1 अहज्याहया काय् यहूदाया जुजु योआशं राज्य यानाच्वंगु निइस्वंगूगु दँय् येहूया काय् यहोआहाज सामरियाय् इस्राएलयाम्ह जुजु जुल। वं झिंन्हय्दँ राज्य यात।
2 नबातया काय् यारोबामं थें वं परमप्रभुयात मयःगु मभिंगु ज्या यात अले इस्राएलीतय्त पाप याकल। वं मभिंगु ज्या यायेगु त्वःमतू।
3 उकिं परमप्रभु इस्राएल खनाः तसकं तंचायादिल, अले वय्कलं इमित ताःई तक अरामया जुजु हजाएल व वया काय् बेन-हददया अधीनय् तयादिल।
4 यहोआहाजं परमप्रभुयात बिन्ति यात, अले अरामया जुजुं इस्राएलीतय्त तसकं क्वत्यलातःगु खनाः वय्कलं वयागु बिन्ति न्यनादिल।
5 परमप्रभुं इस्राएलया निंतिं छम्ह उद्धार याइम्ह ल्ययादिल। वं इमित अरामया ल्हातं त्वःतकल। अले इस्राएलीत हाकनं थथःगु छेँय् न्हापा थें याउँक च्वन।
6 तर इमिसं इस्राएलयात पाप याकूम्ह यारोबामया घरानां याःगु थें ज्याःगु पाप यायेगु त्वःमतू। अशेरा द्यःमय्जुया थां नं सामरियाय् दया हे च्वन।
7 यहोआहाजयाके नेय्म्ह सलगइपिं सिपाइँ, झिगः रथ व झिद्वः न्यासि जुइपिं सिपाइँत जक ल्यनाच्वन। वयाके मेपिं सिपाइँत मल्यन। छाय्धाःसा अरामया जुजुं वया मेपिं सिपाइँतय्त स्यानाः खलाया धू थें यानाब्यूगु खः।
8 यहोआहाज जुजु जुयाच्वंबलय् जूगु फुक्क खँ, वं याःगु फुक्क ज्या व वयागु बहादुरी इस्राएलया जुजुपिनिगु इतिहासया सफुलिइ च्वयातःगु दु।
9 यहोआहाज थः पुर्खात थें सित अले वयात सामरियाय् थुन। वयागु थासय् वया काय् येहोआश जुजु जुल।
10 यहूदाया जुजु योआशं राज्य यानाच्वंगु स्विन्हय्गूगु दँय् यहोआहाजया काय् येहोआश सामरियाय् इस्राएलया जुजु जुल। वं झिंखुदँ राज्य यात।
11 वं नं परमप्रभुयात मयःगु मभिंगु ज्या यात। अले इस्राएलयात पाप याकूम्ह यारोबाम जुजुं याःगु पाप छुं नं त्वःमतू। वं अज्याःगु पाप याना हे च्वन।
12 येहोआश जुजु जुयाच्वंबलय् जूगु फुक्क घटना, वं याःगु फुक्क ज्या व यहूदाया जुजु अमस्याहलिसें लडाइँ याःबलय् वं याःगु बहादुर ज्या नं इस्राएलया जुजुपिनिगु इतिहासया सफुलिइ च्वयातःगु दु।
13 येहोआश थः पुर्खा थें सित, वयागु थासय् वया काय् यारोबाम जुजु जुल। येहोआशयात सामरियाया जुजुपिं थुनिगु चिहानय् थुन।
14 जुजु येहोआश सीगु छुं ई न्ह्यः एलीशा अगमवक्ता तच्वकं बिरामी जुल। व सी थें च्वन। अबलय् इस्राएलया जुजु येहोआश वयात नापलाः वन। जुजुं ख्वख्वं धाल, “जिमि अबु, हे जिमि अबु! छि रथत व सलगइपिं इस्राएलया बल्लाःम्ह सिपाइँ खः।”
15 एलीशां वयात धाल, “धनुष वाणत कयाः हजि।” उकिं वं धनुष वाणत कयाहल।
16 अले एलीशां इस्राएलयाम्ह जुजुयात धाल, “थःगु ल्हातं धनुष का।” वं थःगु ल्हातं धनुष काल। एलीशां जुजुया ल्हाःया द्यःने थःगु ल्हाः तल।
17 एलीशां धाल, “पुर्बपाखे च्वंगु झ्याः चाय्कि।” जुजुं झ्याः चाय्कल। एलीशां धाल, “वाण कय्कि।” जुजुं वाण कय्केवं अगमवक्तां तःसलं धाल, “छ परमप्रभुया वाण खः, थ्व वाणं वय्कलं अरामयात बुकादी। छ अरामीतलिसें अपेकय् ल्वाइ अले इमित भज्यकं नाश याइ।”
18 अनंलि वं जुजुयात धाल, “वाण कयादिसँ,” अले जुजुं वाण काल। एलीशां धाल, “बँय् कय्कि।” जुजुं स्वकः वाणं कय्काः दित।
19 अथे याःगुलिं परमेश्वरया मनू तंचाल, अले जुजुयात धाल, “छं न्याकः खुकः वाणं कय्के माःगु खः। थथे याःगु जूसा छं अरामीतय्त बुकीगु खः। अले इमित भज्यंक नाश याइगु खः। तर आः छं इमित स्वकः तक जक बुकी।”
20 एलीशा सित, अले वयात थुन।
21 छकः इस्राएलीत सीम्ह थुनाः च्वंबलय् इमिसं छपुचः मोआबीत खन। उकिं इपिं सीम्हयात एलीशाया चिहानय् अथें वान्छ्वयाः बिस्युं वन। अन सीम्हं एलीशाया क्वँय् थीवं व मनू म्वानावल, अले थःगु तुतिं दन।
22 यहोआहाजं राज्य यानाच्वंतले अरामया जुजु हजाएलं इस्राएलीतय्त क्वत्यलातल।
23 तर अब्राहाम, इसहाक व याकूबलिसें बाचा चिनादीगुलिं परमप्रभुं इमित दयामाया यानादिल अले इमित वास्ता यानादिल। थौं तक नं वय्कलं इमित नाश यायेत अथवा वय्कःया न्ह्यःनं गुबलें पितनाछ्वयेगु इच्छा यानादीगु मदु।
24 अरामया जुजु हजाएल सीधुंकाः वया लिपा वया काय् बेन-हदद जुजु जुल।
25 इस्राएलया जुजु येहोआशं स्वकः हजाएलया काय् बेन-हददयात बुकल। वं थः अबु यहोआहाजया पालय् बेन-हददं काःगु इस्राएलया शहर लित काल।