1 “‘परमप्रभु परमेश्वरं थथे धयादी – दुनेया चुकया पुर्बपाखेया मू ध्वाखा वाया खुन्हु तक तिनातयेमाः। विश्रामबार व अमइया दिं जक व चाला च्वनेमाः।
2 शासक पिनेनं ध्वाखाया दलान जुयाः वयेमाः अले ध्वाखाया थांया लिक्क व दनेमाः। पुजाहारीतय्सं शासकयागु होमबलि व मेलबलि छायेमाः। अले व लुखाखलुइ आराधना यानाः पिने पिहां वनेमाः ध्वाखा धाःसा बहनी तक मतीमाः।
3 विश्रामबार व अमइ खुन्हु देशयापिं मनूतय्सं व हे ध्वाखाया खापाय् परमप्रभुया न्ह्यःने आराधना यायेमाः।
4 विश्रामबार खुन्हु शासकं परमप्रभुया निंतिं छायेमाःगु होमबलि थथे जुइमाः- खुम्ह खू मदुपिं चीधिकःपिं भ्याःचात व छम्ह खू मदुम्ह भ्याःचा।
5 छम्ह छम्ह भ्याःचानापं छाइगु अन्नबलि छगू छगू एपा जुइमाः अले चीधिकःपिं भ्याःचातनापं छाइगु अन्नबलि थःत गुलि बी मास्ति वः उलि छायेमाः। व बाहेक छगू छगू एपा नापं छगू हीन चिकं छायेमाः।
6 अमइ खुन्हु वं छम्ह द्वहंचा, खुम्ह चीधिकःपिं भ्याःचा व छम्ह भ्याःचा छायेमाः। उपिं दक्व खू मदुपिं जुइमाः।
7 वं छम्ह द्वहंनापं छगू एपा व छम्ह छम्ह भ्याःचानापं छगू छगू एपा अन्नबलि छायेमाः। खुम्ह चीधिकःपिं भ्याःचातनापं छाइगु अन्नबलि थःत गुलि बी मास्ति वः। उलि नापं छगू छगू एपाया निंतिं छगू छगू हीन चिकं तनाः छायेमाः।
8 शासक दुहां वइबलय् व मू ध्वाखाया दलान जुयाः दुहां वयेमाः अले व हे लँ जुयाः पिहां वनेमाः।
9 “‘क्वःछिनातःगु नखःचखःया दिनय् मनूत परमप्रभुया न्ह्यःने वइबलय् उत्तरया मू ध्वाखां आराधना यायेत दुने दुहां वनीम्ह मनू दच्छिनया मू ध्वाखां पिहां वनेमाः। दच्छिनया मू ध्वाखां दुहां वनीम्ह मनू धाःसा उत्तरया मू ध्वाखां पिहां वनेमाः। दुने दुहां वःगु ध्वाखां सुं नं पिहां मवनेमाः। तर तप्यंक पिहां वनेमाः।
10 इपिं दुहां वइबलय् इमिगु दथुइ च्वनाः शासक वयेमाः अले शासक पिहां वनीबलय् इपिंनापं हे पिहां वनेमाः।
11 “‘नखःचखः व नखःचखःया क्वःछिनातःगु दिनय् अन्नबलि धाःसा छगू एपा छम्ह द्वहंचानापं, छगू एपा छम्ह भ्याःचानापं, व चीधिकःम्ह भ्याःचानापं थःत गुलि बी मास्ति वः उलि छायेमाः। छगू छगू एपानापं छगू छगू हीन चिकं छायेमाः।
12 “‘शासकं परमप्रभुयात थःयसें होमबलि वा मेलबलि छाइबलय् वयागु निंतिं पुर्बपाखे स्वःगु मू ध्वाखा चाय्काबीमाः। वं थःगु होमबलि व मेलबलि विश्रामबार खुन्हु छाःगु थें हे छायेमाः। व पिहां वने धुंकाः खापा तीमाः।
13 “‘छिमिसं परमप्रभुया निंतिं दच्छि दुम्ह छम्ह भ्याःचा न्हियान्हिथं होमबलि यानाः छा। छिमिसं थथे सुथ पतिकं या।
14 वनापं सुथ पतिकं अन्नबलि एपाया खुब्वय् छब्व व छुचुंनापं ल्वाकछ्यायेत हीनया स्वब्वय् छब्व चिकं बीमाः। परमप्रभुयात थ्व अन्नबलि छायेगु न्ह्याबलेंयागु विधि खः।
15 थुकथं सुथ पतिकं मदिक्क होमबलि यानाः भ्याःचा, अन्नबलि व चिकं छायेमाः।
16 “‘परमप्रभु परमेश्वरं थथे धयादी – शासकं थः सुं छम्ह काय्यात थःगु सर्बयपाखें दान बिल धाःसा व दान वया सन्तानयागु नं जुइमाः। व वयागु सर्बययागु छगू ब्व जुइ।
17 तर वं थज्याःगु दान दासत मध्ये छम्हय्सित बिल धाःसा, दासत्वपाखें मुक्त जुइगु दँ तक जक वयागु जुइमा। अनंलि हाकनं व शासकयागु हे जुइ। वयागु सर्बय थः काय्पिनिगु जक जुइ, व इमिगु हे जुइ।
18 शासकं मनूतय्त थःगु जग्गा जमिनं पितिनाछ्वयाः इमिगु सर्बय लाकाकाये मज्यू। वं थःगु हे जग्गा जमिनं छुं ब्व थः काय्पिन्त सर्बय कथं बीमाः थुकथं जिम्ह सुं मनूयात वयागु थःगु जग्गा जमिनपाखें अलग याइ मखु।’”
19 अले उम्ह मनुखं जितः मू ध्वाखाया छखेपाखेयागु लुखां उत्तरपाखे स्वःगु पवित्र क्वथाय् हल, गुगु क्वथा पुजाहारीतय्गु लागि अलग तयातःगु खः। अले पच्छिमयागु छगू कुन्चाय् जितः छगूथाय् क्यन।
20 “थ्व थाय् पुजाहारीतय्सं दोषबलि व शुद्ध जुइगु बलियागु ला दय्कीगु व अन्नबलि छाःगु छुचुनं मरि दय्कीगु थाय् खः। थथे पुजाहारीतय्गु थासय् याये हे माः। मखुसा थ्व पबित्र नसा चुकय् यंकीगुलिं अन च्वंपिन्त पवित्रतां सी हे माःगु खः।”
21 अनंलि वं जितः पिनेया चुकय् यंकाः चुकया पेगुलिं कुन्चाय् चाःहिकल। जिं फुक्क कुन्चाय् छगू चिधंगु चुक खना।
22 जिं फुक्क कुन्चाय् छगू भुतू क्वथा खना। थुपिं भुतू क्वथात छगू हे नापयागु खः, २१ मिटर ताहाकः व १६ मिटर तब्या।
23 प्यंगू भुतू क्वथाया प्यखेंपाखे ल्वहंया फः दु। उपिं फःया क्वय् प्यखेरं भुतू दय्कातःगु दु।
24 वं जितः धाल, “थ्व देगलय् सेवा याइपिन्सं मनूतय्सं छायेहःगु बलित दय्कीगु भुतू क्वथात खः।”