1 हाकनं वं जितः देगःया मू ध्वाखाय् लितहल। जिं देगःया ध्वाखाखलुया क्वय् लः तिकितिकि वयाः पुर्बपाखे वनाच्वंगु खना। देगःया मू ध्वाखा पुर्बपाखे स्वःगु दु। लः देगःया दच्छिनं, वेदीया दच्छिनपाखें क्वय् तिकितिक वयाच्वंगु दु।
2 अले वं जितः उत्तरया मू ध्वाखां पिने हल, अले पिनें पिनें चाःहिकाः पुर्बपाखे स्वःगु ध्वाखाया पिने हल। पुर्बपाखे स्वःगु ध्वाखाया दच्छिनपाखें लः तिकितकि वयाः न्ह्यानाच्वंगु दु।
3 व नापय् याइगु खिपः ल्हातय् ज्वनाः पुर्बपाखे वन, अले वं ५३० मिटर नापय् यात। वं जितः खुसिया उखेपाखे ब्वना यंकल, लः गौचा तक वः।
4 वं मेगु ५३० मिटर नापय् यानाः जितः लखं ब्वना यंकल, लः पुलि तक वः। वं मेगु ५३० मिटर नापय् यात, अले जितः लखं ब्वना यंकल, लः जँ तक वः।
5 वं मेगु ५३० मिटर नापय् यात, तर आः लः थाहां वयाः जिं छी मफइगु खुसि जुल। व लाल कायेजीक तज्जाःगु दु, व सुं छी मफइगु खुसि जूगु दु।
6 वं जितः धाल, “अय् सीमानिम्ह मनू, छं थ्व फुक्क बांलाक स्व!”
7 अन थ्यंबलय् जिं खुसिया निखें यक्व सिमात खना।
8 वं जितः धाल, “थ्व लः पुर्बया लागापाखे न्ह्याइ, अनं क्वय् अराबा जुयाः मृत समुद्रपाखे न्ह्याइ अले मृत समुद्रय् मिलय् जुइ। अले मृत समुद्रया लः साइ।
9 व खुसि न्ह्याःगु थासय् यक्व थीथी कथंयापिं जीवजन्तुत च्वनी। अन यक्व न्या दइ, छाय्धाःसा थ्व लः गन गन वनी अनयागु लः साइ। उकिं थ्व खुसि गन गन थ्यनी, अन न्ह्याम्हं नं म्वाइ।
10 मृत सागरया सिथ सिथ न्या लाइपिं दनाच्वनी। एन-गदींनिसें एन-एग्लैम तक जाः ह्वलिगु थाय् दइ। अन भूमध्यसागरय् थें थीथी कथंयापिं यक्व न्यात दइ।
11 तर उकिया ध्वप व ध्याचा ध्याचा जुयाच्वंगु थाय्यागु लः साइ मखु, तर अनयागु लःयात चिया लागिं तया तइ।
12 खुसिया सिथय् निखेंपाखे थीथी कथंयागु फलयागु सिमात बुया वइ। उमिगु हः सुकूगनावनी मखु। उमिगु फल गुबलें फुइ मखु। उमिसं फुक्क लाय् हे फल बी, छाय्धाःसा उमित प्याकिगु लः पवित्र थासं न्ह्याइगु खः। उमिगु फल नयेत व उमिगु हः ल्वय् लाय्केत जुइ।”
13 परमप्रभु परमेश्वरं थथे धयादी, “इस्राएलया झिंनिगू कुलयात सर्बयया लागि छिमिसं देश इनाबीबलय् देशया सिमाना थथे जुइ। योसेफया लागि निगू भाग जुइ।
14 छिमिसं इमित बराबर यानाः इनाब्यु। थ्व छिमि पुर्खातय्त बी धकाः ल्हाः ल्ह्वनाः पाफयागुलिं थ्व देश छिमिगु सर्बय जुइ।
15 “देशया सिमाना थ्व हे जुइ –
16 अले बेरोतह व सिब्रैम तक (थ्व दमस्कस व हमातया सिमानाया दथुइ दु) थ्व सिमाना थ्यनी। व हौरानया सिमानाया लिक्क दुगु हासेरहात्तीकन तक हे थ्यनी।
17 उत्तरया सिमाना समुद्रंनिसें हसर-एनान तक थ्यनी। दमस्कस व हमातया इलाकात उकिया उत्तरय् लाइ।
18 “पुर्बपाखेयागु सिमाना धाःसा हौरान व दमस्कसया दथुइ, गिलाद व इस्राएल देशया दथुं यर्दन खुसिया लिक्क लिक्क जुयाः वंगु दु। अले व सिमाना मृत समुद्र व तामार तक हे वंगु दु। थ्व पुर्बया सिमाना जुइ।
19 “दच्छिन पाखेयागु सिमाना तामारंनिसें मेरीबा कादेशया बुंगाःचा तक अले मिश्रया बगःया लिक्क लिक्क जुयाः भूमध्यसागर तक थ्यनी। थ्व दच्छिनया सिमाना जुइ।
20 “पच्छिम पाखेयागु सिमाना भूमध्यसागर जुइ, लेबो-हमातया लिक्क च्वंगु सिथ तक। थ्व पच्छिमया सिमाना जुइ।
21 “थ्व देश छिमिसं थःगु निंतिं इस्राएलया कुल कुलकथं इनाब्यु।
22 छिमिसं थ्व देश न्ह्याबलेंया सर्बयकथं थःगु हे निंतिं व छिपिंनापं च्वनाच्वंपिं, काय्म्ह्याय् दुपिं विदेशीतय्गु निंतिं नं इनाब्यु। छिमिसं इमित इस्राएलय् हे बूपिं इस्राएलीत थें ताय्कि। छिपिंनापं हे इस्राएलया कुलतय्गु दथुइ इमित सर्बय दयेमाः।
23 गुम्ह परदेशी गुगु कुलनापं च्वनी, वनापं हे छिमिसं वयागु सर्बय बीमाः” परमप्रभु परमेश्वरं धयादी।