1 परमप्रभुं मोशायात धयादिल,
2 “न्हापां बूम्ह इस्राएली काय्मचायात जिगु निंतिं फ्या। न्हापां बूम्ह मिजंमचा जिम्ह हे जुइ। छिमिसं न्हापां बूम्ह मिजंम्ह पशुयात नं जिगु निंतिं फ्या।”
3 अले मोशां मनूतय्त धाल, “छिमिसं परमप्रभुं थःगु शक्तिं जाःगु ल्हातं छिमित छिपिं दास जुयाच्वंगु मिश्र देशं पित हयादीगु थ्व दिंयात लुमंका ति। थ्वखुन्हु सोडा तयातःगु छुं नं नये मते।
4 छिपिं पिहां वंगु आबीब लाया थ्वखुन्हुयात लुमंकि।
5 परमप्रभुं छिमि तापाःबाज्यापिन्त बी धयातःगु कनानी, हित्ती, एमोरी, हिव्वी व यबूसीतय्गु दुरु व कस्ति बाः वयाच्वंगु देशय् छिमित यंकादीधुंकाः नं थ्व हे लाय् छिमिसं थ्व नखः हँ।
6 न्हय्न्हु तक छिमिसं सोडा मदुगु मरि न, अले न्हय्न्हु खुन्हु परमप्रभुया आराधना यायेत मुंज्या यानाः भ्वय् न।
7 न्हय्न्हुयंकं छिमिसं सोडा मदुगु मरि जक नयेमाः। अले छिमिगु देशय् सोडा व सोडा दुगु छुं नं खने तकं मदयेमाः।
8 उखुन्हु छिमिसं थःकाय्यात धा, ‘जि मिश्रं पिहां वयाबलय् परमप्रभुं जिगु निंतिं छु छु यानादिल, व हे जिं यानागु खः।’
9 परमप्रभुया व्यवस्था छिमिगु म्हुतुइ दयेमा धकाः थ्व छिमिगु ल्हातिइ व कपालय् लुमंकाबीगु चिं थें जुइ, छाय्धाःसा परमप्रभुं थःगु शक्तिं जाःगु ल्हातिं छिमित मिश्र देशं पित हयादीगु खः।
10 थ्व हे नखः दँय्दसं क्वःछिनातःगु इलय् हनेगु या।
11 “छिपिं व छिमि पुर्खालिसें पाःफयादी थें परमप्रभुं छिमित कनानीतय्गु देशय् हयाः व देश छिमित बीधुंकाः
12 छिमिसं न्हापां बूम्ह काय्मचा परमप्रभुया निंतिं फ्या। छिमि पशुतय् न्हापां बूपिं मिजंमचा परमप्रभुयागु जुइ।
13 न्हापां बूम्ह गधाया मचायात भ्याःचा बियाः त्वःतकि, त्वःमतुकेगु जूसा वयागु गःपः त्वःथुला ब्यु। छिमिसं न्हापां बूम्ह काय्मचायात नं लिफ्याना कायेमाः।
14 “छिमि काय्पिन्सं लिपा, ‘थुकियागु अर्थ छु खः?’ धकाः छिमित न्यनीबलय् इमित धा, ‘परमप्रभुं थःगु शक्तिं जाःगु ल्हातिं जिमित दास यानातःगु देश मिश्रं पित हयादिल।
15 फारोनं जिद्दी यानाः झीत वने मब्यूबलय् परमप्रभुं मिश्रय् च्वंपिं फुक्क मनू व पशुतय् न्हापां बूपिन्त स्यानादिल। अथे जुयाः झीसं न्हापां बूपिं फुक्क मिजं पशुतय्त परमप्रभुया निंतिं बां बीगु व न्हापां बूम्ह थःकाय्यात धिबा बियाः लिफ्यायेगु खः।’
16 परमप्रभुं झीत थःगु शक्तिं जाःगु ल्हातिं मिश्रं पित हयादीगु खः धकाः लुमंकेत थ्व छिमिगु ल्हातिइ व कपालय् छगू छगू चिं थें दइ।”
17 फारोनं मनूतय्त वनेब्यूबलय् परमेश्वरं पलिश्तीतय्गु देशया लँपु चिहाकः जूसां इमित अनयागु लँपु जुयाः यंकामदी। मनूतय्सं लडाइँ खनीबलय् थःगु मन हिकाः मिश्रय् तुं लिहां वने फु धकाः परमेश्वरं अथे यानादीगु खः।
18 उकिं परमेश्वरं इमित चाःहिकाः मरुभूमिया लँ जुकाः लाल समुद्रपाखे यंकादिल। इस्राएलीत लडाइँया निंतिं ल्वाभः घानाः मिश्रं वन।
19 मोशां थःलिसें योसेफया अस्थि नं यंकल। छाय्धाःसा योसेफं थः दाजुकिजापिन्त थथे धकाः पाःफय्का थकूगु खः, “परमेश्वरं छिमित त्वःतकादीबलय् छिमिसं जिगु अस्थि नं थनं यंकि।”
20 इपिं सुक्कोतं वनाः मरुभूमिया लिक्कसं लाःगु एथामय् पाल ग्वयाः च्वन।
21 इपिं चान्हि वनाच्वने फयेमा धकाः इमित लँ क्यनेत न्हिनय् सुपाँय्या थामय् व चान्हय् मिया थामय् च्वनाः परमप्रभु न्ह्यः न्ह्यः झायेगु यानादिल।
22 दिनय् सुपाँय्या थां व चान्हय् मिया थां इमिगु न्ह्यःनं गुबलें चिलामवं।