1 ताःई लिपा परमप्रभुं इस्राएलीतय्त प्यखेरं च्वंपिं फुक्क शत्रुतपाखें आराम बियादिल। अबलय् तक तसकं बुरा जुइ धुंकूम्ह यहोशूं
2 सकलें इस्राएलीतय्त, इमि थकालित, नायःत, न्याय याइपिं व भारदारतय्त सःताः धाल, “जि आः तसकं बुरा जुइ धुंकल।
3 छिमिगु निंतिं परमप्रभु छिमि परमेश्वरं थुपिं फुक्क जातितय्त छु छु यानादिल, व फुक्क खंगु दु। छिमिगु निंतिं लडाइँ यानादीम्ह छिमि परमप्रभु परमेश्वर खः।
4 जिं गथे यानाः यर्दन खुसिंनिसें पच्छिमय् भूमध्यसागर तकयापिं जिं त्याकाःपिं अले ल्यंदुपिं जातितय्गु फुक्क इलाका चिट्ठा ततं छिमिगु कुलतय्त सर्बयकथं इनाबियागु खः व लुमंकि।
5 परमप्रभु छिमि परमेश्वर थःम्हं हे छिमिगु न्ह्यःने इमित पित छ्वयादी। अले परमप्रभु छिमि परमेश्वरं धयादी थें छिमिसं इमिगु देश अधिकार याइ।
6 “तसकं बल्ला जु। मोशायागु व्यवस्थाया सफुलिइ च्वयातःगु फुक्क खँ बांलाक मानय् या। उकिं छिपिं जव खवय् वने मते।
7 छिमिगु दथुइ ल्यंदुपिं थुपिं जातितनापं स्वापु तये मते, इमि द्यःतय्गु नां काये मते, इमिगु नामय् पाफये मते। इमित पुजा याये मते अले इमित भागियाये मते।
8 तर छिमिसं थौं तक याःथें परमप्रभु छिमि परमेश्वरनापं जुयाच्वँ।
9 “परमप्रभुं छिमिगु न्ह्यःनें ततःधंगु व बल्लाःगु जातितय्त पित छ्वयादीगु दु। थौं तक सु नं छिमिगु न्ह्यःने दनाच्वने मफुत।
10 छिमि छम्हय्सिनं द्वःछिम्हय्सित लिनाछ्वये फइ, छाय्धाःसा परमप्रभुं थःगु बचंकथं छिमिगु निंतिं ल्वानादी।
11 अथे जुयाः परमप्रभु छिमि परमेश्वरयात माया यायेत बांलाक ध्यान ब्यु।
12 “छिमिसं परमेश्वरयात त्वःतल धाःसा अले छिमिगु दथुइ ल्यंदुपिं जातितलिसें स्वापु तल धाःसा अले इपिंलिसें ब्याहा यात धाःसा
13 परमप्रभु छिमि परमेश्वरं थुपिं जातितय्त छिमिगु न्ह्यःनें पित छ्वयादी मखु धयागु खँ सीका का, तर इपिं छिमिगु लागिं तक्यंकीगु जाः व स्वःतिपाँय् जुइ अले छिमिगु म्ह ल्युने कोर्रा व मिखाय् कँ जुइ। अले परमप्रभु छिमि परमेश्वरं छिमित बियादीगु थ्व भिंगु थासं छिपिं मदया मवंतले थ्व खँ जुया हे च्वनी।
14 “आः जि सीत्यंगु दु। परमप्रभु छिमि परमेश्वरया फुक्क बचं पूवंगु दु, छगू नं पूमवंगु मदु धयागु खँ छिमिसं थथःगु नुगः व आत्मां सि हे स्यू।
15 तर परमप्रभु छिमि परमेश्वरयागु फुक्क भिंगु बचं पूवंगु थें वय्कलं छिमित बियादीगु थ्व भिंगु देशं छिमित नाश यानामदीतले वय्कलं छिमिथाय् फुक्क विपत्ति नं छ्वयाहयादी।
16 परमप्रभु छिमि परमेश्वरं छिपिंलिसें चिनादीगु बाचा छिमिसं मानय् मयात धाःसा अले मेपिं द्यःतय्गु सेवा व पुजायात धाःसा वय्कलं थःगु तम्वय् छिमित सजाँय बियादी। अले वय्कलं छिमित बियादीगु थ्व भिंगु देशं छिपिं याकनं नाश जुयावनी।”