1 परमप्रभुयागु थ्व वचन जिथाय् वल,
2 “अय् सीमानिम्ह मनू, इस्राएलया पर्वततपाखे स्वयाः इमिगु विरोधय् अगमवाणी ल्हा!
3 अले धा, ‘हे इस्राएलया पर्वतत, परमप्रभु परमेश्वरयागु थ्व वचन न्यँ! पर्वतत व डाँडात, खुसिचा व बेँसीतय्त परमप्रभु परमेश्वरं थथे धयादी – स्व, जिं थःम्हं हे छिमिथाय् लडाइँ हयेत्यनागु दु, अले जिं छिमि पुजा याइगु थाय्यात नाश याये।
4 छिमिगु वेदीत तहसनहस जुइ अले छिमिसं धुपाँय् च्याकीगु वेदीत चुंचुं यानाबीगु जुइ, अले जिं छिमि मनूतय्त छिमिगु मूर्तितय्गु न्ह्यःने हे स्यानाबी।
5 जिं इस्राएलीतय्गु सीम्हत इमिगु मूर्तितय्गु न्ह्यःने तयाबी। जिं छिमिगु क्वँय् छिमिगु हे वेदीया प्यखें ह्वलाबी।
6 छिपिं न्ह्याथाय् च्वंसां छिमिगु शहरतय्त तहसनहस यानाबीगु जुइ। अले छिमिगु पुजा यायेगु थाय्त थुनाबीगु जुइ। छिमिगु वेदीत तहसनहस जुइ अले भज्यंक स्यनी। छिमिगु मूर्तित चुंचुं यानाबीगु जुइ, छिमिगु धुपाँय् च्याकीगु वेदीत कुचा कुचा याइगु जुइ। अले छिमिगु ज्या न्हंका छ्वइगु जुइ।
7 छिमि मनूतय्त स्याइगु जुइ, इपिं छिमिगु हे दथुइ ग्वतुली अले छिमिसं जि हे परमप्रभु खः धकाः सी।
8 “‘अय्नं जिं छिपिं मध्ये गुलिंसित बचय् यानाः तये। उकिं छिपिं देश देशय् छ्यालब्याल जुइबलय् जाति जातिया दथुइ छिमि छुं मनूत तरवारं बचय् जुइ।
9 अबलय् छिपिं मध्ये म्वानाच्वंपिन्सं जाति जातितय् दथुइ, गन इमित ज्वना यंकूगु खः, अन जितः लुमंकी। छाय्धाःसा जिपाखें तापानावंगु इमिगु व्यभिचारी नुगःपाखें व इमिगु मूर्तितय् ल्यू वनीगु लोभी मिखातपाखें जि दुःखी जुयागु दु। इमिसं याःगु मभिंगु ज्या व इमिगु फुक्क घच्चाइपुगु ज्याया निंतिं इमिसं थःपिन्त हे घृणा याइ।
10 अले इमिसं जि हे परमप्रभु खः धकाः सी। जिं इमिके विपत्ति हये धकाः अथें धयागु मखु।
11 “‘परमप्रभु परमेश्वरं थथे धयादी, ल्हातं ल्हातय् दा– इस्राएलया घरानाया फुक्क मभिंगु व घच्चाइपुगु ज्याया कारणं तुति बँय् बस्वानाः तसकं हालाः धा– “हाय!” छाय्धाःसा इपिं तरवार, अनिकाल व महामारीं नाश जुइ।
12 तापाक दुपिं महामारीं सी। सतिक दुपिं तरवारं सी अले ल्यनाच्वंपिं व घेराय् लाःपिं धाःसा नये मखना सी। थुकथं जिं थःगु तं इमिके प्वंके।
13 पुजा याइगु फुक्क ततःजाःगु थासय्, फुक्क पर्वतया च्वका च्वकाय्, फुक्क वाउँगु सिमाया क्वय् व इमिसं थःगु मूर्तितय्गु निंतिं नस्वाःगु धुपाँय् च्याकूगु यक्व हः दुगु फुक्क स्वसिमाया क्वय् इमि स्याःपिं मनूतय्गु सीम्ह इमिगु मूर्तितय्गु दथुइ वेदीया प्यखेरं छ्यालब्याल जुयाच्वनीबलय् इमिसं जि हे परमप्रभु खः धकाः सी।
14 उकिं जिं इमिगु विरोधय् थःगु ल्हाः ल्ह्वने। दच्छिनय् च्वंगु मरुभूमिंनिसें उत्तरय् च्वंगु दिब्ला तक हे इपिं च्वनाच्वंगु फुक्क थाय् अर्थात इमिगु देशयात तहसनहस व सुनसान यानाबी। अले इमिसं जि हे परमप्रभु खः धकाः सी।’”