1 छिमिसं परमप्रभु छिमि परमेश्वरयात छुं खू दुम्ह वा ख्वं दुम्ह द्वहं वा फै बां बी मते। छाय्धाःसा वय्कःयात थ्व घच्चाइपुगु खँ खः।
2 परमप्रभु छिमि परमेश्वरं छिमित बियादीगु शहरय् छिमिगु दथुइ च्वनीम्ह सुं मिसा वा मिजंनं परमप्रभु छिमि परमेश्वरयागु मिखाय् मभिंगु ज्या यानाः बाचायात त्वाथुलाः
3 जिगु उजं मानय् मयासें द्यःत वा सूर्य, तिमिला वा आकाशया नगुतय्गु पुजा याःगु दुसा वा इमित भागि याःगु दुसा,
4 अले थ्व खँ छिमित कन धाःसा वा छिमिसं न्यनेदत धाःसा उबलय् छिमिसं बांलाक न्यनेकने या। धात्थें इस्राएलय् थज्याःगु घच्याइपुस्से च्वंगु ज्या जूगु हे खःसा,
5 सु मिसा वा मिजंनं थज्याःगु मभिंगु ज्या याःगु खः, व मिसा वा मिजंयात शहरया मू ध्वाखाय् हयाः ल्वहँतं कय्काः स्या।
6 स्याना छ्वयेमाःम्ह मनूयात निम्ह वा स्वम्ह मनूया साक्षीं जक स्या, छम्ह हे जक मनूया साक्षीं वयात स्याये मते।
7 वयात स्यायेत दकलय् न्हापालाक साक्षीतय्सं ल्वहँतं कय्केमाः। अनंलि मेपिं मनूतय्सं वयात ल्वहँतं कय्केमाः। छिमिसं थज्याःगु मभिंगु ज्या छिमिगु दथुं चीकाः छ्वयेमाः।
8 छिमिगु शहरय् मनू स्याःगु मुद्दा, सम्पत्तिया मुद्दा वा कचवं, ल्वापुख्यापुया मुद्दा क्वःछियेत थाकुल धाःसा परमप्रभु छिमि परमेश्वरं ल्ययादीगु थासय् हुँ।
9 लेवी पुजाहारीतय्थाय् व उबलय्याम्ह न्यायकर्तायाथाय् वनाः न्यनेकने या अले वं क्वःछिनाबी।
10 परमप्रभुं ल्ययादीगु थासय् इमिसं छिमित छु छु खँ धाल वकथं हे या, अले इमिसं स्यंगु नियमकथं जु।
11 इमिसं छिमित स्यंगु नियम व क्वःछिनाब्यूगु खँकथं छिमिसं ज्या या। इमिसं छु धाल उकिं जव खव फहिले मते।
12 सुं मनुखं परमप्रभु छिमि परमेश्वरयागु सेवा यायेत च्वनाच्वनीम्ह न्यायकर्ता वा पुजाहारीयात क्वह्यंकल धाःसा वयात स्यानाछ्व। छिमिसं थज्याःगु मभिंगु ज्या छिमिगु दथुं चीकाः छ्वयेमाः।
13 थ्व न्यनाः सकलें मनूत ग्याइ अले हानं क्वह्यंकी मखु।
14 परमप्रभु छिमि परमेश्वरं बियादीगु देशय् वनाः उकियात त्याकाकयाः अन च्वनाः छिमिसं “जिमि प्यखेरं च्वनिपिं फुक्क जातितय्सं थें छम्ह जुजु दय्के” धकाः धाल धाःसा
15 परमप्रभु छिमि परमेश्वरं ल्ययादीम्ह मनूयात हे छिमिसं जुजु दय्कि। छिमिगु दथुं हे सुं छम्हसित थः जुजु ल्ययेमाः। इस्राएली मखुम्ह परदेशीयात थः जुजु दय्के मते।
16 व जुजुं यक्व सलत नं मतयेमाः, वा यक्व सल दयेमाः धकाः मनूतय्त मिश्रय् मछ्वयेमाः। छाय्धाःसा “व लँपु हाकनं लिहां वने मते” धकाः परमप्रभुं धयादीगु दु।
17 वं थःके यक्व कलाः मतयेमाः, मखुसा वयागु मन मखुगु लँय् वनी। वं थःगु लागिं लुँ, वहः यक्व ममुंकेमाः।
18 व जुजु जुयेवं लेवी पुजाहारीतय्के दुगु थ्व नियम कयाः थूतुलातःगु भोँतय् थःगु ल्हातं च्वयेमाः।
19 थ्व वयाके दयेमाः, वं परमप्रभु थः परमेश्वरया ग्याःभय कायेत अले थ्व नियमया खँ व थुपिं विधि बांलाक मानय् यायेगु सय्केत थुकियात जिवंकाछि ब्वनेगु यायेमाः।
20 थुकिं वयात थः दाजुकिजापिं स्वयाः तःधं भापिके बी मखु। अले व्यवस्थापाखें फहिला जव खव वनेबी मखु। थुकथं वं व वया सन्तानं जुजु जुयाः ताःई तक इस्राएलय् शासन याइ।