1 परमप्रभुयागु थ्व वचन जिथाय् वल,
2 “अय् सीमानिम्ह मनू, छु छं वयागु न्याय याये, मखु ला? छु छं थ्व ज्यानमारा शहरया न्याय याये, मखु ला? छं वयागु फुक्क घच्चाइपुगु ज्या वयात कनाब्यु।
3 अले वयात थथे धा, परमप्रभु परमेश्वरं थथे धयादी, ‘हे शहर, थःत अशुद्ध यायेत मूर्तित दय्कूम्ह, थःगु हे अन्तया ई हयेत, थःगु हे दथुइ हि बाः वय्कूम्ह शहर!
4 छं बाः वय्कूगु हिं यानाः छ दोषी जूगु दु। छं दय्कूगु मूर्तिं यानाः छ अशुद्ध जूगु दु। छंगु नाशया दिं वये धुंकल। छंगु ई फुत। जिं छन्त संसार न्यंकं न्हीकीगु खँ यानाबी। फुक्क देशं छन्त हेस्याइ।
5 अय् बदनाम व अलमलं जाःगु शहर, छंगु लिक्क व तापाक च्वंपिन्सं छन्त लाय्बुइ।
6 “‘स्व! छंगु पःखाः दुने दुपिं सकलें शासकतय्सं गय् यानाः थःगु बल मनू स्यायेगुलिइ छ्यलाच्वंगु।
7 छंके हे इमिसं थः मां बौयात हेला यात, विदेशीतय्त अत्याचार यात, अले मांबौ मदुपिं मस्त व भाःत मदुपिं मिस्तय्त बांमलाःगु व्यवहार यात।
8 छं जिगु पवित्र वस्तुयात हेला याःगु दु अले जिगु विश्रामबारया दिंयात अपवित्र याःगु दु।
9 हि बाः वय्केत मखुगु खँ ल्हानाजुइपिं मनूत छंके तयार जुयाः च्वनाच्वंगु दु। अले डाँडाया पुजा याइगु थासय् प्रसाद नइपिं व मभिंगु ज्या याइपिं मनूत नं छंके दु।
10 छंके थः बौया कलाःपिंनापं द्यनाः थः बौयात अपमान याइपिं दु, छंके थीमत्यः जूबलय् व विधिकथं अशुद्ध जुयाच्वंम्ह मिसालिसें लसपस याइपिं मनूत नं दु।
11 छंके गुलिसिनं थः जःलाखःलाया कलाःलिसें घच्चाइपुगु ज्या याइगु। गुलिसिनं थः भौयात स्यंकीगु, अले गुलिसिनं थः हे बौया म्ह्याय्, थः केहेँयात बलात्कार याइगु।
12 छंके हे मनूतय्सं मनू स्यायेत ध्यबा काइगु, गुलिं मनूतय्सं ब्याजय् नं यक्व ब्याज काइगु, थः जःलाखःलायात अन्याय यानाः जबरजस्तिं लबः काइगु। छं जितः ल्वःमंकूगु दु, परमप्रभु परमेश्वरं धयादी।
13 “‘छं अन्याय यानाः फाइदा काःगुलिं अले थःगु दथुइ हि बाः वय्कूगुलिं जिं धात्थें हे ल्हातं ल्हातय् दाये।
14 छु जिं न्याय यानागु दिं छंगु साहस दयाच्वनी ला? अथवा छंगु ल्हाः बल्लाइ ला? जि, परमप्रभुं थ्व धयागु दु, अले थथे हे याये।
15 जिं छिमि मनूतय्त जाति जाति व देश देशय् छ्यालब्याल यानाबी। जिं छंके दुगु अशुद्धता मदय्काबी।
16 जाति जातितय्गु मिखाय् छंगु बेइज्जत जुइबलय् छं जि हे परमप्रभु खः धकाः सी।’”
17 परमप्रभुयागु वचन जिथाय् वल,
