1 होरेबय् परमप्रभुं इस्राएलीतलिसे चिनादीगु बाचा बाहेक मोआबया ख्यलय् परमप्रभुं मोशायात बियादीगु बाचाया वचन थुपिं हे खः।
2 मोशां सकलें इस्राएलीतय्त सःताः धाल,
3 उपिं ततःधंगु दुःख, चिं व अजू चाइपुगु ज्या छिमिगु मिखां खंगु दु।
4 अय्नं थौं तक परमप्रभुं छिमित थुइके फइगु नुगः, स्वये फइगु मिखा व न्यने फइगु न्हाय्पं बियादीगु मदु।
5 परमप्रभुं धयादी, “जिं छिमित पिइदँ तक मरुभूमिइ ज्वना जुयाबलय् छिमिगु म्हया वसः गुना मवं अले तुतिया लाकां नं मगू।
6 छिमिसं मरि नये मखन, अले दाखमद्य व छाःगु मद्य नं त्वने मखन। जि परमप्रभु छिमि परमेश्वर खः धकाः छिमित स्यनेत जिं थथे याना।”
7 छिपिं थन थ्यंबलय् हेश्बोनया जुजु सीहोन व बाशानया जुजु ओग झीनापं ल्वायेत पिहां वल तर झीसं इमित त्याका।
8 अले झीसं इमिगु देश कयाः सर्बयकथं रूबेनी, गादी व मनश्शेया बच्छि कुलयात इनाबिया।
9 अथे जुयाः थ्व बाचाया वचन बांलाक मानय् या अले छिमिसं न्ह्यागु याःसां छिमित बांलाइ।
10 थौं छिपिं सकलें परमप्रभु छिमि परमेश्वरया न्ह्यःने दनाच्वंगु दु। छिमि कुलनायःत अले मू मू मनूत, छिमि थकालित, हाकिमत व सकल इस्राएलीत,
11 छिमि मचाखाचात व कलाःपिं अले छिमि सिँ पालीपिं व लः क्वबिपिं छिमि छाउनीइ च्वनिपिं परदेशीत नं छिपिंनापं दु।
12 छिपिं थन परमप्रभु छिमि परमेश्वरं पाफयाः चिनादीत्यंगु बाचाय् ब्वति कायेत दनाच्वंगु दु।
13 परमप्रभुं छिपिं व छिमि पुर्खा अब्राहाम, इसहाक व याकूबलिसें चिनादीगु बाचाकथं छिपिं वय्कःया मनूत व वय्कः छिमि परमेश्वर खः धकाः थौं पक्का यानादी।
14 परमप्रभुं छिमित धयादी, “पाफयाः थ्व बाचा जिं छिपिंलिसें जक चिनागु मखु
15 तर थन परमेश्वरया न्ह्यःने दनाच्वंपिं फुक्क नापं व आः तक मबुपिं छिमि मचाखाचालिसें नं चिनागु दु।”
16 झीपिं मिश्रय् गथे यानाच्वनाः अले थन थ्यंकः वयेत झीसं गुकथं देश देशत पुला वया धकाः छिमिसं स्यू।
17 हानं छिमिसं इमिके दुगु सिँ, ल्वहं, वहः व लुँयागु घच्चाइपुगु मूर्ति नं खंगु दु।
18 परमप्रभु झी परमेश्वरपाखें फहिलाः उपिं जातिया द्यःतय्त पुजा यायेगु मनदुपिं सुं मिजं वा मिसा, वंश वा कुल छिमिगु दथुइ मदु धइगु खँ पक्का या। होश या! थज्याःगु खायुगु बिख दय्कीगु छुं हा छिमिगु दथुइ मदयेमाः।
19 थ्व बाचाया वचन व सुवाः न्यंपिं मनूतय् दथुइ “जि जिद्दी जुयाः थःगु हे लँपुइ वनाच्वंसां नं बचय् जुयाच्वनी” धकाः बिचाः याइम्ह सुं मनू मदयेमाः। थज्याःगु बिचारं लखं लाःगु जमिनय् व गंगु जमिनय् विपत्ति हइ।
20 परमप्रभुं वयात क्षमा बीत गुबलें यय्कादी मखु। वय्कःया तं व डाहा व मनूयाके लाइ। थ्व सफुलिइ च्वयातःगु फुक्क सराः वयात लाइ। अले परमप्रभुं वयागु नां पृथ्वीं हुयाछ्वयादी।
21 परमप्रभुं वयात इस्राएलया फुक्क कुलपाखें अलग तयादी। अले थ्व नियमया सफुलिइ च्वयातःगु बाचाया फुक्क सराःकथं वयाके विपत्ति हइ,
22 छिमि लिपा वइपिं मचाखाचा व यक्व तापाःगु देशं वःपिं परदेशीतय्सं छिमिगु देशय् वःगु विपत्ति व परमप्रभुं देशय् हयादीगु ल्वय् खनी।
23 थ्व देशया फुक्क जमिन चि व गन्धकं झौ जुइ। अन छुं पी नं मज्यू, छुं बुया नं वइ मखु, अन घाँय् तक नं बुयावइ मखु। थ्व परमप्रभुं थःगु तंम्वय् नाश यानादीगु सदोम व गमोरा, अदमा व सबोयीम थें जुइ।
24 फुक्क जातितय्सं धाइ, “परमप्रभुं थ्व देशयात थथे छाय् यानादीगु? थ्व मि थें जाःगु तं छाय्?”
25 अले मनूतय्सं लिसः बी, “इमित मिश्रं पित हयादीबलय् इमि पुर्खालिसें परमप्रभुं छु बाचा चिनादीगु खः। उकियात इमिसं त्वाथूगुलिं थ्व जूगु खः।
26 इपिं वनाः म्हमस्यूपिं द्यःतय्त पुजा यात अले भागि यात। परमप्रभुं उपिं द्यःतय्त पुजा याये मते धकाः धयादीगु खः।
27 अथे जुयाः परमप्रभु थः मनूतलिसें तसकं तंचायादिल। अले थ्व सफुलिइ च्वयातःगु फुक्क सराः हयादिल।
28 परमप्रभु तच्वकं तंचायादिल अले तच्वःगु तंम्वय् इमित थःगु देशं लिनाः मेगु देशय् वांछ्वयादिल। व थौं तक नं जुयाच्वंगु दु।”
29 गुप्ति खँ परमप्रभु झी परमेश्वरयागु खः। अय्नं वय्कलं नियम क्यनादीगु दु अले झीसं व झी मचाखाचातय्सं उपिं मानय् यायेमाः।