1 थ्व खँ न्यनाः हासोरया जुजु याबीनं मादोनयाम्ह जुजु योबाबयात, शिम्रोन व अक्षापयापिं जुजुपिन्त,
2 उत्तरया पहाडी देशय् च्वपिं जुजुपिन्त, गालील समुद्रया दच्छिनयागु अराबाय् दुपिं जुजुपिन्त अले पच्छिमया फेदीइ दुपिं जुजुपिन्त व पच्छिमय् नेपोत डोरय् दुपिं जुजुपिन्त,
3 पुर्ब व पच्छिमयापिं कनानीतय् जुजुपिन्त, एमोरीतय्त, हित्तीतय्त, परिज्जीतय्त व पहाडी देशय् च्वंपिं यबूसीतय्त अले मिस्पा देशया हेर्मोन पर्वतयागु क्वय् पाखेयापिं हिव्वीतय्त सःतके छ्वल।
4 इपिं थःपिनि सेना ज्वनाः वल। इमिगु ल्याः यक्व अप्वः दु, समुद्र सिथया फि थें इमिके यक्व सल व रथ नं दु।
5 थुपिं सकलें जुजुपिं छथाय् मुनाः इस्राएलीतलिसें ल्वायेत मेरोम धाःगु तालया न्ह्यःने नापनापं छाउनी तल।
6 परमप्रभुं यहोशूयात धयादिल, “इपिं खनाः ग्याये मते, छाय्धाःसा कन्हय् थुबलय् हे इपिं स्याःपिं सकसितं जिं इस्राएलीतय्गु ल्हातय् तयाबी। छं इमि सलतय्गु तुतिख्वःया लिउने च्वंगु सँय्प्वाँय् चानाब्यु, अले इमिगु रथत मिं छ्वय्काब्यु।”
7 उकिं यहोशू थः सिपाइँतनापं मेरोम नांयागु तालया न्ह्यःने आकाझाकां थ्यंकवयाः इमित हमला यात।
8 अले परमप्रभुं इमित इस्राएलीतय्गु ल्हातय् बियादिल। व इस्राएलीतय्सं इमित बुकाः उत्तरय् तःधंगु सीदोन व मिश्रपोत-मैम तक अले पुर्बय् मिस्पाया ब्यासि तक लिनायंकल। छम्हय्सित नं बाकि मतसें इस्राएलीतय्सं इमित स्यात।
9 परमप्रभुं आज्ञा बियादीगुकथं यहोशूं इमित यात। वं इमि सलतय्गु पुलिया ल्युने च्वंगु सँय्प्वाँय् चानाबिल अले इमि रथत मिं छ्वय्काबिल।
10 उबलय् यहोशूं लिहां वयाः हासोर त्याका काल, अले अनयाम्ह जुजुयात तरवारं स्यानाबिल। न्हापा हासोर थुपिं फुक्क देशतय् मू देश खः।
11 व शहरय् दुपिं सकसितं तरवारं भज्यंक नाश यानाबिल। छम्हय्सित नं बाकि मतल। अले हासोरयात यहोशूं मि तयाः छ्वय्काबिल।
12 अले थुपिं फुक्क शहरत इमि जुजुपिंनापं यहोशूं त्याका काल, अले परमप्रभुया दास मोशाया आज्ञाकथं इमित तरवारं भज्यंक नाश यानाबिल।
13 यहोशूं हासोर शहर जक छ्वय्काब्यूगु खः। डाँडाया मेगु छुं शहरयात इमिसं मछ्वय्कू।
14 थुपिं शहरतय् दक्व पशुत व धनमाल जुक्व इस्राएलीतय्सं थःगु हे निंतिं काल, मनूतय्त धाःसा इमिसं तरवारं स्यानाबिल। इमि छम्हय्सित नं म्वाःका मतसें नाश यानाबिल।
15 परमप्रभुं थः दास मोशायात बियादीगु आज्ञाकथं मोशां यहोशूयात आज्ञा बिल, अले यहोशूं अथे हे यात। परमप्रभुं मोशायात छु छु आज्ञा बियादीगु खः, यहोशूं उपिं फुक्क पूवंकल।
16 उकिं यहोशूं थुपिं देश त्याका काल – पहाडी देश, दच्छिनय् नेगेवया फुक्क इलाका, पहाडी देशय् वनीगु गोशेनया इलाका, पच्छिमया फेदी, अराबा व इस्राएलया पहाडी देश अले उकिया फेदीत फुक्क हे त्याकाः काःगु खः।
17 दच्छिनय् सेइर पाखेयागु हालाक डाँडांनिसें हेर्मोन पर्वत क्वय्यागु लेबनानय् दुगु ब्यासियागु बाल-गाद तक त्याका काल। वं इमि सकल जुजुपिन्त ज्वनाः स्यात।
18 यहोशू इपिं जुजुपिंलिसें यक्व दिं तक ल्वात।
19 गिबोनय् च्वनिपिं हिव्वीत बाहेक मेगु छुं नं शहरयापिं मनूतय्सं इस्राएलीतलिसें शान्तियागु सन्धि मयाः। फुक्क शहरयात इस्राएलीतय्सं लडाइँ यानाः त्याकल।
20 छाय्धाःसा परमप्रभुं इमिगु नुगः छाय्कादीगु खः, अले इस्राएलीतलिसें ल्वाके ब्यूगु खः, परमप्रभुं मोशायात आज्ञा बियादीगु थें इपिं माया मदय्कं हे सकलें नाश जुइमा धकाः।
21 अबलय् यहोशूं पहाडी देशय् वनाः हेब्रोन, दबीर, अनाब, यहूदा व इस्राएलयागु फुक्क पहाडी देशय् च्वनिपिं अनाकीतय्त नाश यानाबिल। यहोशूं इमिगु शहरनापं इमित भज्यंक नाश यानाबिल।
22 इस्राएलीतय्गु देशय् छम्ह नं अनाकीत ल्यं मन्त। गाजा, गात व अश्दोदय् जक छुं ल्यन।
23 थथे परमप्रभुं मोशायात धयादीगु थें हे यहोशूं फुक्क देश त्याका काल। अले यहोशूं व देश इस्राएलयात सर्बयकथं इमिगु कुल कुल यानाः इनाबिल। अनंलि देशय् शान्ति जुल।