18 “अय् सीमानिम्ह मनू, इस्राएलया घराना जिगु निंतिं धातुयागु कसर थें जूगु दु, इपिं सकलें भट्टीइ दुगु सिजः, टिन, नँ व म्हः थें जुल। इपिं ला वहःयागु कसर थें जुइ धुंकूगु दु।
19 उकिं परमप्रभु परमेश्वरं थथे धयादी, ‘छिपिं सकलें कसर जूगुलिं जिं छिमित यरूशलेम दुने हे मुंके।
20 ह्वाना ह्वाना मि च्याकाः नाय्केत गथे मनूतय्सं वहः, सिजः, नँ, म्हः व टिन भट्टीइ मुंकी, अथे हे जिं नं जिगु तं व जिगु झ्वँःकय् छिमित छथाय् मुंके, अले छिमित अन शहर दुने हे तयाः नाय्के।
21 जिं छिमित मुंके, अले छिमिके जिगु तंया मिं स्वांपुया बी, अले छिपिं उकिं दुने हे नायावनी।
22 भट्टीइ वहः नायावंगु थें हे छिपिं नं उकी दुने नायावनी। अले जि परमप्रभुं हे छिमिके थःगु तं प्वंकूगु खः धकाः छिमिसं सी।’”
23 हाकनं परमप्रभुयागु थ्व वचन जिथाय् वल,
24 “अय् सीमानिम्ह मनू, इस्राएल देशयात धा, ‘छ अशुद्धगु देश खः, जि छ खनाः थुलि तं चायागु दु कि जिं छन्त सजाँय बीबलय् भचा नं वा वइ मखु।’
25 वया शासकतय्सं मभिंगु ग्वसाः ग्वयाच्वंगु दु इपिं शिकारयात काचाकुचु याइपिं सिंह थें गर्जय् जुयाः च्वंगु दु। इमिसं मनूतय्त नल, इमिसं मू मू वंगु सामान लुतय् यात, अले अनच्वंपिं यक्व मिस्तय्त भाःत मदुपिं यानाब्यूगु दु।
26 वया पुजाहारीत जिगु व्यवस्थाया अःखतं वंगु दु अले जिगु पवित्र चिजत स्यंकूगु दु। इमिसं पवित्र व साधारणया दथुइ छुं मपाकु। इमिसं शुद्ध व अशुद्ध छुं मपाः धकाः स्यंगु दु। इमिसं जिगु विश्रामबार नं मानय् मयाः, इमिगु दथुइ जि अपमानित जूगु दु।
27 उकिया दुने दुपिं हाकिमत थः शिकारतय्त कुचा कुचा याइपिं गुँखिचात थें च्वं। इमिसं बेइमान यानाः फाइदा कायेत हि बाः वय्काः मनूत स्याइगु।
28 वया अगमवक्तातय्सं मखुगु दर्शन अले फताहा ज्वखना स्वयाः उपिं मभिंगु ज्यायात सख्वाः पाःगु थें त्वःपुइगु। परमप्रभुं छुं धयामदीसां ‘परमप्रभु परमेश्वरं थथे धयादिल’ धकाः इमिसं धाइगु।
29 देशयापिं मनूतय्सं जबरजस्ती लाकाकायेगु व खुइगु ज्या याइगु, इमिसं गरीबत व मगाःमचाःपिन्त इन्साफ मब्यूसें इमित अत्याचार याइगु, अले विदेशीतय्त बांमलाःगु व्यवहार याइगु।
30 “पःखाः हाकनं दय्काबीम्ह व देश जिपाखें नाश मजुइमा धकाः देशया लागि जिगु न्ह्यःने पःखाःया ह्वतय् दनाबीम्ह छम्ह मनू इमिगु दथुइ जिं स्वया, तर जिं सुं मखना।
31 उकिं जिं इमिके जिगु तंया मि प्वंकाः इमित भस्म याये। इमिसं याःगु फुक्क ज्या इमिगु हे छेनय् हयाबी, परमप्रभु परमेश्वरं धयादी।”