1 परमप्रभुयागु थ्व वचन जिथाय् वल,
2 “अय् सीमानिम्ह मनू, आः अगमवाणी ल्हानाच्वंपिं इस्राएलया अगमवक्तातय्गु विरोधय् अगमवाणी ल्हा, थःगु हे मनं अगमवाणी ल्हाइपिन्त धा, ‘परमप्रभुया वचन न्यँ।
3 परमप्रभु परमेश्वरं थथे धयादी – छुं दर्शन मखंसां थःगु हे आत्माया खँया ल्यू वनीपिं मूर्ख अगमवक्तातय्त धिक्कार दु।
4 अय् इस्राएल, छिमि अगमवक्तात ला भग्नावशेषय् च्वनीपिं ध्वंचात थें जूगु दु।
5 परमप्रभुया दिनय् लडाइँलय् व धिसिलाक्क दनाच्वने फयेमा धकाः छिपिं इस्राएलया घरानाया निंतिं दुंगु पःखाः ल्ह्वनेत तकं मवं।
6 इमिगु दर्शनत धात्थेंगु मखु व इमिगु ज्वखना फताहा खः। इमिसं धाइगु, “परमप्रभुं धयादी,” तर परमप्रभुं इमित छ्वयाहयादीगु हे मखु। अय्नं इमिसं इमिगु वचन पूरा जुइ धकाः आसा याइ।
7 छिमिसं मखुगु दर्शन खंगु व मखुगु ज्वखना स्वःगु मखु ला? छिमिसं धाइगु, “परमप्रभुं धयादी”, तर जिं छुं धयागु मदु।
8 “‘उकिं परमप्रभु परमेश्वरं छिमित थथे धयादी – छिमिसं मखुगु खँ ल्हाःगुलिं व मखुगु दर्शन खंगुलिं जि छिमिगु विरोधय् दु, परमप्रभु परमेश्वरं धयादी।
9 जिगु ल्हाः मखुगु दर्शन खनीपिं व मखुगु ज्वखना ल्हाइपिं अगमवक्तातय्गु विरोधय् जुइ। इमित जिगु प्रजाया सभाय् थाय् दइ मखु। इमिगु नां इस्राएलया घरानाया धलखय् दइ मखु। इस्राएल देशय् इपिं दुहां वने दइ मखु। अले जि हे परमप्रभु परमेश्वर खः धकाः छिमिसं सी।
10 “‘छाय्धाःसा शान्ति मदुबलय् नं जिमि मनूतय्त “शान्ति दु” धकाः धयाः इमिसं मखुगु लँय् यंकूगु दु। अले मनूतय्सं तसकं बमलाःगु पःखाः दय्कूबलय् थुपिं अगमवक्तातय्सं उकियात सख्वाः पानाः त्वपुयाब्यूगु दु।
11 उकिं उपिं सख्वाः पानाः त्वपुयाब्यूपिन्त व दुनी धकाः धयाब्यु! तसकं वा वइ, यक्व प्वँ गाइ अले तसकं वाफय् वइ।
12 व पःखाः दुनीबलय् मनूतय्सं छिमित थथे धकाः मन्यनी ला, “छिमिसं थुकी पानागु सख्वाः गन वन?”
13 “‘उकिं परमप्रभु परमेश्वरं थथे धयादी – जिगु तंम्वय् जिं छगू ग्यानापुगु वाफय् वय्काबी, अले जिगु तंम्वय् प्वँ व तसकं वा वइ, गुकिं व पःखाःयात थुनाबी।
14 अले छिमिसं सख्वाः पाःगु पःखाःयात जिं थुनाबी अले उकियात बँ तक हे माथं वंकाबी। व दुनीबलय् छिपिं नं उकिं ल्हानाः नाश जुइ, अले परमप्रभु जि हे खः धकाः छिमिसं सी।
15 थुकथं जिं थःगु तं पःखाः व उकी सख्वाः पाःपिं मनूतय्गु विरोधय् प्वंके। जिं छिमित धाये, “व पःखाः आः मन्त, उकी सख्वाः पाःपिं नं मन्त,
16 यरूशलेमया बारे अगमवाणी ल्हाःपिं व अन शान्ति मदुसां शान्तिया दर्शन खंपिं इस्राएलया अगमवक्तात नं मन्त, परमप्रभु परमेश्वरं धयादी।”’
17 “अय् सीमानिम्ह मनू, थःगु ख्वाः थःगु हे मनं अगमवाणी ल्हाइपिं इस्राएलया म्ह्याय्पिंपाखे स्वय्कि। इमिगु विरोधय् अगमवाणी ल्हानाः थथे धा,
18 ‘परमप्रभु परमेश्वरं थथे धयादी – धिक्कार दु, उपिं मिस्तय्त गुपिन्सं थःगु नाडीइ जन्तर ची अले मनूतय्गु प्राण जालय् लाकेत इमिगु म्हधिकःकथं छ्यं त्वपुइगु गाबः दय्की। छु छिमिसं जिमि मनूतय्गु प्राणयात जालय् लाकाः थःगु प्राणयात धाःसा बचय् यानातयेगु ला?
19 छिमिसं छम्हू निम्हु तछ्व व छपा निपा मरिया निंतिं जिमि प्रजाया न्ह्यःने जितः हेला यात। मखुगु खँ न्यनीपिं जिमि प्रजायात मखुगु खँ ल्हानाः सीम्वाःपिं मनूतय्त छिमिसं स्यात। म्वायेम्वाःपिं मनूतय्त धाःसा छिमिसं बचय् याना तल।
20 “‘उकिं परमप्रभु परमेश्वरं थथे धयादी – जि छिमिसं मनूतय्त झंगःतय्त थें जालय् लाकीगु छिमिगु जादुयागु जन्तरया विरोधय् दु। जिं छिमिगु ल्हातं व लाकाकाये। छिमिसं झंगःयात थें जालय् लाकूपिं मनूतय्त जिं त्वःतके।
21 जिं छिमिगु गाबः नं लिकयाबी, अले जिमि प्रजायात छिमिगु ल्हातं त्वःतके। इपिं हाकनं गुबलें छिमिगु ल्हातय् शिकार जुइ मखु। अले छिमिसं जि हे परमप्रभु खः धकाः सी।
22 छिमिसं मखुगु खँ ल्हानाः धर्मीतय्त निराश यात, तर जितः इपिं निराश जूगु मयः। छिमिसं दुष्टतय्त थःगु मभिंगु पहःचहः मत्वःतेत हःपाः बिल, इमिसं मभिंगु पहःचहः त्वःतूगु जूसा इमिगु प्राण बचय् जुइगु।
23 उकिं आवंलि छिमिसं मखुगु दर्शन खनी मखु, अले ज्वखना स्वइ मखु। जिं छिमिगु ल्हातं थः मनूतय्त त्वःतके। अले छिमिसं जि परमप्रभु खः धकाः सी।’”