिपिं पुजाहारीत यर्दनया दथुं पिहां वयाः सिथय् पलाः तयेवं यर्दनया लः थःगु थासय् लिहां वल व न्हापा थें तःजाः जुयाः न्ह्यात।
19 इस्राएलीतय्सं न्हापांगु लाया झिगूगु न्हिखुन्हु यर्दनं वयाः यरीहोया पुर्बय् लाःगु गिलगालय् पाल ग्वयाः बाय् च्वन।
20 यहोशूं अन यर्दनं हःगु झिंनिगः ल्वहँ थन।
21 वं इस्राएलीतय्त थथे धाल, “छिमि मचाखाचातय्सं लिपा छुं जुयाः थः बौपिन्त थुपिं ल्वहंतय्गु अर्थ छु खः धकाः न्यन धाःसा,
22 अबलय् छिमिसं इमित थथे धा, ‘इस्राएलीत गंगु बँ जुयाः यर्दन खुसि छिनावःगु खः।’
23 झीपिं लाल समुद्र छिना मवंतले गथे परमप्रभु छिमि परमेश्वरं लाल समुद्रया लः चीकाः गंकादीगु खः अथे हे परमप्रभु छिमि परमेश्वरं झीपिं यर्दन खुसि छिना मवंतले झीगु न्ह्यःने यर्दनयात गंकादिल।
24 पृथ्वीइ च्वंपिं फुक्क मनूतय्सं परमप्रभुया ल्हाः बल्ला धकाः सीमा अले छिमिसं न्ह्याबलें परमप्रभु छिमि परमेश्वरयागु ग्याःचिकु कायेमा धकाः थ्व फुक्क जूगु खः।”