1 मनूतय्गु दथुइ ल्वापुख्यापु जुयाः इपिं अदालतय् वनीबलय् न्यायाधीशतय्सं द्वं दुम्ह सु खः द्वं मदुम्ह सु खः व फैसला यानाबी।
2 द्वंयाःम्हय्सित दायेगु सजाँय जूगु दुसा न्यायाधीशतय्सं नं वयात बँय् ग्वार्तुइकाः थःगु न्ह्यःने वं याःगु द्वंकथं कोर्रां दाय्केमाः।
3 अय्नं पिइकः स्वयाः अप्वः कोर्रां मदायेमाः। व स्वयाः अप्वः कोर्रां दाल धाःसा मनूतय्गु न्ह्यःने वयागु बेइज्जत जुइ।
4 अन्न दाइबलय् द्वहंया त्वाथय् पिचा तयाबी मते।
5 छखा छेँय् च्वंपिं दाजुकिजा मध्ये सुं काय् मदयाः सिनावन धाःसा व सीम्हय्सिया कलातं व छेँजलं पिने ब्याहा मयायेमाः। सिनावंम्ह मनूया दाजु वा किजां वयात थः कलाः दय्काः सिनावंम्ह मनूया दाजु वा किजां यायेमाःगु ज्या यायेमाः।
6 वं न्हापां बुइकूम्ह काय् सिनावंम्ह दाजु वा किजाया काय् ताय्केमाः। अले वयागु नां इस्राएलय् दया हे च्वनी।
7 अय्नं दरभत वा किजाभतं थः तताःजुयात तये मय्कूसा तताःजु शहरया ध्वाखाय् थकालितथाय् वनाः थथे धायेमाः, “जिमि दरभत वा किजाभतं थः दाजुया नां इस्राएलय् तयातयेत म्हाः धाल। अले जिलिसें दरभत वा किजाभतं यायेमाःगु ज्या मयाः।”
8 अले थकालितय्सं दरभतः वा किजाभतःयात सःताः खँ ल्हायेमाः। अले वं “जिं थ्व नापं ब्याहा याये मखु” धकाः थःगु खँय् जिद्दी यानाच्वन धाःसा
9 सीम्हय्सिया कलातं थकालितय्गु हे न्ह्यःने वयाथाय् वनाः वयागु हे तुतिं छपा लाकां त्वःकाकयाः वयागु ख्वालय् थुकलं बीमाः। अले थथे धायेमाः “सु थः दाजु वा किजाया निंतिं मचा दय्केत मानय् जुइ मखु वयात थथे हे याइगु जुइ।”
10 इस्राएलय् व मनूया छेँजःयात, “लाकां लाकाकाःगु” छेँजः धकाः धाइ।
11 निम्ह मिजं ल्वाना च्वंथाय् छम्हय्सिया कलाः वयाः थः भाःतयात बचय् यायेत न्ह्यःने वनाः मेम्ह मिजंया अण्ड ल्हातं न्याक्क ज्वन धाःसा,
12 छिमिसं वयागु ल्हाः पालाब्यु, वयात माया याये मते।
13 छिमिसं थःगु म्हिचाय् छगू हे तौलयागु छगू झ्यातुगु अले छगू याउँगु निगू किसिमया धः तये मते।
14 छिमिगु छेँय् छगू हे नापयागु छगू तःधंगु व छगू चिधंगु नापय् यायेगु तये मते।
15 छिमिसं पाय्छिकथंयागु तराजु व धः अले माना पाथी व दायेगु छ्यलेगु या, उकिं परमप्रभु छिमि परमेश्वरं छिमित बियादीगु देशय् छिपिं ताःई तक म्वाइ।
16 सुनां थज्याःगु ध्वंलायेगु ज्या याइ व परमप्रभु छिमि परमेश्वरयात घच्चाइपुस्से च्वंम्ह मनू खः।
17 छिपिं मिश्रं पिहां वयाच्वंबलय् लँय् अमालेकीतय्सं छिमित छु याःगु खः व ल्वःमंके मते।
18 छिपिं त्यानुचायाः थाकु चाःबलय् लँपुइ छिमिगु ल्युने लाःपिन्त इमिसं हयेकायाः स्यानाबिल। इमिके परमेश्वरया भचा नं भय मदु।
19 परमप्रभु छिमि परमेश्वरं सर्बयकथं छिमिगु अधिकारय् बियादीगु देशय् शत्रुतपाखें छिमित आराम बियादी धुंकाः पृथ्वीं अमालेकीतय्गु नां हे न्हंकाछ्व। छिमिसं थ्व खँ गुबलें ल्वःमंके मते!