1 परमप्रभु छिमि परमेश्वरं छिमिगु अधिकारय् बियादीगु देशय् सुं मनुखं ख्यलय् स्यानातःम्ह मनू खन अले सुनां स्याःगु खः धइगु सी मदुसा,
2 थकालित व न्यायधीसत वनाः सीम्ह लूगु थासं लिक्क लिक्क लाःगु शहर नापय् यायेमाः।
3 अनंलि उगु सीम्हया दकलय् सतिक लाःगु शहरया थकालितय्सं गुबलें ज्याय् मछ्यःम्ह व ककुइ जुवा मलानिम्ह छम्ह साचा हयाः
4 वयात इमिसं क्वय् आः तक मपाःगु व छुं नं मप्यूगु खुसि दुगु ब्यासिइ यंकेमाः। अले व हे ब्यासिइ साचायागु ककु त्वाथुला बीमाः।
5 अले परमप्रभु परमेश्वरयागु सेवा यायेत व वय्कःया नामय् सुवाः बीत अले मुद्दा क्वःछित वय्कलं ल्ययादीपिं लेवी पुजाहारीत न्ह्यःने वयेमाः।
6 व सीम्हया दकलय् सतिक लाःगु शहरया सकलें थकालितय्सं ब्यासिइ ककु त्वाथूम्ह साचाया च्वय् थथःगु ल्हाः सिलेमाः।
7 अले इमिसं थथे धायेमाः “थ्व मनूयात जिमिगु ल्हातं स्यानागु मखु अले स्याःम्ह मनू नं म्हमस्यू।
8 हे परमप्रभु, छिं उद्धार यानादीपिं छिकपिनि प्रजा इस्राएलया निंतिं थ्व प्रायश्चित नाला कयादिसँ। छम्ह दोष मदुम्ह मनूयात स्याःगुया अपराधया निंतिं थः मनूतय्त पाःयानादी मते।” अले थ्व मनूया हियागु दोषं इमित क्षमा दइ।
9 थुकथं छिमिसं परमप्रभुयात यःगु ज्या यानाः थःपिनि दथुं व द्वं मदुम्ह मनूया हि बाः वय्कूगुया दोष चीकाछ्वइ।
10 छिमि शत्रुतलिसें लडाइँ याः वनीबलय् परमप्रभु छिमि परमेश्वरं शत्रुत छिमिगु ल्हातय् बियाः छिमिसं इमित ज्वनाः कुनीबलय्,
11 लडाइँलय् ज्वंपिं मध्ये सुं बांलाःम्ह मिसायात खनाः छिपिं मध्ये सुयागुं नुगः क्वसाल धाःसा, अले वलिसें ब्याहा याये यःसा
12 वयात थःगु छेँय् दुने दूत हजि। अले वं छ्यंयागु सँ खायेमाः अले लुसि ध्यनेमाः।
13 अले ज्वंबलय् वं फिनातःगु वसः त्वःकाः वयात मेगु वसः फिकि। छंगु छेँय् च्वनाः थः मांबौया लागिं लच्छि तक दुखं च्वने धुंकाः छं वयात ब्याहा यायेफु, छ वया भाःत जुइ अले व छिमि कलाः जुइ।
14 लिपा व मिसा छन्त मयःसा वयात थः यःथाय् वनेब्यु। छं वयात मी मते वा वयात दासीयात थें व्यवहार याये मते। छाय्धाःसा छं वयागु इज्जत काःगु दु।
15 सुं मनूया निम्ह कलाः दु, छम्ह यःम्ह, छम्ह मयःम्ह, अले उपिं निम्हय्सिनं काय् बुइकूबलय् न्हापां बूम्ह काय् मयःम्ह कलातं बुइकूगु जूसां
16 वं थः काय्पिन्त अंश बीबलय् पक्षपात यानाः यःम्ह कलाःया काय्यात मयःम्ह कलाःया काय्यागु थासय् न्हापां बूम्ह काय्यागु अंग्स मबीमाः।
17 थः यःम्ह कलाःपाखें दुम्ह मखुसां वं न्हापां बूम्ह काय्यात थःगु सम्पत्तिं निदुगं अंग्स बियाः न्हापां बूम्ह काय् खः धकाः नालेमाः। न्हापां बूम्ह काय् थः बौया बलया न्हापांगु चिं खः। अले न्हापां बूम्ह काय्यागु हक वयागु हे खः।
18 थः मांबौया खँ मन्यनीम्ह सुं जिराहा व हारां काय्यात सास्ती बियाः नं वं खँ मन्यन धाःसा
19 वया मांबौनं वयात ज्वनाः थकालितय्थाय् शहरया मू ध्वाखाय् यंकेमाः।
20 इमिसं थकालितय्त थथे धायेमाः “जिमि थ्व काय् जिराहा व हारां। वं जिमिगु खँ मन्यं। थ्व नगुलु व अय्लाःगुलुत खः।”
21 अले व शहरया फुक्क मिजंतय्सं वयात ल्वहँतं कय्काः स्यायेमाः। छिमिसं थज्याःगु मभिंगु ज्या छिमिगु दथुं चीकाः छ्वयेमाः। अले सकलें इस्राएलीत थ्व खँ न्यनाः ग्याइ।
22 सुं मनुखं स्याना छ्वयेमाःगु पाप याःगुलिं छिमिसं वयात स्यानाः वयागु सीम्ह थामय् यख्खानाबिल धाःसा
23 वयागु सीम्ह चच्छि हे थामय् यख्खानातये मते अय्नं उखुन्हु हे वयात थुनाः बीमाः छाय्धाःसा यख्खाःम्ह न्ह्याम्हं नं परमेश्वरपाखें सराः लाःम्ह खः। परमप्रभु छिमि परमेश्वरं छिमिगु अधिकारय् बियादीगु देशयात अशुद्ध याये मते।